ఓవైపు కేసులు, మరోవైపు తిరుగుబాట్లు..! పీకల్లోతు కష్టాల్లో కొడాలి నాని

ప్రస్తుతానికి రెండు కేసుల్లో ముందస్తు బెయిల్‌ పొందిన కొడాలికి కొంత ఉపశమనం లభించినా, మున్ముందు ప్రభుత్వం తీసుకోబోయే చర్యలే టెన్షన్‌ పెడుతున్నాయంటున్నారు.

Gossip Garage : మాట.. మనిషి సంస్కారాన్ని తెలియజేస్తుంది. అందుకే వాక్కు వ్యక్తిత్వానికి వాచక రూపం అంటారు. కొంతమంది ఆలోచించి మాట్లాడితే, కొంతమంది మాట్లాడిన తరవాత ఆలోచిస్తారు. నోరు జారిన తర్వాత.. దాన్ని సరి చేసుకునేందుకు నానా పాట్లు పడతారు. కాలు జారితే తీసుకోవచ్చు. నోరు జారితే తీసుకోలేం అంటారు. ఇందుకే… ఏదైనా మాట్లాడేటప్పుడు… ఎవరితో, ఎవరి గురించి, ఏది, ఎందుకు, ఎలా, ఏ పరిస్థితుల్లో మాట్లాడుతున్నాం.., అసలు మాట్లాడాల్సిన అవసరం ఉందా..? అనేది ఆలోచించుకోవాలి? లేదంటే మన మాటే మనల్ని చిక్కుల్లో పడేస్తుంది.

చెప్పదలచుకున్న విషయాన్ని కఠినంగా కాకుండా మృదువుగా చెబితే ఇన్ని ఇబ్బందులు ఉండవు కదా… ఇదంతా ఎందుకు చెబుతున్నామంటే… ఏపీలో మాజీలైన కొందరు నేతలు తమ నోటి దురుసుతో పీకల్లోతు కష్టాల్లో కూరుకుపోతున్నారు…. నోటి దురుసుకు కేరాఫ్‌ అడ్రస్‌గా మారిన ఓ మాజీ నేత పడుతున్న ఇబ్బందులేంటో ఏంటో తెలుసుకుందాం..

కొందరు వైసీపీ నేతల పరిస్థితి ఆగమ్యగోచరం..
ఏపీలో అధికారం చేతులు మారాక… కొందరు వైసీపీ నేతల పరిస్థితి ఆగమ్యగోచరంగా మారింది. ఐదేళ్లు అధికారంలో ఉండగా, చక్రం తిప్పిన నేతలు… నోటికి పని చెప్పిన నాయకులు…. ఇప్పుడు గుట్టుగా కాలం వెళ్లదీస్తున్నారు. తమ ఆచూకీ కూడా తెలియకుండా పూర్తిగా సైలెంట్‌ మోడ్‌లోకి వెళ్లిపోయారు. అలాంటి వారిలో ఎక్కువగా వినిపిస్తున్న పేరు కొడాలి నాని. పౌరసరఫరాల శాఖ మాజీ మంత్రి కొడాలి నాని గత ఐదేళ్లలో ఎలాంటి సౌండ్‌ చేసే వారో అందరికీ తెలిసే ఉంటుంది. ఏది మంచో… ఏదో చెడో కూడా ఆలోచించకుండా ప్రత్యర్థులపై మాటలతో విరుచుకుపడి టీడీపీకి టార్గెట్‌ అయ్యారు కొడాలి నాని.

ముందు నుయ్యి.. వెనక గొయ్యిలా కొడాలి నాని పరిస్థితి..
అసెంబ్లీ, కేబినెట్‌ భేటీ, పబ్లిక్‌ మీటింగ్‌ ఇలా ఏదైనా సరే… వెనకా ముందు ఆలోచించకుండా… సీఎం చంద్రబాబుపై ఏకవచనంతో విరుచుకుపడిన కొడాలి నాని… ఇప్పుడు కేసులతో ఉక్కిరిబిక్కిరి అవుతున్నారు. ఒకవైపు సీఎం చంద్రబాబు, మరోవైపు డిప్యూటీ సీఎం పవన్‌ ఉమ్మడిగా టార్గెట్‌ చేయడంతో కొడాలి పరిస్థితి ముందు నుయ్యి.. వెనక గొయ్యిలా తయారైంది. దాదాపు 20 ఏళ్లుగా గుడివాడలో నిర్మించుకున్న సామ్రాజ్యం… ఒక్క గాలివానకు కూలిపోయినట్లు… గత ఎన్నికల్లో కూటమి సునామీతో కొడాలి కోట గల్లంతైంది. దీంతో కష్టాలన్నీ కూడబలుక్కుని కొడాలిని చుట్టుముడుతున్నాయి.

ఓవైపు కేసులు, మరోవైపు తిరుగుబాట్లు..
తొలుత వలంటీర్లు, ఆ తర్వాత బెవరేజస్‌ గొడౌన్‌ గొడవలో ఓ లీజుదారు మాజీ మంత్రి కొడాలిపై కేసులు పెట్టారు. ఈ కేసుల్లో ముందస్తు బెయిల్‌ తెచ్చుకున్న కొడాలిని.. ఇంకోవైపు నుంచి బియ్యం స్కాం కమ్మేస్తోందంటున్నారు. కాకినాడలో డిప్యూటీ సీఎం పవన్‌ కల్యాణ్‌ ఆదేశాలతో బియ్యం స్కాంపై తనిఖీలు చేస్తున్న అధికారులు ఉచ్చు బిగిస్తుంటే… ఆ ఉచ్చులో కొడాలి కూడా ఉక్కిరిబిక్కిరి అవుతున్నట్లు పొలిటికల్‌ సర్కిల్స్‌లో టాక్‌ వినిపిస్తోంది. ఇలా కేసులతో కుమ్మేయాలని ప్రభుత్వం చూస్తుంటే… స్థానిక ప్రజలు కూడా తిరుగుబాటు చేస్తుండటం… మాజీ మంత్రికి షాకిస్తోందంటున్నారు.

కొడాలి నాని ఎక్కడున్నారో కూడా తెలీదు..
ఇరవయ్యేళ్లుగా గుడివాడను అడ్డాగా చేసుకున్న కొడాలి… ఈ ఎన్నికల్లో దాదాపు 50 వేల ఓట్ల తేడాతో ఓడిపోయారు. ఇక వైసీపీ ప్రభుత్వం కూడా ఓడిపోవడంతో ఒంటరి అయ్యారు మాజీ మంత్రి కొడాలి నాని. ఎన్నికల ఫలితాలు వచ్చిన వెంటనే… ప్రతీకారంతో రగిలిపోయిన టీడీపీ కేడర్‌… మాజీ మంత్రి ఇంటిపై దాడికి వెళ్లినా ఎలాంటి చప్పుడు చేయలేదు కొడాలి నాని. అంతేకాదు తన సహజ సిద్ధశైలికి భిన్నంగా నడవడం మొదలుపెట్టారు. ఎన్నికల ఫలితాలు విడుదలై నెలరోజులు అవుతున్నా… ఒకటి రెండు సార్లు మాత్రమే బయటకి వచ్చిన కొడాలి నాని… ఆ తర్వాత ఎక్కడున్నారో కూడా తెలియడం లేదు. పార్టీ కార్యకర్తలకు కూడా అందుబాటులో ఉండటం లేదని అంటున్నారు. ఇదే సమయంలో కొడాలి అనుచరులు ఆక్రమణల్లో ఉన్న భూములు, సినిమా థియేటర్‌ను స్థానికులు తిరిగి ఆక్రమించుకోవడం గుడివాడ రాజకీయంలో కీలక పరిణామంగా మారింది.

డేంజర్ జోన్ లో కొడాలి నాని..
మొత్తానికి నలువైపుల నుంచి మాజీ మంత్రి కొడాలిని ఇరుకున పెట్టడమే టార్గెట్‌గా ప్రభుత్వం పావులు కదుపుతోంది. దీనికి స్థానిక ప్రజలు సహకరిస్తుండటం.. మాజీ మంత్రిని ఊపిరి ఆడకుండా చేస్తోంది. ప్రస్తుతానికి రెండు కేసుల్లో ముందస్తు బెయిల్‌ పొందిన కొడాలికి కొంత ఉపశమనం లభించినా, మున్ముందు ప్రభుత్వం తీసుకోబోయే చర్యలే టెన్షన్‌ పెడుతున్నాయంటున్నారు. ముఖ్యంగా కాకినాడ కేంద్రంగా కూపీలాగుతున్న బియ్యం స్కాంలో కొడాలి పాత్ర ఏంటనేది ప్రభుత్వం ఆరా తీస్తోందంటున్నారు. ఏదైనా సరే కొడాలి డేంజర్‌ జోన్‌లో చిక్కుకున్నారని.. ఆయన బయట పడటం ఎలా అన్నదే పొలిటికల్‌ సర్కిల్స్‌లో హాట్‌టాపిక్‌గా మారింది.

Also Read : సీఎం రేవంత్ రెడ్డి టార్గెట్ జగనేనా? వైసీపీని దెబ్బతీయడమే లక్ష్యమా?