Worlds Largest Shivalinga: ప్రపంచంలోనే అతిపెద్ద ఏకశిల శివలింగం.. ప్రయాణం ప్రారంభం.. ప్రతిష్ఠాపన ఎక్కడ, ఎప్పుడు అంటే..

500 కోట్ల రూపాయల అంచనా వ్యయంతో బీహార్‌లోని తూర్పు చంపారన్ జిల్లాలో ప్రపంచంలోనే అతిపెద్ద రామాయణ మందిరాన్ని నిర్మిస్తున్నారు.

Worlds Largest Shivalinga: అదొక శివలింగం.. అలా అంటే సరిపోదు.. ఆ శివలింగం గురించి ఎంత చెప్పినా తక్కువే అవుతుంది. ఎందుకంటే.. అది ప్రపంచంలోనే అతిపెద్ద ఏకశిల శివలింగం. ఈ శివలింగం ఇప్పుడు ప్రతిష్టాపనకు సిద్ధమైంది. దీనికి సంబంధించి ప్రయాణం స్టార్ట్ అయ్యింది. తమిళనాడులోని మహాబలిపురం నుంచి బిహార్‌లోని చంపారన్ జిల్లాకు శివలింగం ప్రయాణం షురూ అయ్యింది. 96 చక్రాలు కలిగిన భారీ హైడ్రాలిక్ ట్రక్కులో తమిళనాడు నుండి ఈ భారీ బాహుబలి శివలింగాన్ని బిహార్‌కు తరలిస్తున్నారు. ఈ భారీ శివలింగానికి సంబంధించిన ఫొటోలు సోషల్ మీడియాలో వైరల్ అయ్యాయి.

బిహార్ లోని తూర్పు చంపారన్ జిల్లా చాకియా కేసరియా రహదారిపై విరాట్ రామాయణ ఆలయం నిర్మిస్తున్నారు. ఈ ఆలయంలో ప్రపంచంలోనే అతి పెద్ద ఏకశిల శివలింగాన్ని ప్రతిష్టంచబోతున్నారు. మహవీర్ మందిర్ ట్రస్ట్ ఆధ్వర్యంలో ఈ విరాట్ రామాయణ మందిరం నిర్మిస్తున్నారు.

బరువు 2 లక్షల కిలోలు.. విలువ 3 కోట్లు..

ఇక శివలింగం విషయానికి వస్తే.. ఇది గ్రానైట్‌తో తయారు చేయబడింది. ఈ మహాలింగాన్ని చెక్కడానికి 10 సంవత్సరాలు పట్టింది. దీని వెనుక ఎంతో శ్రమ, మరెంతో అంకితభావం ఉన్నాయి. మహాబలిపురంలో ఒకే ఒక్క భారీ గ్రానైట్ శిలను ఎంచుకుని దీన్ని చెక్కారు. ఈ శివలంగం 33 అడుగుల పొడవు ఉంది. దీని విలువ దాదాపు రూ.3కోట్లు. ఈ శివలింగం 210 మెట్రిక్ టన్నుల (దాదాపు 2,10,000 కిలోలు) బరువు ఉంటుంది. మహాబలిపురం నుంచి బీహార్ చేరడానికి దాదాపు 20 నుంచి 25 రోజుల సమయం పడుతుందని అంచనా. శివలింగం అపారమైన బరువును దృష్టిలో ఉంచుకుని 96 చక్రాల హైడ్రాలిక్ ట్రక్ పైకి ఎక్కించారు. ప్రత్యేక ఇంజనీరింగ్ బృందం పర్యవేక్షణలో శివలింగాన్ని బిహార్ కు తరలిస్తున్నారు.

బీహార్‌లోని తూర్పు చంపారన్ జిల్లాలో ప్రపంచంలోనే అతిపెద్ద రామాయణ మందిరాన్ని నిర్మిస్తున్నారు. 500 కోట్ల రూపాయల అంచనా వ్యయంతో 2023 జూన్ 20న నిర్మాణ పనులు ప్రారంభమయ్యాయి. మాజీ ఐపీఎస్ అధికారి, పాట్నాకు చెందిన మహావీర్ ఆలయ ట్రస్ట్ కార్యదర్శి ఆచార్య కిషోర్ కునాల్, రాజస్థాన్ హైకోర్టు మాజీ ప్రధాన న్యాయమూర్తి జస్టిస్ ఎస్ఎన్ ఝా ఈ ఆలయానికి శంకుస్థాపన చేశారు. కంబోడియాలోని 12వ శతాబ్దపు అంగ్కోర్ వాట్ ఆలయ సముదాయం కంటే ఎత్తుగా ఉండేలా ఈ మందిరం డిజైన్ చేశారు.

బిహార్ రాజధాని పాట్నా నుండి దాదాపు 120 కిలోమీటర్ల దూరంలో తూర్పు చంపారన్ జిల్లాలోని కేసరియా-చాకియా రహదారిపై కళ్యాణూర్ బ్లాక్ కింద కైత్వాలియా-బహువారా గ్రామాలలో 3.76 లక్షల చదరపు అడుగుల స్థలంలో విరాట్ రామాయణ ఆలయాన్ని నిర్మిస్తున్నారు. 3 అంతస్తుల ఈ మందిరంలో 12 గోపురాలు ఉంటాయి. వీటిలో ఒకదాని ఎత్తు 270 అడుగులు. 22 గర్భ గుడులు నిర్మిస్తున్నారు. ఈ ఆలయం 2,800 అడుగుల పొడవు.. 1,400 అడుగుల వెడల్పు.. 405 అడుగుల ఎత్తు ఉంటుంది. ఆలయ సముదాయంలోనే కల్యాణ మండపాలు, అతిథి గృహాలు కూడా నిర్మిస్తున్నారు.

ఏకశిల శివలింగం యాత్రకు దారి పొడవునా ఘన స్వాగతం పలికేందుకు భక్తులు, ఆలయ కమిటీలు సిద్ధమవుతున్నాయి. మహాబలిపురం నుంచి చాకియా వరకు అనేక నగరాల్లో ఊరేగింపులు, పూజలు, దర్శనం కోసం ప్రత్యేక వేదికలు నిర్మిస్తున్నారు. ట్రక్ ఆగిన ప్రతి చోట పూజారుల బృందం శాస్త్రోక్తంగా పూజలు నిర్వహించనుంది. ఇక, వేద పండితులు నిర్ణయించిన ప్రత్యేక శుభ ముహూర్తంలో శివలింగానికి ప్రాణప్రతిష్ఠ కార్యక్రమం జరగనుంది.

Also Read: ప్రాగస్తమిత శుక్ర మౌడ్యమి.. అంటే ఏమిటి? ఎప్పటి నుంచి ప్రారంభం? పొరపాటున కూడా చేయకూడని పనులేంటి..