కొత్తగా బీసీల్లోకి 18కులాలు: వివరాలు ఇవే!
- Published By: vamsi ,Published On : November 19, 2019 / 03:46 AM IST
సంచార జాతులు, ఆశ్రిత కులాలకు చెందిన మొత్తం 18 కులాలను వెనుకబడిన తరగతులైన బీసీల్లో చేర్చాలనే యోచనలో తెలంగాణ ప్రభుత్వం ఉంది. ఈ మేరకు రాష్ట్ర బీసీ కమిషన్‌ ఇదివరకే బహిరంగ విచారణతో పాటు క్షేత్రస్థాయి పరిశీలన పూర్తి చేసి నివేదిక రూపొందించింది.
ఇందులో ప్రభుత్వం నుంచి ఎలాంటి లబ్ధి పొందకుండా కేవలం ఇతర కులాలపై ఆశ్రయం పొందుతున్నవే ఎక్కువగా ఉన్నాయి. వాస్తవానికి 30 కులాలను బీసీ కేటగిరీలో చేర్చాలనే డిమాండ్‌తో క్షేత్రస్థాయి నుంచి ప్రభుత్వానికి వినతులు ఇప్పటికే ఇవ్వబడ్డాయి.
ఈ క్రమంలోనే వీటిని పరిగణనలోకి తీసుకున్న ప్రభుత్వం అధ్యయనంచేసి నివేదిక సమర్పించాలని రాష్ట్ర బీసీ కమిషన్‌ను ఆదేశించింది. దీంతో బీసీ కమిషన్‌ ఆమేరకు నోటిఫికేషన్‌ ఇచ్చింది. పూర్తిస్థాయి వివరాలు, ఆధారాలతో బహిరంగ విచారణకు రావాలని ఆదేశించడంతో 19 కులాలకు చెందిన ప్రతినిధులు హాజరయ్యారు. వారిలో 18 కులాలను బీసీ జాబితాలో చేర్చేందుకు అర్హత ఉన్నట్లు నిర్ధారించింది బీసీ కమీషన్.
ఇందులో కొన్ని బీసీ ఏ కేటగిరీలో, మరికొన్ని బీసీ డీ కేటగిరీలోకి వచ్చే అవకాశం ఉంది. బీసీ కమిషన్‌ కాలపరిమితి ముగిసిన చివరి రోజే పరిశీలన నివేదికను ప్రభుత్వానికి సమర్పించింది కమీషన్. కులాల సంస్కృతి, సంప్రదాయాలు, ఆర్థికస్థితి, విద్య, ఉద్యోగాలు, జీవన ప్రమాణాలను బీసీ కమిషన్‌ లోతుగా అధ్యయనం చేసింది. బృందాలుగా ఏర్పడి జిల్లాల వారీగా పర్యటనలు చేసి, చివరకు నివేదిక రూపొందించింది ప్రభుత్వం.
బీసీ కమీషన్ ప్రతిపాదించిన కులాలు:
గంజికుంటి, ఎనూటి, రామజోగి, అరవకోమటి, బాగోతుల, గౌడజెట్టి, పటంవారు, గోవిలి, సొన్నాయిల, అద్దపువారు, అహిర్‌ యాదవ, సారోళ్లు, బౌల్‌ కమ్మర, తేరచీరాల, కుల్ల కడగి, ఓడ్, కాకిపగడాల, తోలుబొమ్మలవారు.
