బాబు బాగా రిచ్: ఫేస్‌బుక్‌ లవ్ స్టోరీతో లక్షల్లో లూటీ

రిచ్‌గా ఉంటే అమ్మాయిలు పడిపోతారనుకున్నాడో ఏమో.. బడా బిజినెస్‌మెన్ అంటూ డ్రామా మొదలుపెట్టాడు. ఫేస్‌బుక్‌లో పరిచయం చేసుకుని క్లోజ్ అయ్యాక డబ్బులు దండుకోవడమే అతని టార్గెట్. చెన్నైకు చెందిన మరో సైబర్ దొంగను సైబరాబాద్ సైబర్ క్రైమ్ పోలీసులు సోమవారం అరెస్టు చేశారు. సీఐ గంగాధర తెలిపిన వివరాలు ప్రకారం.. మహ్మద్ సల్మాన్ నవాజ్ సర్కార్ పేరుతో బాధితురాలి ఫేస్‌బుక్ ఖాతాకు 2018 జనవరిలో ఫ్రెండ్ రిక్వెస్ట్ రావడంతో యాక్సెప్ట్ చేసింది. ముంబైలో తానో బడా పారిశ్రామికవేత్తనని, ప్రస్తుతం హైదరాబాద్‌లో ఉంటున్నానని పరిచయం చేసుకున్నాడు. అతటి మాటలు నమ్మిన బాధితురాలు ఫేస్‌బుక్ మెసేంజర్, వాట్సాప్ ద్వారా చాట్ చేయడంతో మొదలెట్టింది. 

ఈ సందర్భంగా అతను పలు స్టార్ హోటళ్లలో ప్రైవేట్ బాడీ గార్డులతో తీసుకున్న ఫొటోలను కూడా పంపాడు. ఈ క్రమంలో వారి మధ్య సాన్నిహిత్యం పెరగడంతో ప్రైవేట్ గా వీడియో కాల్ మాట్లాడుకునే వారు, ఆ తర్వాత కొద్ది రోజులకు తనకు రావాల్సిన డబ్బులు కొందరి వద్ద ఆగిపోయాయని, తన వ్యాపార విస్తరణతో పాటు వైద్య చికిత్స కోసం డబ్బులు అవసరమున్నట్లు చెప్పడంతో బాధితురాలు నమ్మింది. ఇలా సల్మాన్ స్నేహితుల బ్యాంక్ ఖాతాల్లో పలు దఫాలుగా రూ.12లక్షల 96వేలు డిపాజిట్ చేసింది. 

ఆ తర్వాత అనుమానం వచ్చిన బాధితురాలు ఇంకా డిపాజిట్ చేయలేనని చెప్పడంతో నీ వ్యక్తిగత ఫొటోలు, వీడియోలను సోషల్ మీడియాలో పోస్టు చేస్తానంటూ బెదిరించాడు. వేధింపులు తీవ్రం కావడంతో బాధితురాలు ఆగష్టు 11న సైబరాబాద్ సైబర్ క్రైమ్ పోలీసులకు ఫిర్యాదు చేసింది. కేసు నమోదు చేసిన పోలీసులు నిందితుడు సల్మాన్‌ది చెన్నై అని, ముంబైలో ఉంటున్నట్లు గుర్తించి టెక్నికల్ ఆధారాలతో అతడిని పట్టుకున్నాడు. 

ముంబై నుంచి సల్మాన్‌ను ట్రాన్సిట్ వారెంట్‌పై సోమవారం నగరానికి తీసుకొచ్చి కోర్టులో హాజరుపరిచి జ్యూడీషియల్ రిమాండ్‌కు తరలించారు. అతి తక్కువ సమయంలో ఎక్కువ డబ్బులు సంపాదించాలన్న ఉద్దేశంతో ఫేస్‌బుక్‌లో అందంగా కనపడే యువతులను లక్ష్యంగా చేసుకొని ఫ్రెండ్ రిక్వెస్ట్‌లు పంపి బడా బిజినెస్‍‌మెన్ అంటూ పరిచయం పెంచుకునేవాడినని వారితో చాట్ చేసిన వ్యక్తిగత సమాచారం. వారు పంపిన ఫొటోలు, వీడియోలు అడ్డుపెట్టుకొని బెదిరిస్తూ డబ్బు వసూలు చేసేవాడి నని సల్మాన్ సైబరాబాద్ సైబర్ క్రైమ్ పోలీసులు విచారణలో బయటపెట్టాడు.