Afghanistan: పాకిస్తాన్‌కు మరో బిగ్ షాక్.. భారత్ తర్వాత.. నదీ జలాలను నిలిపివేయనున్న మరో దేశం..
పాకిస్తాన్‌తో నీటి ఒప్పందాన్ని భారత్ రద్దు చేసుకున్న సంగతి తెలిసిందే.
- Published By: 10TV Digital Team ,Published On : October 24, 2025 / 04:56 PM IST
Afghanistan: సింధు జలాల ఒప్పందాన్ని నిలిపివేసి.. పాకిస్తాన్ కు భారత్ బిగ్ షాక్ ఇచ్చిన సంగతి తెలిసిందే. ఇప్పుడు పాక్ మరో దిమ్మతిరిగే షాక్ తగిలింది. మరో దేశం.. పాక్ కు నీళ్లు వెళ్లకుండా చేసే పనిలో పడింది. అదే ఆఫ్ఘనిస్తాన్. సరిహద్దు నదుల నుండి పాకిస్తాన్ నీటిని పొందకుండా నిరోధించడానికి కదులుతోంది. ఆఫ్ఘనిస్తాన్-పాకిస్తాన్ యుద్ధంలో వందలాది మంది మరణించారు. పాక్ పై కోపంతో రగిలిపోతున్న ఆఫ్ఘనిస్తాన్.. కాబూల్ కునార్ నదిపై వీలైనంత త్వరగా ఆనకట్ట నిర్మిస్తుందని తాలిబన్ సుప్రీం నాయకుడు తెలిపారు.
తాలిబన్ పాలిత ఆఫ్ఘనిస్తాన్ ఆనకట్టలు నిర్మించి పాకిస్తాన్‌కు నీటిని పరిమితం చేయాలని యోచిస్తోందని ఆఫ్ఘన్ సమాచార మంత్రిత్వ శాఖ తెలిపింది. కునార్ నదిపై “సాధ్యమైనంత త్వరగా” ఆనకట్ట నిర్మించాలని తాలిబన్ సుప్రీం నాయకుడు మౌలావి హిబతుల్లా అఖుంద్జాదా ఆదేశించారు. ఆఫ్ఘనిస్తాన్-పాకిస్తాన్ యుద్ధంలో వందలాది మంది మరణించిన కొన్ని వారాల తర్వాత “నీటి హక్కు”పై ఈ బహిరంగ ప్రకటన వచ్చింది.
పాకిస్తాన్‌తో నీటి ఒప్పందాన్ని భారత్ రద్దు చేసుకున్న సంగతి తెలిసిందే. ఏప్రిల్ 22న పహల్గామ్‌లో పాకిస్తాన్ మద్దతుగల ఉగ్రవాదులు 26 మంది పౌరులను హతమార్చిన తర్వాత మూడు పశ్చిమ నదుల నీటిని పంచుకునే సింధు జలాల ఒప్పందాన్ని భారత్ నిలుపుదల చేసింది. తద్వారా పాక్ కు దిమ్మతిరిగే షాక్ ఇచ్చింది.
కునార్ నదిపై ఆనకట్టల నిర్మాణాన్ని వీలైనంత త్వరగా ప్రారంభించాలని, దేశీయ కంపెనీలతో ఒప్పందాలు కుదుర్చుకోవాలని సుప్రీం లీడర్ అఖుండ్జాదా మంత్రిత్వ శాఖను ఆదేశించారని ఆఫ్ఘన్ జల ఇంధన మంత్రిత్వ శాఖ ఎక్స్ లో పోస్ట్ చేసింది.
“భారత్ తర్వాత.. పాకిస్తాన్ కు నీటి సరఫరాను పరిమితం చేయడం ఆఫ్ఘనిస్తాన్ వంతు కావచ్చు” అని లండన్‌కు చెందిన ఆఫ్ఘన్ జర్నలిస్ట్ సమీ యూసఫ్‌జాయ్ అన్నారు. విదేశీ సంస్థల కోసం వేచి ఉండటానికి బదులుగా దేశీయ ఆఫ్ఘన్ కంపెనీలతో ఒప్పందాలు కుదుర్చుకోవాలని నీరు ఇంధన మంత్రిత్వ శాఖను సుప్రీం లీడర్ సమీ యూసఫ్‌జాయ్ ఆదేశించారు.
480 కిలోమీటర్ల పొడవున్న కునార్ నది ఈశాన్య ఆఫ్ఘనిస్తాన్‌లోని హిందూ కుష్ పర్వతాలలో, పాకిస్తాన్ సరిహద్దుకు దగ్గరగా ఉన్న బ్రోగిల్ పాస్ సమీపంలో ఉద్భవించింది. ఇది కునార్ నంగర్హార్ ప్రావిన్సుల మీదుగా దక్షిణం వైపు ప్రవహించి పాకిస్తాన్‌లోని ఖైబర్ పఖ్తుంఖ్వాలోకి ప్రవహిస్తుంది. అక్కడ జలాలాబాద్ నగరానికి సమీపంలో కాబూల్ నదిలో కలుస్తుంది. కునార్‌ను పాకిస్తాన్‌లో చిత్రాల్ నది అని పిలుస్తారు.
పాక్ నీటి అవసరాలకు చాలా ముఖ్యం..
కునార్ నది ప్రవహించే కాబూల్.. ఆఫ్ఘనిస్తాన్-పాకిస్తాన్ మధ్య అతిపెద్ద అత్యంత భారీ సరిహద్దు నది. కాబూల్ నది అట్టాక్ సమీపంలో సింధు నదిలో కలుస్తుంది. పాకిస్తాన్ నీటిపారుదల ఇతర నీటి అవసరాలకు ముఖ్యంగా దాని ఖైబర్ పఖ్తుంఖ్వా ప్రావిన్స్‌కు చాలా ముఖ్యమైనది. కునార్ నది నీటి ప్రవాహం తగ్గడం సింధు నదిపై తీవ్ర ప్రభావాన్ని చూపుతుంది. తద్వారా పంజాబ్‌ను కూడా దెబ్బతీస్తుంది.
“పాకిస్తాన్ లోకి ప్రవహించే కాబూల్, కునార్ నదులు చాలా కాలంగా పాకిస్తాన్ కు నీటి వనరుగా ఉన్నాయి” అని లండన్ కు చెందిన ఆఫ్ఘన్ జర్నలిస్ట్ సామి యూసఫ్ జాయ్ ఎక్స్ లో పోస్ట్ చేశారు.
Also Read: పాకిస్థాన్‌కు దెబ్బమీద దెబ్బ.. బోర్డర్‌ మూసివేత ఎఫెక్ట్‌.. కిలో టమాటా ధర 700..
