నవంబర్ 21 నుంచి గాంధీ ఆస్పత్రిలో నాన్ కోవిడ్ సేవలు
- Published By: bheemraj ,Published On : November 12, 2020 / 07:09 PM IST
Gandhi Hospital Non covid services : హైదరాబాద్ గాంధీ ఆస్పత్రిలో నాన్ కోవిడ్ సేవలు అందనున్నాయి. నవంబర్ 21 నుంచి నాన్ కోవిడ్ సేవలను ప్రారంభం కానున్నాయి. కోవిడ్, నాన్ కోవిడ్ గా విభజించి సేవలందించాలని నిర్ణయించారు. ఈ మేరకు గురువారం డీఎంఈ ఆదేశాలు జారీ చేశారు. సాధారణ సేవలు, టీచింగ్, అకాడమిక్ పనులు కొనసాగించాలని నిర్ణయించినట్లు పేర్కొన్నారు. కోవిడ్, నాన్ కోవిడ్ సేవల్లో స్టాఫ్ విధులను నిర్ణయించే అధికారం సూపరింటెండెంట్ కు ఉంటుందని డీఎంఈ తెలిపారు.
గాంధీ ఆస్పత్రిలో కోవిడ్ సేవలు ప్రారంభించిన తర్వాత నాన్ కోవిడ్ సేవలను నిలిపివేశారు. అయితే ఇప్పుడు కోవిడ్ కేసులు తగ్గుముఖం పడుతున్న నేపథ్యంలో డీఎంఈ ఈ ఆదేశాలు జారీ చేశారు. గాంధీ ఆస్పత్రిలో మార్చి2న మొట్ట మొదటి కరోనా పాజిటివ్ కేసు నమోదైనప్పటి నుంచి ఇప్పటివరకు కోవిడ్ ఆస్పత్రిగా మార్చారు.
దీంతో సాధారాణ సేవలు ఆస్పత్రిలో ఉండటం లేదు. గత 15 రోజులుగా జూనియర్ డాక్టర్లందరూ ఆందోళన బాట పట్టారు. సమ్మెకు కూడా వెళ్లడానికి సిద్ధమవుతున్నారు. ఈ నేపథ్యంలోనే ప్రభుత్వం కీలక నిర్ణయం తీసుకుంది. ఆస్పత్రితో నాన్ కోవిడ్ సేవలు ప్రారంభించడానికి కొన్ని మార్గదర్శకాలు విడుదల చేశారు.
అయితే ఈ నెల 21వ తేదీలోపు గాంధీలో నాన్ కోవిడ్ సేవలు ప్రారంభించాలి, అలాగే అక్కడ అందుబాటులో అన్ని రకాల వైద్య సేవలు, వైద్య విద్యకు సంబంధించిన కార్యక్రమాలను కొనసాగించాలని నిర్ణయం తీసుకున్నారు.
తక్షణం నాన్ కోవిడ్ సేవలు, కోవిడ్ సేవలు సమాంతరంగా నిర్వహిస్తూ వేర్వేరు ఎంట్రన్స్ లు ఏర్పాటు చేయడంతో వైరస్ కూడా వ్యాప్తి చెందకుండా చూడటానికి అన్ని ప్రికాషన్స్ తీసుకోవాలని నిర్ణయం తీసుకున్నారు.
