World Cancer Day 2025 : ప్రతి ఏడాది ఫిబ్రవరి 4నే ప్రపంచ క్యాన్సర్ దినోత్సవాన్ని ఎందుకు జరుపుకుంటారో తెలుసా? ఎప్పుడు ప్రారంభమైంది, చరిత్ర, ప్రాముఖ్యత ఏంటి?
World Cancer Day 2025 : ఫిబ్రవరి 4న ప్రపంచ క్యాన్సర్ దినోత్సవం.. క్యాన్సర్‌ను ఎదుర్కోవడంలో అవగాహన, ప్రాముఖ్యతను సూచిస్తుంది. తప్పుడు సమాచారం, అపోహాలు, ముందస్తు గుర్తింపుతో ఎలా నివారించవచ్చునో తెలుసుకోవచ్చు.
- Published By: 10TV Digital Team ,Published On : February 4, 2025 / 12:27 PM IST
World Cancer Day 2025
World Cancer Day 2025 : ప్రతి సంవత్సరం ఫిబ్రవరి 4న ప్రపంచవ్యాప్తంగా ప్రపంచ క్యాన్సర్ దినోత్సవాన్ని జరుపుకుంటారు. ఈ రోజు క్యాన్సర్ గురించి ప్రతిఒక్కరికి అవగాహన పెంచడంతో పాటు వ్యాధి గురించి సమాచారాన్ని అందరికి తెలియజేసేలా ప్రచారాన్ని నిర్వహిస్తారు. ఈ వ్యాధితో పోరాడటానికి ప్రపంచవ్యాప్తంగా బలోపేతం చేసేందుకు ఒక ప్రత్యేక అవకాశాన్ని అందిస్తుంది. నేడు ప్రపంచవ్యాప్తంగా మరణాలకు ప్రధాన కారణాలలో క్యాన్సర్ ఒకటి.
Read Also : Mental Health Study : మానసిక ఆరోగ్యంపై అధ్యయనం.. భారత్‌లో పురుషుల్లో కన్నా మహిళల్లోనే తీవ్ర ఒత్తిడి..!
పెరుగుతున్న క్యాన్సర్ కేసుల దృష్ట్యా.. ఈ రోజు ప్రాముఖ్యతను సూచిస్తుంది. ప్రపంచ క్యాన్సర్ దినోత్సవం ఉద్దేశ్యం.. ఈ వ్యాధి గురించి ప్రజలకు అవగాహన కల్పించడమే కాకుండా, దాని నివారణ, చికిత్స, నియంత్రణకు అవసరమైన ప్రోత్సహం అందిస్తారు. ప్రపంచ క్యాన్సర్ దినోత్సవం ఎప్పుడు ప్రారంభమైంది. అసలు దీని ప్రాముఖ్యత ఏంటి? ఎందుకు జరుపుకుంటున్నామో ఇప్పుడు వివరంగా తెలుసుకుందాం.
ప్రపంచ క్యాన్సర్ దినోత్సవ చరిత్ర :
ప్రపంచ క్యాన్సర్ దినోత్సవం ఫిబ్రవరి 4, 2000న ప్రారంభమైంది. క్యాన్సర్‌కు వ్యతిరేకంగా పోరాటంలో ప్రముఖ అంతర్జాతీయ సంస్థ అయిన యూనియన్ ఫర్ ఇంటర్నేషనల్ క్యాన్సర్ కంట్రోల్ (UICC) స్థాపించింది. ప్రపంచవ్యాప్తంగా క్యాన్సర్ గురించి అవగాహన పెంచడానికి, ఈ వ్యాధిపై పోరాటంలో ప్రపంచ సంఘీభావాన్ని అందించేలా యూఐసీసీ ఈ దినోత్సవాన్ని జరుపుకోవాలని నిర్ణయించింది.
ఈ దినోత్సవాన్ని స్థాపించడం ముఖ్య ఉద్దేశ్యం.. క్యాన్సర్ గురించిన అపోహలను తొలగించడం, క్యాన్సర్ విషయంలో అవగాహన పెంచడం, ప్రభుత్వాలు, సంస్థలు, వ్యక్తులు ఈ వ్యాధికి వ్యతిరేకంగా చర్యలు తీసుకునేలా ప్రేరేపించడం వంటివి ఉంటాయి. అప్పటి నుంచి ప్రతి సంవత్సరం ఫిబ్రవరి 4న ప్రపంచ క్యాన్సర్ దినోత్సవాన్ని జరుపుకుంటున్నారు. ఈ రోజున వివిధ క్యాన్సర్ సంబంధిత కార్యక్రమాలు, సెమినార్లు, వర్క్‌షాప్‌లు, అవగాహన ప్రచారాలు నిర్వహిస్తుంటారు.
ప్రపంచ క్యాన్సర్ దినోత్సవం ప్రాముఖ్యత :
ప్రపంచవ్యాప్తంగా లక్షలాది మంది ప్రాణాలను బలిగొనే వ్యాధి క్యాన్సర్. అందుకే, ప్రపంచ క్యాన్సర్ దినోత్సవం చాలా ముఖ్యమైనది. ప్రపంచ ఆరోగ్య సంస్థ (WHO) ప్రకారం.. ప్రపంచవ్యాప్తంగా మరణాలకు ప్రధాన కారణాలలో క్యాన్సర్ ఒకటిగా ఉంది. ప్రతి సంవత్సరం లక్షలాది మంది ఈ వ్యాధి కారణంగా ప్రాణాలు కోల్పోతున్నారు. క్యాన్సర్ కేసులు నిరంతరం పెరుగుతున్నాయి. దీనికి కారణాలు జీవనశైలిలో మార్పులు, కాలుష్యం, పొగాకు, మద్యపానం, అనారోగ్యకరమైన ఆహారం, శారీరక శ్రమ లేకపోవడం వంటివి ఉన్నాయి.
ఈ అంశాలన్నింటి గురించి ప్రజలకు అవగాహన కల్పించడంతో పాటు ఈ వ్యాధిని నివారించడానికి వారికి సరైన సమాచారం, వనరులను అందించడం ప్రపంచ క్యాన్సర్ దినోత్సవ లక్ష్యం. ఈ రోజు ద్వారా, క్యాన్సర్ లక్షణాలు, రోగ నిర్ధారణ, చికిత్స, నివారణ గురించి ప్రజలకు సమాచారం అందిస్తారు. అలాగే, ఈ రోజున క్యాన్సర్‌తో బాధపడుతున్న వ్యక్తులతో సంఘీభావం ప్రకటిస్తారు. వారికి మద్దతుగా నిలుస్తారు.
ప్రపంచ క్యాన్సర్ దినోత్సవం 2025 థీమ్ :
ప్రతి సంవత్సరం ప్రపంచ క్యాన్సర్ దినోత్సవాన్ని ఒక ప్రత్యేక థీమ్‌తో జరుపుకుంటారు. ఈ థీమ్ క్యాన్సర్‌కు వ్యతిరేకంగా పోరాటంలో కొత్త లక్ష్యాలను, దిశను నిర్దేశిస్తుంది. 2025 ప్రపంచ క్యాన్సర్ దినోత్సవం థీమ్ “యునైటెడ్ బై యునైక్”. క్యాన్సర్‌ను కేవలం చికిత్స ద్వారా ఓడించలేమని, ప్రజలతో కలిసి పోరాడి మూలాల నుంచి నిర్మూలించాల్సిన యుద్ధమని అర్థమయ్యేలా చేయడమే ఈ థీమ్ ఉద్దేశం. క్యాన్సర్‌కు వ్యతిరేకంగా పోరాటంలో ప్రతి వ్యక్తి సహకరించవచ్చునని ఈ థీమ్ తెలియజేస్తుంది.
క్యాన్సర్ పై అవగాహన అవసరం :
క్యాన్సర్ అనేది ఒక ప్రాణాంతక వ్యాధి. ముందుగానే గుర్తించే తొందరగా నయం చేయవచ్చు. కానీ, చాలా సందర్భాలలో క్యాన్సర్ లక్షణాల గురించి తెలియకపోవచ్చు. దీని కారణంగా వ్యాధి ముదిరిపోయి చికిత్స కష్టమవుతుంది. అందువల్ల, క్యాన్సర్ అవగాహన పెంచడం చాలా ముఖ్యం.
ఆకస్మిక బరువు తగ్గడం, దీర్ఘకాలిక దగ్గు లేదా గొంతు నొప్పి, శరీరంలో గడ్డలు, అలసట, చర్మ మార్పులు వంటి క్యాన్సర్ లక్షణాల గురించి ప్రపంచ క్యాన్సర్ దినోత్సవం రోజున తెలుసుకోవచ్చు. అలాగే, ఈ రోజున ప్రజలు క్రమం తప్పకుండా వైద్య పరీక్షలు చేయించుకోవాలని, ఆరోగ్యకరమైన జీవనశైలిని అవలంబించాలని ప్రోత్సహిస్తారు.
