Drugs Case: ఈడీ ముందుకు చార్మీ.. కెల్విన్ వాంగ్మూలంలో ఏముంది?

డ్రగ్స్ కేసు తెలుగు సినీ పరిశ్రమలో కలకలం రేపుతోంది. ఒక్కొక్కరిని వరసగా విచారిస్తున్న ఎన్ ఫోర్స్ మెంట్ డైరెక్టరేట్ అధికారులు నేడు సినీ నటి ఛార్మీని విచారించనున్నారు.

Drugs Case

Drugs Case: డ్రగ్స్ కేసు తెలుగు సినీ పరిశ్రమలో కలకలం రేపుతోంది. ఒక్కొక్కరిని వరసగా విచారిస్తున్న ఎన్ ఫోర్స్ మెంట్ డైరెక్టరేట్ అధికారులు నేడు సినీ నటి ఛార్మీని విచారించనున్నారు. డ్రగ్ పెడలర్ కెల్విన్ ఇచ్చిన సమాచారంతో ఛార్మీకి ఈడీ నోటీసులు ఇచ్చిన ఈడీ అధికారులు మనీలాండరింగ్ కోణంలో ఛార్మీ బ్యాంక్ అకౌంట్స్ ను పరిశీలించనున్నారు. కెల్విన్ అకౌంట్ లోకి ఛార్మీ డబ్బులు ట్రాన్స్ఫర్ చేసిందా? ఛార్మీ ప్రొడక్షన్ హౌజ్ ఆర్థికా లావాదేవీలపై అరా తీయనుంది. కెల్విన్ కు భారీగా నగదు ట్రాన్స్ఫర్ చేసినట్లు ఈడీ వద్ద కీలక ఆధారాలు ఉన్నట్లు తెలుస్తోంది.

అయితే, ఎంత కాలంగా కెల్విన్ తో చార్మీకి పరిచయం ఉంది? డ్రగ్స్ సేవించారా? కెల్విన్ తో పాటు సరఫరాకు కూడా సహకరించారా? అసలు ఎన్ని సార్లు కెల్విన్ అకౌంట్ కు ఛార్మీ మనీ ట్రాన్స్ఫర్ చేసిందన్న అనేక కోణాల్లో ఆధారాలతో కూడిన విచారణ ఈడీ చేయనుంది. ఇప్పటికే ఈ కేసులో కీలక వ్యక్తులను ప్రశ్నించిన ఈడీ అధికారులు.. కొంత విరామం తర్వాత మళ్లీ విచారణ చేపట్టారు. టాలీవుడ్ టు బాలీవుడ్ వయా శాండల్‌వుడ్ ఇండస్ట్రీల్లో డ్రగ్స్ వ్యవహారం తీవ్ర కలకలం రేపింది.

ఈకేసులోనే డైరెక్టర్ పూరీ జగన్నాథ్‌ను దాదాపు 10 గంటలపాటు ఈడీ అధికారులు ప్రశ్నించారు. అంతర్జాతీయ డ్రగ్స్ ముఠాలతో సంబంధాలు, విదేశాల నుంచి డ్రగ్స్ కొనుగోళ్లకు సంబంధించిన ఆర్థిక లావాదేవీలపై పూరీని, ఆయన చార్టెడ్ అకౌంటెంట్ సమక్షంలో విచారించారు. టాలీవుడ్ డ్రగ్స్ కేసులో మరో కీలక మలుపు తిరిగింది. నిందితుడు కెల్విన్ ఈడీ ముందు అప్రూవర్‌గా మారాడు. ఆరు నెలల క్రితం ఎక్సైజ్ కేసు ఆధారంగా ఈడీ అధికారులు కెల్విన్‌పై కేసు నమోదు కాగా విచారణ సమయంలో ఎక్సైజ్ అధికారులకు ఏమాత్రం సహకరించని కెల్విన్.. ఇప్పుడు ఈడీ కేసుతో అప్రూవర్‌గా మారడంతో ఈ కేసుతో సంబంధమున్న సినీ తారల్లో అలజడి నెలకొంది.

అప్రూవర్‌గా మారిన కెల్విన్ ఈడీ అధికారుల ముందు డ్రగ్స్ తీసుకున్న సినిమా స్టార్స్ చిట్టా విప్పాడు. అతని స్టేట్‌మెంట్ ఆధారంగానే సినిమా స్టార్లకు ఈడీ అధికారులు నోటీసులిచ్చారు. డ్రగ్స్‌ లావాదేవీల వివరాలను కెల్విన్‌ ఈడీ ముందు బయటపెట్టడంతో.. సినీ తారలకు ఉచ్చు బిగుస్తోంది. డ్రగ్స్ కోసం కెల్విన్ అకౌంట్లోకి సినిమా వాళ్లు భారీగా డబ్బు ట్రాన్స్‌ఫర్ చేశారు. ఈ నేపథ్యంలో అధికారులు కెల్విన్ బ్యాంక్ అకౌంట్‌ని ఫ్రీజ్ చేశారు. అతని బ్యాంక్ లావాదేవీల ఆధారంగా ఈడీ అధికారులు సినీ తారల అకౌంట్లను ఫ్రీజ్ చేసే యోచనలో ఉన్నారు.