ఇక 24×7 ఎప్పుడైనా కరోనా వ్యాక్సిన్ తీసుకోవచ్చు
- Published By: 10TV Digital Team ,Published On : March 3, 2021 / 03:36 PM IST
Can Get Vaccinated 24×7 కరోనా వ్యాక్సినేషన్ ప్ర‌క్రియ‌ను వేగవంతం చేసే దిశ‌గా కేంద్ర ప్ర‌భుత్వం కీల‌క నిర్ణయం తీసుకుంది. ఇందులో భాగంగా వ్యాక్సిన్ పంపిణీ సమయంపై ఉన్న ఆంక్షలను తొలగించింది. ప్రజలు వారికి అనువైన సమయంలో 24×7 ఎప్పుడైనా వ్యాక్సిన్ తీసుకోవచ్చని బుధవారం(మార్చి-3,2021) కేంద్ర ఆరోగ్య శాఖ మంత్రి హర్షవర్ధన్ తెలిపారు. ఈ సమయం అనేది ప్ర‌భుత్వ, ప్రైవేటు ఆసుప‌త్రులు రెండింటికీ వ‌ర్తించ‌నుంది. ప్రజల ఆరోగ్యంతో పాటు సమయానికి ఉన్న విలువను ప్రధాని నరేంద్ర మోడీ అర్థం చేసుకుని ఈ నిర్ణయం తీసుకున్నారని హర్షవర్ధన్ ట్వీట్ చేశారు.
కాగా, మంగళవారం రాష్ట్రాల ఆరోగ్య శాఖ అధికారులు, ప్రైవేటు ఆసుపత్రులతో సమావేశంలో కేంద్ర ఆరోగ్య శాఖ కార్యదర్శి రాజేశ్ భూషణ్. ఇదే విషయం చెప్పారు. వ్యాక్సిన్ పంపిణీ సమయం ఉదయం 9 గంటల నుంచి సాయంత్రం 5 గంటల వరకే అనేది తొలగించినట్లు చెప్పారు. ఆ తర్వాత కూడా వ్యాక్సినేషన్ చేసేందుకు సామర్థ్యం కలిగిన ఆసుపత్రులకు అనుమతులు ఇచ్చినట్లు తెలిపారు. రాష్ట్ర ప్రభుత్వాలను సంప్రదించి టీకా పంపిణీ చేయొచ్చని వివరించారు. వ్యాక్సినేషన్ సెంట‌ర్ల ద‌గ్గ‌ర ప్రజలు గుమిగూడ‌కుండా కూడా ఈ నిర్ణయం ఉప‌క‌రిస్తుంది
ఇక, వ్యాక్సిన్ తొలి డోసు తీసుకున్న వారికి ఫిబ్రవరి 13 నుంచి కొవిడ్-19 వ్యాక్సిన్ రెండో డోసు ఇస్తున్నారు. మార్చి 1 నుంచి దేశంలో వ్యాక్సినేషన్ రెండో దశను ప్రారంభించారు. 60 ఏళ్లకు పైబడిన వారికి, 45 ఏళ్లు అంతకన్నా ఎక్కువ ఉండి ఇతర అనారోగ్య లక్షణాలు ఉన్నవారికి వ్యాక్సిన్ ఇస్తున్నారు. దేశవ్యాప్తంగా ఇప్పటి వరకు మొత్తంగా 1.56 కోట్ల డోసులు ఇచ్చారు. ప్రధాని మోడీ,రాష్ట్రపతి కోవింద్,ఉపరాష్ట్రపతి వెంకయ్యనాయుడు సహా పలువురు కేంద్రమంత్రులు,ఎంపీలు,పలు రాష్ట్రాల సీఎంలు రెండో దశలో వ్యాక్సిన్ తీసుకున్నవారిలో ఉన్నారు.
