NISAR: నిసార్ ప్రయోగం సక్సెస్.. నింగిలోకి దూసుకెళ్లిన నిఘా నేత్రం
అంతరిక్షం నుంచి భూమిని అణువణువు 12 రోజులకు ఒకసారి స్కాన్ చేయనుంది ‘నిసార్’ ఉపగ్రహం. నిసార్ ఉపగ్రహం బరువు 2,392 కేజీలు.
- Published By: 10TV Digital Team ,Published On : July 30, 2025 / 05:54 PM IST
NISAR: నిసార్ శాటిలైట్ ప్రయోగం సక్సెస్ అయ్యింది. నిసార్ ఉపగ్రహం నింగిలోకి దూసుకెళ్లింది. శ్రీహరికోటలోని సతీశ్ ధవన్ అంతరిక్ష కేంద్రం నుంచి జీఎస్ఎల్వీ-ఎఫ్16 రాకెట్‌ను ప్రయోగించారు. ఈ రాకెట్ ద్వారా నిసార్ ఉపగ్రహం నింగిలోకి వెళ్లింది. అంతరిక్ష రంగంలోనే సంచలనాలకు కేరాఫ్ గా మారింది ఇస్రో. తక్కువ ఖర్చుతో ఇప్పటికే ఎన్నో ప్రయోగాలు చేసి విజయవంతమైన ఇస్రో ఇప్పుడు జీఎస్ఎల్ వీ ఎఫ్ 16 రాకెట్ ను రోదసిలోకి పంపింది.
అమెరికా శాస్త్రవేత్తలతో పాటు ఇస్రోలోని అన్ని సెంటర్ల డైరెక్టర్లు ప్రయోగ ఏర్పాట్లు చేశారు. నాసా, ఇస్రో సంయుక్తంగా అభివృద్ధి చేసిన నిసార్.. ప్రపంచంలోనే మొట్టమొదటి డ్యూయల్ ఫ్రీక్వెన్సీ రాడార్ తో భూమిని పరిశీలించే ఉపగ్రహం. ఎల్ బ్యాండ్, ఎస్ బ్యాండ్, SAR టెక్నాలజీని ఉపయోగించి రాడార్ పల్స్ ను భూమికి పంపించనుంది.
అంతరిక్షం నుంచి భూమిని అణువణువు 12 రోజులకు ఒకసారి స్కాన్ చేయనుంది ‘నిసార్’ ఉపగ్రహం. నిసార్ ఉపగ్రహం బరువు 2,392 కేజీలు. అడవులు, మైదానాలు, కొండలు, పర్వతాలు, పంటలు, జల వనరులు, మంచు ప్రాంతాలు అన్నింటిని నిసార్ ఉపగ్రహం అధ్యయనం చేయనుంది. ఇందులో నాసాకి చెందిన ఎల్-బ్యాండ్, ఇస్రోకి చెందిన ఎస్-బ్యాండ్ రాడార్లను శాస్త్రవేత్తలు అమర్చారు.
ఈ ప్రాజెక్టు వ్యయం దాదాపు రూ.12,525 కోట్లు. నిసార్ ఉపగ్రహాన్ని 747 కిలోమీటర్ల ఎత్తులోని సూర్య అనువర్తిత కక్ష్యలోకి పంపుతారు. 90 రోజుల తర్వాత పని ప్రారంభిస్తుంది. రాత్రి, పగలు తేడా లేకుండా అన్ని రకాల వాతావరణ పరిస్థితుల్లో ఫోటోలను తీసే సామర్థ్యంతో డిజైన్ చేశారు. నిసార్ ఉపగ్రహం ప్రాంతాల వారీగా భూమిని పరిశీలన చేస్తుంది. ఒకసారి 240 కిలోమీటర్ల వెడల్పున్న ప్రదేశాన్ని పరిశీలిస్తుంది. దాని చిత్రాల స్పష్టత 10 మీటర్లుగా ఉంది. 97 నిమిషాల కోసారి భూమిని చుట్టేస్తుంది.
* ధ్రువ ప్రాంతాల్లో మంచు ఫలకాల కదలికలు, కరుగుదలను నిసార్ పరిశీలించగలదు.
* అగ్నిపర్వత విస్పోటాలు, కొండ చరియలు విరిగిపడటం వంటి విపత్తులను కూడా పరిశీలిస్తుంది.
* తుపాన్లు, సునామీలు, వరదలు, కార్చిచ్చు వంటి విపత్తుల సమయంలో సహాయ చర్యలకు సాయపడుతుంది.
* నిర్దిష్ట ప్రాంతంలో నేల ఒక అంగుళం కుంగినా గుర్తించగలదు.
* వంతెనలు, డ్యామ్ లలో లోపాలనూ పసిగడుతుంది.
* అటవీ విస్తీర్ణం, పచ్చదనంలో మార్పులు, పంటల ఎదుగుదల, నేలలో తేమ పరిశీలన ద్వారా ఉపరితల జలాలు, చిత్తడి నేలల్లో మార్పులను ఈ నిసార్ ఉపగ్రహం పసిగడుతుంది.
* నీటి వనరుల నిర్వహణకు ఈ ఉపగ్రహం దోహపడుతుంది. తద్వారా రైతులు సరైన నిర్ణయాలు తీసుకోవడానికి వీలు కల్పిస్తుంది.
