Kerala High Court సంచలన తీర్పు..అలా ఎక్కడ టచ్ చేసినా రేపే

లైంగిక‌దాడి కేసులో గురువారం కేర‌ళ హైకోర్టు సంచ‌ల‌న తీర్పు ఇచ్చింది.

Hc

Kerala High Court లైంగిక‌దాడి కేసులో గురువారం కేర‌ళ హైకోర్టు సంచ‌ల‌న తీర్పు ఇచ్చింది. పురుషాంగంతో మ‌హిళ శ‌రీరాన్ని ఎక్క‌డ ట‌చ్ చేసినా అది రేప్ కింద‌కే వ‌స్తుంద‌ని కోర్టు స్ప‌ష్టం చేసింది. అంగప్రవేశం జరక్కపోయినా అత్యాచారంగానే పరిగణించాల్సి ఉంటుందని తీర్పునిచ్చింది.

ఆరు నెలల క్రితం జరిగిన 11 ఏళ్ల బాలికపై అత్యాచారం కేసులో..అంగప్రవేశం జరగనందున దాన్ని అత్యాచారంగా పరిగణించరాదని కోరుతూ నిందితుడు హైకోర్టును ఆశ్రయించాడు. తాను లైంగిక‌దాడికి పాల్ప‌డ‌లేద‌ని, పురుషాంగం బాలిక తొడలకు మాత్రమే తగిలిందని, అది ఎలా లైంగిక‌దాడి అవుతుంద‌ని నిందితుడు పిటిషన్ లో పేర్కొన్నాడు. దీనిపై విచారణ జరిపిన కేరళ హైకోర్టు..స్త్రీ శరీరంలోని ఏ అవయవంలోకైనా చొచ్చుకుపోడానికి చేసే ఎలాంటి ప్రయత్నాన్నైనా అత్యాచారంగానే పరిగణించాల్సి వస్తుందని స్పష్టం చేసింది. నిందితుడు తన పురుషాంగాన్ని బాధితురాలి తొడలపై రుద్దడం ద్వారా సంతృప్తి పొందినా అత్యాచారమేనని జస్టిస్‌ కె.వినోద్‌ చంద్రన్‌, జియాద్‌ రహ్మాన్‌లతో కూడి ధర్మాసనం పేర్కొంది.

కాగా,నిందితుడు బాధితురాలికి అనేకసార్లు పోర్న్ వీడియోలు చూపించి అసభ్యంగా ప్రవర్తించేవాడని, ఆమె జననేంద్రియాలను తాకడానికి ప్రయత్నించేవాడని పబ్లిక్ ప్రాసిక్యూటర్ కోర్టుకు తెలిపారు. ఈ విషయం ఇంట్లో చెబితే తీవ్ర పరిణామాలుంటాయని బాలికను హెచ్చరించేవాడని తెలిపారు.

అయితే నిందితుడి తరుపున న్యాయవాది వాదనలు వినిపిస్తూ.. సెక్షన్ 375 ప్రకారం కేసులు నమోదు చేశారని, అంగప్రవేశం జరిగితేనే ఇలాంటి కేసులు పెట్టాలని అన్నారు. భారత శిక్షాస్మృతిలో అత్యాచారానికి ప్రత్యేక నిర్వచనం ఉందని ఆయన చేసిన వ్యాఖ్యలను హైకోర్టు తోసిపుచ్చింది. జననాంగం, మూత్రనాళం, నోరు వంటి వాటినే కాకుండా ఇతర భాగాలపై కూడా పురుషాంగంతో ఎలాంటి దాడి చేసినా అది లైంగిక దాడిగానే పరిగణించాలని సెక్షన్ 375(C) చదివితే తెలుస్తుందని న్యాయవాదికి చురకలు అంటించింది. ఈ విషయంలో న్యాయస్థానాలకు విచక్షణాధికారాలు ఉన్నాయని వ్యాఖ్యానించింది. నిందితుడికి దిగువ కోర్టు విధించిన జీవిత ఖైదును యథాతథంగా అమలు చేయాలని ఆదేశిస్తూ హైకోర్టు తీర్పునిచ్చింది.