Putin India Tour: వెల్కమ్ ఫ్రెండ్.. ప్రోటోకాల్ను బ్రేక్ చేసి మరీ.. పుతిన్కు మోదీ ఘన స్వాగతం
భారత్-రష్యా 23వ వార్షిక శిఖరాగ్ర భేటీలో భాగంగా మోదీతో ఆయన సమావేశం కానున్నారు.
- Published By: 10TV Digital Team ,Published On : December 4, 2025 / 07:35 PM IST
Putin India Tour: రష్యా అధ్యక్షుడు వ్లాదిమిర్ పుతిన్ భారత్ చేరుకున్నారు. ఢిల్లీలో ఆయన ల్యాండ్ అయ్యారు. పాలం ఎయిర్ఫోర్స్ స్టేషన్లో దిగిన పుతిన్ కు భారత ప్రధాని మోదీ స్వయంగా ఘన స్వాగతం పలికారు. పాలం ఎయిర్ పోర్టులో పుతిన్ విమానం నుంచి కిందకు దిగగానే.. ప్రధాని మోదీ తన సెక్యూరిటీ ప్రోటోకాల్ ను పక్కన పెట్టి మరీ.. పుతిన్ దగ్గరికి వెళ్లి స్వయంగా వెల్ కమ్ చెప్పడం విశేషం.
పుతిన్ ను భారత్ కు ఫ్రెండ్ గా భావిస్తారు. అలాంటి వ్యక్తి కోసం ప్రధాని మోదీ ప్రోటోకాల్ ను సైతం బ్రేక్ చేశారు. కాగా, నాలుగేళ్ల తర్వాత పుతిన్ భారత్ వచ్చారు. రష్యా-యుక్రెయిన్ యుద్ధం ప్రారంభమైన తర్వాత పుతిన్ ఇండియా రావడం ఇదే తొలిసారి. భారత్-రష్యా 23వ వార్షిక శిఖరాగ్ర భేటీలో భాగంగా మోదీతో ఆయన సమావేశం కానున్నారు.
భారత్తో సంబంధాలు, సహకారాన్ని మరింత పెంపొందించుకోవడానికి రష్యా ఎదురుచూస్తోందని పుతిన్ ఇదివరకే స్పష్టం చేశారు. ఇంధనం, పరిశ్రమలు, అంతరిక్షం, వ్యవసాయం తదితర రంగాల్లో ఉమ్మడి ప్రాజెక్టులు పూర్తి చేసుకోవడమే లక్ష్యంగా ఇరు దేశాలు చర్యలు తీసుకుంటున్నట్లు వివరించారు. భారత్ నుంచి దిగుమతులు మరింత పెంచుకునే అంశంపైనా చర్చలు జరపనున్నట్లు సమాచారం.
భారత్-రష్యా 23వ వార్షిక సదస్సు కోసం పుతిన్ వచ్చారు. ఈ పర్యటనలో భారత్ తో పలు కీలక ఒప్పందాలు చేసుకోనున్నారు. ఇరు దేశాల మధ్య మరింత మెరుగైన సంబంధాలు నెలకొల్పేందుకు పుతిన్ టూర్ దోహదపడనుంది.
పుతిన్ రాక సందర్భంగా ఇప్పటికే రష్యా సెక్యూరిటీ భారత్ చేరుకుంది. భారత్ కూడా ఎన్ఎస్జీని రంగంలోకి దించింది. ఐదు అంచెల పటిష్ఠ భద్రతా వ్యవస్థను ఏర్పాటు చేసింది. ప్రపంచంలోనే అత్యంత సంపన్నుడిగా పేరుగాంచిన హైదరాబాద్ చివరి నిజాం మీర్ ఉస్మాన్ అలీ ఖాన్కు చెందిన హైదరాబాద్ హౌస్లో పుతిన్ బస చేయనున్నారు. 1 అశోక్ రోడ్లో ఉన్న ఈ చారిత్రక భవనాన్ని.. ప్రస్తుతం ప్రధానమంత్రి స్టేట్ గెస్ట్ హౌస్గా ఉపయోగిస్తున్నారు. ప్రపంచ నాయకులకు ఆతిథ్యం ఇస్తూ భారత్కు గర్వకారణంగా నిలుస్తోంది హైదరాబాద్ హౌస్.
ఇక విదేశీ పర్యటనల్లో పుతిన్ చుట్టూ కఠినమైన భద్రతా ప్రొటోకాల్ ఉంటుంది. పుతిన్ తీసుకునే ఆహారంలో విష పదార్థాలేమైనా కలిశాయా అని గుర్తించేందుకు విదేశాల్లో ఆయన వెంట వ్యక్తిగత ప్రయోగశాల ఎప్పుడూ ఉంటుంది. విదేశాల్లో హోటల్ స్టాఫ్ సేవలను ఆయన వాడుకోరు. ఆయన కోసం రష్యా నుంచే చెఫ్లు, హౌస్ కీపింగ్ సిబ్బంది వస్తారు.
Also Read: 19 ఇళ్లు, 700 కార్లు, 58 విమానాలు.. పుతిన్ ఆస్తుల చిట్టా.. చూస్తే మైండ్ బ్లాంక్
