బాదుడులో సెహ్వాగ్, నిలకడలో కోహ్లి.. వరల్డ్‌కప్‌లో దుమ్ము రేపుతున్న 16ఏళ్ల షెఫాలీ వర్మ
- Published By: veegamteam ,Published On : March 1, 2020 / 12:24 AM IST
సింగిల్స్‌ అంటే నో ఇంట్రెస్ట్.. బంతిని బాదితే బౌండరీ.. షాట్ కొడితే సిక్సర్ .. టీమ్ విక్టరీల్లో మేజర్ రోల్.. ఏజ్‌ మాత్రం జస్ట్‌ సిక్స్‌టీన్.. స్ట్రెయిట్‌గా చెప్పాలంటే.. లేడీ సెహ్వాగ్.. ఇంత ఇంట్రడక్షన్ ఇస్తోంది ఎవరికో తెలుసా… షెఫాలీ వర్మ. వరల్డ్‌కప్‌లో టీమిండియా సెమీస్ చేరిదంటే.. అది కచ్చితంగా షెఫాలీ ఆట వల్లే.. స్ట్రైక్ రేట్‌తో కొత్త రికార్డును సృష్టిస్తూ..అందరూ ఆహా.. అనుకునేలా ఆడుతోంది షెఫాలీ.
సెహ్వాగ్ బాటలో షెఫాలీ:
పవర్‌ ప్లేలో మెరుపు షాట్లతో అద్భుతమైన ఆరంభం ఇస్తే టీమ్ లో మిగిలిన ఆటగాళ్లపై ప్రెజర్ తగ్గుతుంది.. మరోవైపు ప్రత్యర్థి బౌలర్లపై ఒత్తిడి పెరుగుతుంది.. ఇది సెహ్వాగ్ స్టైల్. అయితే ఇదే ఫార్మలాను లేడీ సెహ్వాగ్ గా పేరు తెచ్చుకున్న షెఫాలీ వర్మ కూడా పాటిస్తోంది. క్రీజ్ లోకి అడుగు పెట్టినప్పటి నుంచి షెఫాలీ దండయాత్ర మొదలౌతుంది. చెత్త బంతి పడిందా చితకబాదుడు తప్పదు. షెఫాలీ క్రీజ్ లో ఉంటే.. కుదిరితే సిక్స్, లేదంటే ఫోర్.. ఒవర్ కు బౌండరీ మాత్రం పక్కా.
నిలకడలో కోహ్లి:
భారత మహిళా క్రికెట్ టీంలో 16ఏళ్ల షెఫాలీ వర్మకు క్రికెట్ అభిమానులు ఫిదా అవుతున్నారు. మహిళల టీ20 వరల్డ్ కప్ లో ప్రతి మ్యాచ్ లో అదరగొడుతోంది షెఫాలీ.. ఇప్పటి వరకూ ఆడిన నాలుగు మ్యాచుల్లోనూ నిలకడగా రాణించి సెమీస్ లోకి భారత్ వెళ్లడంలో కీలక పాత్ర పోషించింది. ఆస్ట్రేలియాపై 29, బంగ్లాదేశ్ పై 39, న్యూజిలాండ్ పై 46, శ్రీలంకపై 47 పరుగులు చేసి నిలకడగా రాణిస్తూ కోహ్లిని గుర్తు చేస్తోంది.. ఇక ఆడిన నాలుగు మ్యాచుల్లో 100 బంతుల్లో 161 పరుగులు చేసింది.
కూతురి ద్వారా కలను సాకారం చేసుకున్న తండ్రి:
ప్రపంచకప్‌లో ఇప్పటి వరకూ 18 ఫోర్లు, 9 సిక్సర్లు బాదింది షెఫాలీ వర్మ.. అంతేకాదు టీ20 ప్రపంచకప్‌లో అత్యధిక స్ట్రైక్ రేట్ నమోదు చేసిన బ్యాట్స్‌ ఉమన్‌గా రికార్డులకెక్కింది. రెండు మ్యాన్ ఆఫ్ ది మ్యాచ్ అవార్డులను కూడా అందుకొంది. షెఫాలీ నాన్న సంజీవ్ వర్మ కూడా క్రికెటరే. కానీ టీమిండియాకు ఆడాలన్న అతని కల నెరవేరలేదు. అందుకే.. తన కలను.. తన కూతురి ద్వారా సాకారం చేసుకున్నాడు. చిన్నప్పటి నుంచే షెఫాలీ నాన్న ఆలోచనలకు తగ్గట్టు ఎదిగింది. మిగిలిన క్రికెటర్ల కన్నా భిన్నంగా తన కూతురు కావాలన్న కోరికతో.. హార్డ్ హిట్టర్ గా షఫాలీ మారింది. దీని కోసం ఎంతో కష్టపడింది.. అబ్బాయిలతో క్రికెట్ ఆడి ఆటపై గ్రిప్‌ సంపాదించింది.
స్ఫూర్తి ప్రదాత సచిన్:
విధ్వంసకర ఆటతో లేడీ సెహ్వాగ్‌గా గుర్తింపు పొందినా.. షెఫాలీ క్రికెట్‌లోకి రావడానికి మాత్రం సచినే స్పూర్తంట.. అతనిలా బౌలర్లపై ఆధిపత్యం చలాయించడం ఈ టీనేజ్ సెన్సేషన్‌కు చాలా ఇష్టం. మరి ఈ చిచ్చర పిడుగు సెమీస్ లో కూడా కుమ్మేసిందంటే.. ఇండియా ఫైనల్స్‌కు వెళ్లడం మాత్రం ఖాయమే.
