IND Vs AUS: భారత్ – ఆస్ట్రేలియా మధ్య పిక్ బాల్ టెస్ట్.. టాస్ కీలకం కానుందా.. ఎందుకంటే?
భారత్ - ఆస్ట్రేలియా మధ్య ఒకేఒక్క పిక్ బాల్ టెస్టు జరిగింది. ఇందులో భారత్ జట్టు ఎనిమిది వికెట్ల తేడాతో ఓడిపోయింది.
- Published By: 10TV Digital Team ,Published On : December 6, 2024 / 08:42 AM IST
Pink Ball Test
IND Vs AUS Day Night Test: బోర్డర్ గావస్కర్ ట్రోఫీలో భాగంగా రసవత్తర సమరానికి వేళైంది. ఆస్ట్రేలియా, భారత్ జట్ల మధ్య ఐదు టెస్టు మ్యాచ్ ల సిరీస్ లో భాగంగా రెండో టెస్టు మ్యాచ్ ఇవాళ ఆడిలైడ్ వేదికగా ప్రారంభం కానుంది. గులాబీ బంతి (పింక్ బాల్) తో జరిగే ఈ డేనైట్ టస్టులో టీమిండియా ఉత్సాహంతో బరిలోకి దిగుతోంది. సొంతగడ్డపై తొలి టెస్టులో ఘోర పరాభవాన్ని ఎదుర్కొన్న ఆస్ట్రేలియా జట్టు.. రెండో టెస్టులో విజయం సాధించాలన్న పట్టుదలతో ఉంది. ఈ క్రమంలో ఈ మ్యాచ్ రసవత్తరంగా సాగే అవకాశం ఉంది. ఇదిలాఉంటే.. డేనైట్ పోరు భారత బ్యాటర్లకు భిన్నమైన సవాలును విసరనుంది. గులాబీ బంతి ద్వారా వచ్చే అదనపు సీమ్ మూమెంట్ వారిని పరీక్షించనుంది. స్వదేశంలో ఇప్పటి వరకు జరిగిన 12 డేనైట్ టెస్టుల్లో ఒకేఒక్క ఓటమి చవిచూసిన కంగారు జట్టు.. తమ పదునైన పేస్ దళంతో భారత్ ను బెంబేలెత్తించాలని చూస్తోంది.
భారత్ – ఆస్ట్రేలియా మధ్య ఒకేఒక్క పిక్ బాల్ టెస్టు జరిగింది. ఇందులో భారత్ జట్టు ఎనిమిది వికెట్ల తేడాతో ఓడిపోయింది. ఈ మ్యాచ్ 2020 డిసెంబర్ లో ఆడిలైడ్ లో జరిగింది. ఇప్పుడు రెండు జట్ల మధ్య ఈ రెండో పింక్ బాల్ టెస్టు జరగనుంది. ఇవాళ ఉదయం 9.30గంటలకు మ్యాచ్ ప్రారంభం కానుండగా.. టాస్ కీలకంగా మారనుంది. ఆడిలైడ్ లో 82 టెస్టుల్లో టాస్ గెలిచిన జట్లు 72 సార్లు బ్యాటింగ్ ఎంచుకున్నాయి. 33సార్లు గెలిచాయి. రెండుసార్లు మాత్రమే టాస్ గెలిచి బౌలింగ్ ఎంచుకున్న జట్లు ఇక్కడ విజయం సాధించాయి. డేనైట్ టెస్టుల్లో టాస్ గెలిచిన జట్టు ఏడు మ్యాచ్ లలో మూడు నెగ్గింది. ఇందులో ఆరు సందర్భాల్లో టాస్ గెలిచిన జట్టు బౌలింగ్ ఎంచుకుంది. మరోవైపు ఆడిలైడ్ పిచ్ సమతూకంగా ఉంటుందని, బౌలర్లతోపాటు బ్యాటర్లకూ పిచ్ నుంచి సహకారం లభిస్తుందని క్యూరేటర్ డామియన్ హో చెప్పాడు.
Also Read: AUS-W vs IND-W : భార‌త్‌కు షాక్‌.. తొలి వ‌న్డేలో ఆస్ట్రేలియా ఘ‌న విజయం..
♦ ఆస్ట్రేలియా వర్సెస్ భారత్ జట్ల మధ్య ఆడిలైడ్ ఓవల్ లో ఇవాళ్టి నుంచి 10వ తేదీ వరకు డే నైట్ మ్యాచ్ జరగనుంది.
♦ ఉదయం 9.30 గంటలకు (ఆస్ట్రేలియా కాలమానం ప్రకారం మధ్యాహ్నం 2.30) మ్యాచ్ ప్రారంభం అవుతుంది.
♦ భారత్ వర్సెస్ ఆస్ట్రేలియా మధ్య మొత్తం 28 టెస్టు సిరీస్ లు జరిగాయి. భారత్ 11, ఆస్ట్రేలియా 12 సిరీస్ లలో విజయం సాధించగా.. ఐదు సిరీస్ లు డ్రా అయ్యాయి.
♦ ఆస్ట్రేలియాలో భారత్ జట్టు మొత్తం 13 టెస్టు సిరీస్ లలో ఆడింది. ఇందులో భారత్ జట్టు రెండు సిరీస్ లు గెలుచుకోగా, ఆస్ట్రేలియా ఎనిమిది సార్లు విజయం సాధించింది. మూడు టెస్టు సిరీస్ లు డ్రా అయ్యాయి.
♦ ఇరు జట్ల మధ్య మొత్తం 108 టెస్టు మ్యాచ్ లు జరగ్గా.. భారత్ 33, ఆస్ట్రేలియా 45 మ్యాచ్ లలో విజయం సాధించాయి. 29 మ్యాచ్ లు డ్రా అయ్యాయి.
