చెలరేగిన స్టార్క్‌, సాల్ట్.. లక్నో సూపర్ జెయింట్స్‌పై కేకేఆర్ భారీ గెలుపు

బౌలింగ్‌లో స్టార్క్, బ్యాటింగ్‌లో ఫిలిప్ సాల్ట్ చెలరేగడంతో ఐపీఎల్ 2024లో కోల్‌కతా నైట్ రైడర్స్ మరో విజయాన్ని అందుకుంది.

KKR vs LSG IPL 2024: బౌలింగ్‌లో స్టార్క్, బ్యాటింగ్‌లో ఫిలిప్ సాల్ట్ చెలరేగడంతో ఐపీఎల్ 2024లో కోల్‌కతా నైట్ రైడర్స్ మరో విజయాన్ని అందుకుంది. ఈడెన్ గార్డెన్స్ వేదికగా లక్నో సూపర్ జెయింట్స్‌తో జరిగిన మ్యాచ్‌లో కేకేఆర్ సునాయాస విజయాన్ని సాధించింది. 8 వికెట్ల తేడాతో లక్నోను చిత్తుగా ఓడించింది. లక్నో సూపర్ జెయింట్స్‌ విధించిన 162 పరుగుల లక్ష్యాన్ని 15.4 ఓవర్లలో 2 వికెట్లు కోల్పోయి ఛేదించింది. ఫిలిప్ సాల్ట్ హాఫ్ సెంచరీతో అదరగొట్టాడు. 47 బంతుల్లో 14 ఫోర్లు, 3 సిక్సర్లతో 89 పరుగులు చేసి నాటౌట్ గా నిలిచాడు. సునీల్ నరైన్(6), రఘువంశీ(7) తక్కువ స్కోరుకే అవుటయ్యారు. కేకేఆర్ కెప్టెన్ శ్రేయస్ అయ్యర్ 38 బంతుల్లో 6 ఫోర్లతో 38 పరుగులతో అజేయంగా నిలిచాడు.

టాస్ ఓడి ముందుగా బ్యాటింగ్ చేసిన లక్నో టీమ్ నిర్ణీత 20 ఓవర్లలో 7 వికెట్లు కోల్పోయి 161 పరుగులు చేసింది. ఓపెన్ డీకాక్(10) తక్కవ స్కోరుకే అవుటకావడం, దీపక్ హుడా(8) విఫలకావడంతో కెప్టెన్ కేఎల్ రాహుల్ బ్యాటింగ్ భారాన్ని తన భుజాలపై వేసుకున్నాడు. 27 బంతుల్లో 3 ఫోర్లు, 2 సిక్సర్లతో 39 పరుగులు చేసి మూడో వికెట్ గా అవుటయ్యాడు. పూరన్ మరోసారి జట్టును ఆదుకున్నాడు. 32 బంతుల్లో 2 ఫోర్లు, 4 సిక్సర్లతో 45 పరుగులు చేసి టాప్ స్కోరర్ గా నిలిచాడు. ఆయుష్ బదోని 29, స్టోయినిస్ 10 పరుగులు చేశారు.

Also Read: టీ20ల్లో 300 సిక్స‌ర్లు కొట్టిన కేఎల్ రాహుల్‌.. ఐదో భార‌త బ్యాట‌ర్‌గా..

ఎట్టకేలకు రాణించిన స్టార్క్
ఐపీఎల్ వేలంలో రూ.24.75 కోట్ల భారీ మొత్తాన్ని వెచ్చించి కేకేఆర్ దక్కించుకున్న ఆస్ట్రేలియా స్టార్‌ పేస‌ర్ మిచెల్ స్టార్క్‌ ఎట్టకేలకు సత్తా చాటాడు. ఈ రోజు మ్యాచ్ లో 3 వికెట్లు పడగొట్టాడు. వైభవ్ అరోరా, సునీల్ నరైన్, వరుణ్ చక్రవర్తి, రసెల్ తలో వికెట్ తీశారు.

Also Read: సీఎస్‌కేకు భారీ షాక్‌.. ముంబై ఇండియ‌న్స్‌తో మ్యాచ్‌కు స్టార్ ప్లేయ‌ర్ దూరం..