Mitchell Santner : నాలుగో టీ20 మ్యాచ్‌లో భార‌త్ పై భారీ విజ‌యం.. న్యూజిలాండ్‌ కెప్టెన్ మిచెల్ సాంట్న‌ర్ కీల‌క వ్యాఖ్య‌లు..

నాలుగో టీ20 మ్యాచ్‌లో భార‌త్ పై విజ‌యం సాధించ‌డం ప‌ట్ల న్యూజిలాండ్ కెప్టెన్ మిచెల్ సాంట్న‌ర్ (Mitchell Santner) ఆనందాన్ని వ్య‌క్తం చేశాడు.

Mitchell Santner comments after New Zealand beat India in 4th T20 match

Mitchell Santner : ఆక్లాండ్ వేదిక‌గా భార‌త్‌తో జ‌రిగిన నాలుగో టీ20 మ్యాచ్‌లో 87 ప‌రుగుల తేడాతో న్యూజిలాండ్ ఘ‌న విజ‌యాన్ని సాధించింది. దీనిపై ఆ జ‌ట్టు కెప్టెన్ మిచెల్ సాంట్న‌ర్ ఆనందాన్ని వ్య‌క్తం చేశాడు. 260 ప‌రుగులు మంచి స్కోరే అయిన‌ప్ప‌టికి కూడా భార‌త వంటి బ‌ల‌మైన బ్యాట‌ర్లు ఉన్న జ‌ట్టుపై గెల‌వాలంటే బౌలింగ్ కూడా అద్భుతంగా చేయాల‌న్నాడు. ఈ రోజు త‌మ బౌల‌ర్లు అదే చేశార‌న్నాడు.

ఈ మ్యాచ్‌లో మొద‌ట బ్యాటింగ్ చేసిన కివీస్‌ నిర్ణీత 20 ఓవ‌ర్ల‌లో 7 వికెట్ల న‌ష్టానికి 259 ప‌రుగులు చేసింది. న్యూజిలాండ్ బ్యాట‌ర్ల‌లో గ్లెన్ ఫిలిప్స్ (107; 49 బంతుల్లో 6 ఫోర్లు, 10 సిక్స‌ర్లు) సెంచ‌రీ, మైఖేల్ బ్రేస్‌వెల్ (65; 25 బంతుల్లో 4 ఫోర్లు, 6 సిక్స‌ర్లు) హాఫ్ సెంచ‌రీల‌తో చెల‌రేగారు. టీమ్ఇండియా బౌల‌ర్ల‌లో మ‌యాంక్ యాద‌వ్ మూడు వికెట్లు, ప్రిన్స్ యాద‌వ్‌, అక్ష‌ర్ ప‌టేల్‌, అర్ష్‌దీప్ సింగ్, నితీశ్ కుమార్ రెడ్డి త‌లా ఓ వికెట్ తీశారు.

ఆ త‌రువాత 260 ప‌రుగుల భారీ ల‌క్ష్య ఛేద‌న‌లో టీమ్ఇండియా నిర్ణీత 20 ఓవ‌ర్ల‌లో 9 వికెట్ల న‌ష్టానికి 172 ప‌రుగుల‌కే ప‌రిమిత‌మైంది. టీమ్ఇండియా బ్యాట‌ర్ల‌లో తిల‌క్ శ‌ర్మ (35; 35 బంతుల్లో 1 ఫోర్‌, 3 సిక్స‌ర్లు), న‌మ‌న్ ధీర్ (28; 13 బంతుల్లో 2 ఫోర్లు, 2 సిక్స‌ర్లు) లు ప‌ర్వాలేద‌నిపించారు. న్యూజిలాండ్ బౌల‌ర్ల‌లో జాకబ్ డఫీ నాలుగు, కెప్టెన్ మిచెల్ సాంట్న‌ర్, మాథ్యూ ఫిషర్ లు చెరో రెండు వికెట్లు ప‌డ‌గొట్టారు. ఆడ‌మ్ మిల్నేఓ వికెట్ తీశాడు.

ఈ రోజు మా బౌల‌ర్లు అదే చేశారు..

నాలుగో టీ20 మ్యాచ్‌లో విజ‌యం సాధించ‌డం ప‌ట్ల మ్యాచ్ అనంత‌రం కివీస్ కెప్టెన్ మిచెల్ సాంట్న‌ర్ మాట్లాడుతూ సంతోషాన్ని వ్య‌క్తం చేశాడు. నిజ‌మే, మేము మరోసారి టాస్ ఓడిపోయాం. అయితే.. గాలి ప్రభావం వల్ల ఈరోజు రాత్రి మంచు ప్రభావం (Dew) అంతగా లేదు. 260 పరుగులు మంచి స్కోరే. కానీ ఇలాంటి బలమైన జట్టుపై గెలవాలంటే బౌలింగ్ కూడా అద్భుతంగా చేయాలి. మా బౌలర్లు ఈరోజు అదే చేశారు అని నేను భావిస్తున్నాను. అని మిచెల్ సాంట్న‌ర్ అన్నాడు.

పిచ్ స్వభావాన్ని మేము బాగా అర్థం చేసుకున్నాం. ప్రారంభంలో బంతులు వేగంగా దూసుకురావడాన్ని గమనించి, దానికి తగ్గట్టుగా సరైన లెంగ్త్‌లో బౌలింగ్ చేశాం. ఇక పవర్‌ప్లేలోనే వికెట్లు తీయడం చాలా కీలకం. ఇలాంటి పిచ్‌లపై బౌన్స్‌ను సరిగ్గా ఉపయోగించుకుంటే మనకు మంచి ఫలితాలు వస్తాయి. మేము ఎక్కువ మ్యాచ్‌లలో ఇలాంటి పరిస్థితులనే కోరుకుంటున్నాం. మా బౌలర్లు అద్భుతంగా బౌలింగ్ చేశారు.

బ్రేస్‌వెల్ ప్ర‌ద‌ర్శ‌న‌పై మాట్లాడుతూ.. అత‌డు క్రీజులోకి వచ్చినప్పటి నుంచే అద్భుతంగా ఆడాడు. అప్పటికే మేము మంచి స్థితిలో ఉన్నప్పటికీ, మొదటి బంతి నుంచే దూకుడుగా ఆడుతూ స్కోరును పెంచాడు. దీంతో 220 పరుగుల వద్ద ఆగిపోయే స్కోరు 260కి చేరుకుంది. గ్లెన్ కూడా మంచి ఇన్నింగ్స్ ఆడాడు. బ్రేస్‌వెల్ పరుగులు చేయడం చూడటం సంతోషంగా ఉంది. ఎందుకంటే అతను నెట్స్‌లో కూడా అద్భుతంగా బ్యాటింగ్ చేస్తున్నాడు.

మా బౌలింగ్ ప్రదర్శన పట్ల చాలా సంతోషంగా ఉన్నాను. ఇది బౌలింగ్ చేయడానికి కొంచెం కష్టమైన మైదానం. మేము సరైన లెంగ్త్‌లో బంతులు వేస్తూ ప్రత్యర్థి బ్యాటర్లను కష్టమైన షాట్లు ఆడేలా చేశాం. కొన్ని బంతులకు వారు షాట్లు ఆడే క్రమంలో క్యాచ్‌లు ఇచ్చారు. అయితే, గాలిలో బంతి దిశ మారడం వల్ల కొన్ని క్యాచ్‌లు జారిపోయాయి. నా క్యాచ్ మాత్రం పెద్దగా కష్టమైనది కాదు.

మొత్తంగా మా బౌలింగ్ చాలా బాగుంది. పవర్‌ప్లేలో బౌలింగ్‌ను ఎప్పటికప్పుడు మార్చుతూ, ఒక్కో బౌలర్‌తో ఒక ఓవర్ వేయించాం. బౌలర్లు వచ్చిన వెంటనే సరైన లైన్ అండ్ లెంగ్త్‌లో బౌలింగ్ చేయడం గొప్ప విషయం. ముఖ్యంగా డ‌ఫీ ప్రారంభంలోనే అద్భుతమైన హార్డ్ లెంగ్త్ బంతులు వేసి మంచి ఆరంభాన్ని అందించాడు. అని మిచెల్ సాంట్న‌ర్ తెలిపాడు.