ఎంఎస్ ధోని రికార్డును సమం చేసిన యంగ్ వికెట్ కీపర్ ధ్రువ్ జురెల్

ఒకే ఇన్నింగ్స్‌లో ఏకంగా 7 క్యాచ్‌లు అందుకుని.. 20 ఏళ్లుగా ఎంఎస్ ధోని పేరిట ఉన్న రికార్డును ఈక్వల్ చేశాడు.

Dhruv Jurel Equals MS Dhoni Record: టీమిండియా యంగ్ వికెట్ కీపర్ ధ్రువ్ జురెల్ అరుదైన ఘనత సాధించాడు. టీమిండియా మాజీ కెప్టెన్, లెజెండరీ స్టంపర్ ఎంఎస్ ధోని రికార్డును అతడు సమం దేశాడు. దేశవాళీ క్రికెట్ టోర్నమెంట్ దులీప్ ట్రోఫీలో అతడీ ఫీట్ రికార్డు చేశాడు. భారత్ A జట్టు తరపున అతడు ప్రస్తుతం ఆడుతున్నాడు. బెంగళూరులో భారత్ B జట్టుతో జరిగిన మ్యాచ్‌లో సెకెండ్ ఇన్నింగ్స్‌లో ఏకంగా 7 క్యాచ్‌లు అందుకుని.. 20 ఏళ్లుగా ధోని పేరిట ఉన్న రికార్డును ఈక్వల్ చేశాడు. 2004-05 దులీప్ ట్రోఫీలో ఈస్ట్ జోన్ తరపున ఆడిన ధోని.. సెంట్రల్ జోన్ తో జరిగిన మ్యాచ్‌లో ఏడు క్యాచ్‌లు పట్టి రికార్డు క్రియేట్ చేశాడు. ధోనిని దేవుడిలా భావించే ధ్రువ్ జురెల్ తాజాగా ఈ రికార్డును సమం చేయడం విశేషం.

కాగా, బెంగళూరు వేదికగా భారత్ B జట్టుతో జరిగిన మ్యాచ్‌లో ధ్రువ్ జురెల్ బ్యాటింగ్‌లో విఫలమయ్యాడు. తొలి ఇన్నింగ్స్‌లో కేవలం రెండు పరుగులే చేయగా.. సెకెండ్ ఇన్నింగ్స్‌లో డకౌటయ్యాడు. ఈ మ్యాచ్‌లో భారత్ B జట్టు 76 పరుగుల తేడాతో విజయం సాధించింది. తొలి ఇన్నింగ్స్‌లో భారత్ B టీమ్ 321, A టీమ్ 231 పరుగులు చేశాయి. ముషీర్ ఖాన్ భారీ సెంచరీ (181)తో B జట్టుకు భారీ స్కోరు అందించాడు. సెకెండ్ ఇన్నింగ్స్‌లో B టీమ్ 184, A టీమ్ 198 పరుగులు చేశాయి.

భారత్ A జట్టు బౌలర్ ఆకాశ్ దీప్ రెండు ఇన్నింగ్స్‌లోనూ కలిపి మొత్తం 9 వికెట్లు పడగొట్టాడు. ఖలీల్ అహ్మద్ 5, అవేశ్ ఖాన్ 3 వికెట్లు తీశాడు. భారత్ B జట్టు బౌలర్లలో ముకేశ్ కుమార్ 5, నవదీప్ షైనీ 5, యశ్ దయాల్ 4 వికెట్లు సాధించారు. సెంచరీ హీరో ముషీర్ ఖాన్ ప్లేయర్ ఆఫ్ ది మ్యాచ్ అవార్డు దక్కించుకున్నాడు.

Also Read : రిషబ్ పంత్ రీఎంట్రీ.. శ్రేయాస్‌కు షాకిచ్చిన బీసీసీఐ.. బంగ్లాదేశ్‌తో తొలి టెస్టుకు భారత్ జట్టు ఇదే