వృద్ధుల కొంపముంచుతున్న స్మార్ట్‌ఫోన్లు.. వారు కొత్తగా ఈ ఊబిలో ఎలా కూరుకుపోతున్నారంటే?

కొన్ని సందర్భాల్లో వృద్ధులు స్క్రీన్‌లో చూసే వీడియోలు, వచ్చే ఫార్వర్డ్‌లు నిజమని గట్టిగా నమ్ముతూ తప్పుడు సమాచారానికి గురై ఆరోగ్య, సామాజిక సమస్యలు ఎదుర్కొంటున్నారు.

Smartphone Addiction: స్మార్ట్‌ఫోన్ లేనిదే బతకలేని స్థితిలోకి వచ్చేశాం. అదో వ్యసనంగా మారిపోయింది. స్మార్ట్‌ఫోన్‌ను సరిగ్గా వాడితే ఎన్నో లాభాలు ఉంటాయి. అయితే, అవసరానికి మించి వాడేస్తుంటాం. ఉదయం నుంచి రాత్రి పడుకునే వారకు స్మార్ట్‌ఫోన్‌ పట్టుకునే కనపడుతుంటాం.

చాలా మంది కేవలం చార్జింగ్‌ పెట్టే సమయంలో మాత్రమే ఫోనుకి దూరంగా ఉంటారు. ఈ రేంజ్‌లో స్మార్ట్‌ఫోన్‌ను వాడేది కేవలం యువతేనని చాలా మంది అనుకుంటారు. ఇప్పుడు స్మార్ట్‌ఫోన్‌ వ్యసనం వృద్ధులను కూడా పట్టేసింది. స్మార్ట్‌ఫోన్, స్క్రీన్ అలవాటు వల్ల అనారోగ్య బారిన పడుతున్నవారిలో, మోసాలకు గురవుతున్న వారిలో కొత్తగా వృద్ధులు చేరుతున్నారు. (Smartphone Addiction)

చాలా మంది వృద్ధులు ఇప్పుడు స్మార్ట్‌ఫోన్ లేదా టాబ్లెట్ వాడుతున్నారు. గతంలో టీవీ చూసేందుకు మాత్రమే పరిమితమైన వీరు.. ఇప్పుడు ఫోన్లలో గంటల తరబడి బ్రౌజింగ్, వీడియోలు, సోషల్ మీడియా చూస్తున్నారు.

ఈ మార్పు ప్రతికూల ఫలితాలను ఇస్తోంది. వృద్ధుల్లో నిద్ర తగ్గడం, ఆందోళన పెరగడం, శారీరక చలనం తగ్గడం, సామాజిక దూరం పెరగడం, శరీర సమస్యలు వస్తున్నాయి.

కొన్ని సందర్భాల్లో వృద్ధులు స్క్రీన్‌లో చూసే వీడియోలు, వచ్చే ఫార్వర్డ్‌లు నిజమని గట్టిగా నమ్ముతూ తప్పుడు సమాచారానికి గురై ఆరోగ్య, సామాజిక సమస్యలు ఎదుర్కొంటున్నారు.

Also Read: పెరిగిన చలి తీవ్రత.. అనారోగ్యం బారిన పడుతున్న ప్రజలు.. ఈ టిప్స్ పాటిస్తే సరి..

కాలక్షేపం కోసం అలవాటు పడి..
వృద్ధులలో అధిక స్క్రీన్ సమయం ఆందోళనకరమని, కానీ, వృద్ధుల అంశాన్ని చాలామంది పట్టించుకోవడం లేదని మానసిక ఆరోగ్య నిపుణులు చెబుతున్నారు. ఎందుకంటే అధ్యయనాలు ఎక్కువగా పిల్లలు, యువతపైనే ఉంటాయని అంటున్నారు.

వృద్ధులకు సాధారణంగా అధిక సమయం దొరుకుతుంది. ఇంట్లో కాలక్షేపం కోసం స్క్రీన్ వినియోగానికి అలవాటు పడుతున్నారు. అధిక స్క్రీన్ వినియోగం వృద్ధుల్లో జీవనశైలి, ఆరోగ్య సమస్యలను మరింత పెంచుతుంది. నిద్ర తగ్గడం, ఒత్తిడి, వ్యాయామం లేకపోవడం, మేధో సామర్థ్యం తగ్గడం వంటివి జరుగుతాయి.

మరోవైపు, భయపెట్టే వీడియోలు, తప్పుడు వైద్య సలహాలు వంటి సంచలన కంటెంట్ ఆన్‌లైన్‌లో వ్యాప్తి చెందుతుంటాయి. ఇది వృద్ధులను ఎక్కువగా ప్రభావితం చేస్తోంది, ఇది ప్రమాదకరం.

స్మార్ట్‌ఫోన్, ఇంటర్నెట్ వాడకం వృద్ధుల్లో పెరుగుతున్న నేపథ్యంలో స్క్రీన్ అలవాటు ఇకపై కేవలం యువత సమస్య మాత్రమే కాదని నిపుణులు అంటున్నారు.

ఫోన్ వాడకాన్ని పూర్తిగా తప్పు అని అనలేం. అయితే, స్క్రీన్ సమయ పరిమితి, విరామాలు తీసుకోవడం, ఆఫ్‌లైన్ పనులను ప్రోత్సహించడం, శారీరక, సామాజిక కార్యకలాపాలతో సమతుల్యం పాటించాలి.

వృద్ధులను ఆఫ్‌లైన్ పనులు, కమ్యూనిటీ కార్యకలాపాలు, హాబీలలో పాల్గొనేలా కుటుంబ సభ్యులు ప్రోత్సహించాలి. కొన్ని సంకేతాలను గమనించాలి. రాత్రుళ్లు స్క్రీన్ చూస్తూ మేల్కొనడం, కళ్ల నొప్పి, తలనొప్పి, బంధువులు/స్నేహితులను కలిసే ఆసక్తి తగ్గడం, ఎక్కువగా మెసేజ్‌లు ఫార్వర్డ్ చేయడం, చిరాకు, వ్యక్తిగత శ్రద్ధ తగ్గడం వంటివి వృద్ధుల్లో కనపిస్తే కుటుంబ సభ్యులు వారిని అందులో నుంచి బయటకు తీసుకొచ్చేలా చేయాలి.

వృద్ధుల్లో డిజిటల్ అక్షరాస్యత పెంచాలి. ఆన్‌లైన్ కంటెంట్ ఎలా పనిచేస్తుందో అర్థం చేసుకునేలా చేయాలి. ఇంటర్నెట్/సోషల్ మీడియాలో కనిపించేది అంతా నిజం కాదని చెప్పాలి.