కొత్తగా వాహనం కొనుగోలు చేస్తున్నవారికి బిగ్ అలర్ట్.. రిజిస్ట్రేషన్ కోసం అలా చేయాల్సిన పనిలేదు..
రహదారి భద్రత చట్టంలో కేంద్ర ప్రభుత్వం వాహన దారులకు ఊరట కల్పించే అనేక అంశాలను పొందుపర్చింది. అందులో ఒకటి వాహనాలకు డీలర్ల (షోరూం) వద్దే రిజిస్ట్రేషన్ చేయడం.
- Published By: 10TV Digital Team ,Published On : August 3, 2025 / 10:26 AM IST
New vehicle
Vehicle Registration: కొత్తగా వాహనం కొనుగోలు చేస్తున్నారా.. అయితే, మీకు గుడ్‌న్యూస్. వాహన రిజిస్ట్రేషన్ కోసం ఇకపై స్లాట్ బుక్ చేసుకోవాల్సిన అవసరం లేదు. స్లాట్ కోసం రోజుల తరబడి నిరీక్షించాల్సిన అవసరం లేదు. ఎందుకంటే.. రవాణా శాఖ కీలక నిర్ణయం తీసుకుంది. వాహనం కొనుగోలు చేసిన వెంటనే అక్కడికక్కడే రిజిస్ట్రేషన్ చేసుకునే అవకాశాన్ని కల్పించబోతోంది. అయితే, ఈ ప్రక్రియ ఇంకా అమల్లోకి రాలేదు. త్వరలో అమల్లోకి రానుంది.
రహదారి భద్రత చట్టంలో కేంద్ర ప్రభుత్వం వాహన దారులకు ఊరట కల్పించే అనేక అంశాలను పొందుపర్చింది. అందులో ఒకటి వాహనాలకు డీలర్ల (షోరూం) వద్దే రిజిస్ట్రేషన్ చేయడం. ఇందుకు సంబంధించి 2016లోనే కేంద్రం మార్గదర్శకాలు జారీ చేసింది. ఈ మార్గదర్శకాలకు లోబడి ఆంధ్రప్రదేశ్ రాష్ట్రంతోపాటు మరికొన్ని రాష్ట్రాల్లో నూతన విధానం అందుబాటులోకి వచ్చింది. ఆయా రాష్ట్రాల్లో వాహనం కొనుగోలు చేసిన తరువాత డీలర్ల వద్దే వాహనాల శాశ్వత రిజిస్ట్రేషన్ ప్రక్రియ అందుబాటులో ఉంది. దీంతో ఆయా రాష్ట్రాల్లో అధ్యయనం చేసిన అధికారులు తెలంగాణలోనూ నూతన విధానం అందుబాటులోకి తెచ్చేందుకు సిద్ధమవుతున్నారు.
వాహనం కొనుగోలు చేసిన తరువాత.. వాహనాల రిజిస్ట్రేషన్ కోసం వాహనదారులు ఎదుర్కొంటున్న ఇబ్బందులకు స్వస్తి పలికేందుకు రవాణాశాఖ కసరత్తు చేస్తోంది. ఇందుకోసం డీలర్ వద్ద రిజిస్ట్రేషన్ పూర్తిచేసుకొనే విధానాన్ని అమల్లోకి తేనుంది. తద్వారా వాహనాల రిజిస్ట్రేషన్ సమయంలో ప్రాంతీయ రవాణా శాఖ కార్యాలయాల వద్ద కొనసాగుతున్న దళారీ వ్యవస్థకు అడ్డుకట్ట పడనుంది. మూడో వ్యక్తి ప్రమేయం లేకుండా వాహనదారులకు సేవలు అందనున్నాయి. ఎటువంటి ఇబ్బంది లేకుండా సులువుగా, తక్షణమే వాహన రిజిస్ట్రేషన్ ప్రక్రియను పూర్తి చేయొచ్చు.
డీలర్ల వద్ద వాహన రిజిస్ట్రేషన్‌కు సంబంధించి ఇప్పటికే రాష్ట్ర ప్రభుత్వానికి సమగ్ర నివేదిక అందజేసి.. అనుమతి కూడా పొందారు. ఈ విధానం ద్వారా వాహనదారులకు తిప్పలు తప్పడంతోపాటు అధికారులు, సిబ్బందికి పని ఒత్తిడి తగ్గుతుంది. ఈ విధానం అమల్లోకి వస్తే.. వాహన డీలర్ (షోరూం) వద్దనే అవసరమైన రుసుమును ప్రభుత్వానికి ఆన్‌లైన్లో చెల్లించి సులువుగా రిజిస్ట్రేషన్ చేసుకునే వీలు ఉంటుంది. డీలర్ వద్ద రిజిస్ట్రేషన్ పూర్తయిన తరువాత శాశ్వత రిజిస్ట్రేషన్ (పీఆర్) స్మార్ట్ కార్డు ప్రస్తుతం అందిస్తున్న తరహాలోనే పోస్టల్‌లో నేరుగా వాహనదారుడి ఇంటికి వస్తుంది. అయితే, ఈ విధానం వచ్చే ఏడాది జనవరి నుంచి అమల్లోకి వస్తుందని తెలుస్తోంది.
