Bandi Sanjay Arrest : బండి సంజయ్ అరెస్టుపై హైకోర్టులో హౌస్ మోషన్ పిటిషన్
కరీంనగర్ లోని ఆయన నివాసం వద్ద అర్ధరాత్రి బండి సంజయ్ ను అరెస్టు చేశారు. ఆయన్ను అరెస్టు చేసి యాదాద్రి జిల్లా బొమ్మలరామారం పోలీస్ స్టేషన్ కు తరలించారు.
- Published By: 10TV Digital Team ,Published On : April 5, 2023 / 09:54 AM IST
Bandi Sanjay Arrest (1)
Bandi Sanjay Arrest : పదో తరగతి ప్రశ్నాపత్రం లీక్ ఘటనలో తెలంగాణ బీజేపీ అధ్యక్షడు, ఎంపీ బండి సంజయ్ ను పోలీసులు అరెస్టు చేసిన విషయం తెలిసిందే. కరీంనగర్ లోని ఆయన నివాసం వద్ద అర్ధరాత్రి బండి సంజయ్ ను అరెస్టు చేశారు. ఆయన్ను అరెస్టు చేసిన పోలీసులు యాదాద్రి జిల్లా బొమ్మలరామారం పోలీస్ స్టేషన్ కు తరలించారు. అయితే, బండి సంజయ్ అరెస్టుపై హైకోర్టులో పిటిషన్ దాఖలు అయింది.
బీజేపీ లీగల్ సెల్ హైకోర్టులో హౌస్ మోషన్ పిటిషన్ దాఖలు చేసింది. 24 గంటల్లో బండి సంజయ్ ను కోర్టులో హాజరు పరిచే విధంగా ఆదేశాలు జారీ చేయాలని హెబియస్ కార్పస్ పిటిషన్ దాఖలు చేసింది. హైకోర్టు చీఫ్ జస్టిస్ ఉజ్జల్ భుయాన్ ఈ పిటిషన్ పై నిర్ణయం తీసుకునే అవకాశం ఉంది. ఈ పిటిషన్ ను అనుమతిస్తారా? లేదా ? పూర్తి క్లారిటీ వచ్చే అవకాశం ఉంది.
అరెస్టు సమయంలో కరీంనగర్ లోని బండి సంజయ్ నివాసం వద్ద భారీగా పోలీసులు మోహరించారు. అయితే కార్యకర్తలు అడ్డుకోవడానికి యత్నించడంతో ఉద్రిక్తత వాతావరణం నెలకొంది. బండి సంజయ్ ను ఎక్కడి తీసుకెళ్తున్నారో చెప్పాలని పోలీసులను బీజేపీ కార్యకర్తుల నిలదీశారు. అయితే సమాధానం చెప్పకుండా పోలీసులు ముందుకు వెళ్లారు. ఈ సందర్భంగా బండి సంజయ్ కు గాయమైంది. అర్ధగంటకు పైగా పోలీసులు, బీజేపీ కార్యకర్తలకు మధ్య తోపులాట జరిగింది.
బీజేపీ కార్యకర్తలు, పోలీసులకు మధ్య వాగ్వాదం నెలకొంది. తమ నాయకుడిని ఎందుకు అరెస్టు చేస్తున్నారో చెప్పాలంటూ బీజేపీ కార్యకర్తుల సీఐ దామోదర్ కాళ్లు మొక్కారు. 151 సీఆర్ పీసీ కింద బండి సంజయ్ కు నోటీసులు ఇచ్చినట్లు, ప్రివెంటివ్ అరెస్టు చేసినట్లుగా పోలీసులు తెలిపారు. మరోవైపు సంజయ్ ను తిమ్మాపూర్ మీదుగా తీసుకెళ్తుండగా మార్గంమధ్యలో పోలీసు వాహనం మోరాయించింది. దీంతో ఆయనను మరో వాహనంలో ఎక్కించారు. నల్గొండ జిల్లా బొమ్మలరామారం పోలీస్ స్టేషన్ కు ఆయనను తరలించారు.
పోలీస్ స్టేషన్ కు బీజేపీ కార్యకర్తలు, నాయకులు భారీగా తరలివస్తున్నారు. ఇక అర్ధరాత్రి వేళ తన ఇంట్లోకి చొరబడి తనను అక్రమంగా అరెస్టు చేయడాన్ని బండి సంజయ్ తీవ్రంగా పరిగణిస్తున్నట్లు చెప్పారు. ఈ విషయంపై లోక్ సభ స్పీకర్ కార్యాలయానికి ఆయన ఫిర్యాదు చేయనున్నారు. బండి సంజయ్ అరెస్టుకు నిరసనగా బీజేపీ కార్యకర్తలు కరీంనగర్ లో సీఎం కేసీఆర్ దిష్టిబొమ్మ దగ్ధం చేశారు. బండి సంజయ్ ను తక్షణమే విడుదల చేయాలని డిమాండ్ చేశారు.
బండి సంజయ్ ను అరెస్టు చేయడం పట్ల బీజేపీ నేతలు ఫైర్ అయ్యారు. ఏ కారణం లేకుండా తప్పుడు ఆరోపణలు చేసి బండి సంజయ్ ను అరెస్టు చేశారంటూ బీజేపీ తెలంగాణ ప్రధాన కార్యదర్శి గుజ్జుల ప్రేమేందర్ రెడ్డి మండిపడ్డారు. రాష్ట్ర ప్రభుత్వ దుర్మార్గాలను బండి సంజయ్ ధైర్యంగా ఎదుర్కొంటున్నారని చెప్పారు. బండి సంజయ్ అక్రమంగా అరెస్టు చేయడం అప్రజాస్వామికమని బీజేవైఎం రాష్ట్ర అధ్యక్షులు భాను ప్రకాశ్ అన్నారు. వెంటనే విడుదల చేసి క్షమాపణలు చెప్పాలని డిమాండ్ చేశారు.
10th Question Paper Leak: టెన్త్ పేపర్ లీకేజ్ ఘటనలో వెలుగులోకి కీలక విషయాలు..
మరోవైపు బండి సంజయ్ అరెస్టును బీజేపీ జాతీయ నాయకత్వం తీవ్రంగా పరిగణించింది. అవినీతిలో కూరుకుపోయిన బీఆర్ఎస్ నాయకత్వం.. పాలన చేతకాక బండి సంజయ్ ను అరెస్టు చేసిందని బీజేపీ జాతీయ సంస్థాగత ప్రధాన కార్యదర్శి బీఎల్ సంతోశ్ ట్వీట్ చేశారు. బీఆర్ఎస్ మునిగిపోయే నావ అని ఎద్దేవా చేశారు. బీఆర్ఎస్ కు రాజకీయ సమాధి అయ్యే రోజులు దగ్గర పడ్డాయన్నారు.
