వ్యాక్సిన్ తయారీకి అమెరికా యూనివర్సిటీతో మరో ఒప్పందం

Biological E company entered into an agreement  to manufacture the vaccine : కరోనా టీకా అభివృద్ధి చేయటానికి హైదరాబాద్‌కు చెందిన ప్రముఖ ఫార్మా సంస్థ బయోలాజికల్‌-ఈ, అమెరికాకు చెందిన ఓహియో యూనివర్సిటీతో భాగస్వామ్య ఒప్పందం కుదుర్చుకుంది. ఈ మేరకు మంగళవారం ఓ సంయుక్త ప్రకటన విడుదలైంది. ఇందులో భాగంగా ఓహియో యూనివర్సిటీ అభివృద్ధిచేసిన వ్యాక్సిన్‌ ‘ఆర్‌ఎంఈవీఎస్‌’ను బయోలాజికల్‌-ఈ తీసుకుంటుంది. దాని ఆధారంగా టీకా అభివృద్ధి, క్లినికల్‌ ట్రయల్స్‌, మార్కెటింగ్‌కు బాధ్యత వహిస్తుంది.

ఓహియో యూనివర్సిటీ కరోనా వైరస్‌ ఉపరితలంలోని స్పైక్‌ను (కొమ్ము) లక్ష్యంగా చేసుకొని రీకాంబినెంట్‌ మీజిల్స్‌ వైరసెస్‌ (ఆర్‌ఎంఈవీఎస్‌) విధానంలో వ్యాక్సిన్‌ను అభివృద్ధి చేసింది. దీనిని జంతువుల్లో పరీక్షించగా కొవిడ్‌-19 వైరస్‌కు వ్యతిరేకంగా ప్రతిరక్షకాలు ఉత్పత్తి అయినట్టు తేలింది. తాజా ఒప్పందం ప్రకారం.. బయోలాజికల్‌-ఈ సంస్థ ఈ వ్యాక్సిన్‌ క్యాండిడేట్‌ను ఉపయోగించి టీకాను అభివృద్ధి చేస్తుంది. మానవులపై ప్రయోగాలు నిర్వహిస్తుంది.



ఈ నేపథ్యంలో సంస్థ ఎండీ మహిమ దాట్ల స్పందిస్తూ ప్రజలకు సురక్షితమైన, సమర్థమైన వ్యాక్సిన్‌ను అందుబాటులోకి తెచ్చేందుకు తాము కట్టుబడి ఉన్నామని చెప్పారు. తాజా ఒప్పందం తమ పరిశోధనలకు సహకరిస్తుందని ఆమె పేర్కొన్నారు.