Cable Bridge: గుజరాత్‌లో కూలిన కేబుల్ బ్రిడ్జి.. పలువురికి గాయాలు
గుజరాత్‌లో కేబుల్ బ్రిడ్జి కూలిపోయింది. దీంతో పలువురు నదిలో పడిపోయారు. ఈ ఘటనలో చాలా మందికి గాయాలైనట్లు సమాచారం. ప్రమాదంపై పూర్తి వివరాలు తెలియాల్సి ఉంది.
- Published By: 10TV Digital Team ,Published On : October 30, 2022 / 07:42 PM IST
Cable Bridge: గుజరాత్‌లో ప్రమాదం చోటు చేసుకుంది. కేబుల్ బ్రిడ్జి కూలిపోవడంతో పలువురు సందర్శకులు నదిలో పడిపోయారు. ఈ ఘటన గుజరాత్, మోర్బి ప్రాంతంలోని మచ్చు నదిపై ఆదివారం సాయంత్రం జరిగింది. కేబుల్ బ్రిడ్జిపై ఆదివారం సాయంత్రం పలువురు సందర్శకులు సరదాగా తిరుగుతుండగా, ఉన్నట్లుండి బ్రిడ్జి కూలిపోయింది. దీంతో బ్రిడ్జిపై ఉన్న చాలా మంది నదిలో పడిపోయారు.
వెంటనే సమాచారం అందుకున్న స్థానికులు, అధికారులు సహాయక చర్యలు చేపట్టారు. ఈ ఘటనలో పలువురికి గాయాలైనట్లు సమాచారం. బాధితుల్ని రక్షించేందుకు అధికారులు ప్రయత్నిస్తున్నారు. భారీ ఎత్తున అంబులెన్సుల్ని ఏర్పాటు చేశారు. ఈ బ్రిడ్జి కొంతకాలంపాటు మూసి వేసి ఉంది. మరమ్మతుల తర్వాత ఐదు రోజుల క్రితమే బ్రిడ్జిని అధికారులు తిరిగి ప్రారంభించారు. బ్రిడ్జి నిర్మాణంలో లోపాల వల్లే ఈ ప్రమాదం జరిగినట్లు తెలుస్తోంది. ఘటన సమయంలో బ్రిడ్జిపై దాదాపు 400 మంది సందర్శకులు ఉన్నట్లు సమాచారం. కాగా, ఈ ఘటనకు సంబంధించిన పూర్తి వివరాలు తెలియాల్సి ఉంది.
