Russian Troops Die : యుద్ధంలో 18,500 మంది రష్యా సైనికులను హతమార్చామన్న యుక్రెయిన్ ఆర్మీ
సైనిక చర్య మొదలు ఇప్పటివరకు 18,500 మంది రష్యా సైనికులను హతమార్చినట్లు యుక్రెయిన్ ఆర్మీ మంగళవారం ప్రకటించింది.(Russian Troops Die)
- Published By: 10TV Digital Team ,Published On : April 5, 2022 / 06:50 PM IST
Russian Troops Killed (8)
Russian Troops Die : సైనిక చర్య పేరుతో యుక్రెయిన్‌పై దాడులు ప్రారంభించిన రష్యా వాటిని కొనసాగిస్తోంది. నెల రోజులకు పైగా యుద్ధం జరుగుతోంది. యుక్రెయిన్ పై రష్యా బలగాలు బాంబులు, మిస్సైళ్ల వర్షం కురిపిస్తున్నాయి. బలగాలను ఉపసంహరిస్తామన్న రష్యా మాటమార్చింది. యుక్రెయిన్ రాజధాని కీవ్‌ సరిహద్దులు, చెర్నిహివ్‌లోని జనావాసాలపై క్షిపణులతో విరుచుకుపడింది. దీంతో యుక్రెయిన్‌పై రష్యా యుద్ధం ముగిసిపోలేదని అర్థమవుతోంది. 41వ రోజూ యుక్రెయిన్ లో ఇంకా కొన్ని చోట్ల రష్యా బలగాల దాడులు కొనసాగుతున్నాయి.
యుక్రెయిన్‌లో రష్యా సేనలు భారీ విధ్వంసమే సృష్టించాయి. ఈ దాడుల్లో యుక్రెయిన్ సైన్యంతో పాటు సాధారణ ప్రజలూ అనేకమంది చనిపోయారు. అయితే, ఎవరూ ఊహించని విధంగా యుక్రెయిన్ సేనల నుంచి తీవ్రమైన ప్రతిఘటన ఎదురవుతోంది. యుక్రెయిన్ బలగాలు రష్యా దాడులను ధీటుగా తిప్పికొడుతున్నాయి. యుక్రెయిన్ సైన్యం ప్రతి దాడులతో రష్యా బలగాలు చుక్కలు చూస్తున్నాయి. ఈ యుద్ధంలో చాలామంది రష్యన్ సైనికులను హతమార్చినట్లు ఇప్పటికే పలుమార్లు ప్రకటనలు సైతం చేసింది యుక్రెయిన్ ఆర్మీ.(Russian Troops Die)
తమ దేశంలో రష్యా కొనసాగిస్తున్న దండయాత్రను తీవ్రంగా ప్రతిఘటిస్తున్నట్టు యుక్రెయిన్ ఆర్మీ తెలిపింది. రష్యా సేనల దూకుడును దీటుగా ప్రతిఘటిస్తూనే.. శత్రుదేశాన్ని దెబ్బకొడుతున్నట్టు వెల్లడించింది. సైనిక చర్య మొదలు ఇప్పటివరకు 18,500 మంది రష్యా సైనికులను హతమార్చినట్లు యుక్రెయిన్ ఆర్మీ మంగళవారం ప్రకటించింది. దీంతోపాటు 676 యుద్ధ ట్యాంకులు, 1858 సాయుధ వాహనాలను ధ్వంసం చేసినట్లు తెలిపింది. 150 యుద్ధవిమానాలు, 134 హెలికాప్టర్లు, 94 యూఏవీలను నేలకూల్చినట్లు వెల్లడించింది. వీటికి అదనంగా ఏడు నౌకలు, 55 విమాన, క్షిపణి విధ్వంసక వ్యవస్థలను నాశనం చేసినట్లు చెప్పింది.
యుద్ధం మొదలుపెట్టిన కొన్ని రోజుల్లోనే యుక్రెయిన్ రాజధానిని వశపర్చుకుని ప్రభుత్వాన్ని మార్చవచ్చని పుతిన్ భావించారు. కానీ, ఆ అంచనాలు ఏవీ నిజం కాలేదు. పుతిన్ ఊహించని విధంగా యుక్రెయిన్ సేనల నుంచి తీవ్రమైన ప్రతిఘటన ఎదురవుతోంది. యుక్రెయిన్ సేనలు తగ్గేదేలా అన్నట్టు పోరాటం సాగిస్తున్నాయి. అంతేకాదు, ఈ యుద్ధంలో రష్యాకు ఊహించని విధంగా నష్టం జరుగుతోంది. భారీ సంఖ్యలో తన సైనికులను కోల్పోతోంది రష్యా.(Russian Troops Die)
సైనిక చర్య పేరుతో యుక్రెయిన్‌పై రష్యా మొదలుపెట్టిన దురాక్రమణ నెలరోజులకు పైగా కొనసాగుతూనే ఉంది. ఇప్పటికే పలు నగరాలను పూర్తి స్థాయిలో ధ్వంసం చేసింది రష్యా. కాగా, యుక్రెయిన్‌పై అణ్వాయుధాలను రష్యా ప్రయోగించవచ్చనే వార్తలు యావత్ ప్రపంచాన్ని భయాందోళనకు గురి చేశాయి. దీనిపై స్పందించిన రష్యా.. తమ దేశ ఉనికికి ముప్పు వాటిల్లే సందర్భంలోనే అణ్వాయుధాలను ప్రయోగిస్తామని తేల్చి చెప్పింది. అంతేకానీ ప్రస్తుతం యుక్రెయిన్ సైనిక చర్యలో మాత్రం కాదని స్పష్టం చేసింది.
ఈ యుద్ధం కారణంగా రష్యా దగ్గర పలు కీలక ఆయుధాలు దాదాపుగా నిండుకున్నాయని ఇంగ్లండ్‌ రక్షణ వర్గాలు చెబుతున్నాయి. వాటిని ఇప్పుడప్పుడే భర్తీ చేసుకునే అవకాశాలు కూడా లేవంటున్నాయి. హెలికాప్టర్లు, ఫైటర్‌ జెట్లు, క్రూయిజ్‌ మిసైళ్ల కొరత రష్యాను తీవ్రంగా వేధిస్తున్నట్టు చెప్పాయి. పలు కీలక విడి భాగాలను యుక్రెయిన్ నుంచే రష్యా దిగుమతి చేసుకుంటోందని సమాచారం. 2014 క్రిమియా యుద్ధానంతరం రష్యాకు ఆయుధాల ఎగుమతిని ఉక్రెయిన్‌ బాగా తగ్గించింది. యుద్ధ నేపథ్యంలో నెలకు పైగా అవి పూర్తిగా ఆగిపోయాయి.
కాగా, చర్చల్లో భాగంగా కొన్ని నగరాల్లో బలగాలను మాత్రమే తగ్గిస్తామని చెప్పిన రష్యా.. ఆ మాటనూ నిలబెట్టుకుంటోంది. యుక్రెయిన్ రాజధాని కీవ్‌ నుంచి రష్యా దళాలు వెనక్కుమళ్లించినట్లు ఉపగ్రహ చిత్రాల్లో స్పష్టంగా కనిపిస్తోంది. దీంతో యుద్ధం ముగిసిందని ఉక్రెయిన్‌ బలగాలు ఊపిరి పీల్చుకుంటున్నాయి. ఈ తరుణంలో.. ఉక్రెయిన్‌ సైన్యాధికారి ఒకరు.. కీలక వ్యాఖ్యలు చేశారు.
Ukraine Children: యుక్రెయిన్‌లో పసిపిల్లల వీపుపై వివరాలు రాస్తున్న తల్లిదండ్రులు: ఎందుకంటే?
యుద్ధం ముగిసిపోలేదని, భవిష్యత్తుల్లో మరిన్ని యుద్ధాలు చేయాల్సి రావొచ్చని భద్రతాధికారి ఒలెక్సీ డానీలోవ్‌ అంటున్నారు. యుద్ధం ముగిసిందని వేడుకలు చేసుకోవడానికి ఇది తరుణం కాదని, అది తొందరపాటు చర్యే అవుతుంది. యుద్ధం భయం ఇంకా పోలేదు. అలాగే భవిష్యత్తులో మరిన్ని యుద్ధాలు చేయాల్సి రావొచ్చని అన్నారు. యుక్రెయిన్‌ను నాశనం చేయాలనే పుతిన్ ఆకాంక్ష ఇంకా పూర్తి కాలేదని, ఈ గ్యాప్‌లో సైన్యాన్ని పునఃసమీకరించుకునే అవకాశాలు ఉన్నాయని అన్నారు. కాబట్టి, ఎవరూ తొందరపడి సంబరాలు చేసుకోవద్దన్నారు.
తమ వ్యూహాన్ని మార్చుకుని దాడి చేసేందుకే రష్యన్లు వెనక్కుమళ్లారని యుక్రెయిన్ అధ్యక్షుడు జెలెన్‌స్కీ సైతం ఆరోపించారు. వాళ్లకు విజయం కావాలని అన్నారు. మే 9వ తేదీ (నాజీ జర్మనీపై తమ విజయానికి గుర్తుగా ఆరోజు రష్యా ‘విక్టరీ డే’ పేరుతో దేశవ్యాప్తంగా సంబరాలు జరుపుతుంటుంది) వాళ్లకు ఎంతో కీలకం. అందుకు ఇంకా సమయం ఉంది. ఆలోపు ఏదైనా జరగొచ్చు. కాబట్టి మనం ముందు ముందు తీవ్ర పరిస్థితులను ఎదుర్కొవాల్సి రావొచ్చని జాతిని, సైన్యాన్ని ఉద్దేశించి ప్రసంగించారు జెలెన్‌స్కీ.
కాగా, దక్షిణ ఉక్రెయిన్‌లోని మైకోలైవ్‌లో రష్యన్ బలగాలు బాంబు దాడులు చేస్తూనే ఉన్నాయని స్థానిక మేయర్‌ ఒలెక్సాండర్‌ సెంకెవిచ్‌ చెప్పారు. భయాందోళనలు సృష్టించేందుకు నగరంలోని పౌర ప్రాంతాలపై క్లస్టర్ బాంబులు వినియోగిస్తున్నాయంటూ ఆరోపించారు. పౌర మరణాలను తగ్గించేందుకు మహిళలు, పిల్లలు.. నగరాన్ని విడిచిపెట్టాలని కోరారు.(Russian Troops Die)
ఉక్రెయిన్‌లో రష్యా చేస్తున్న మారణహోమాన్ని ప్రపంచ దేశాలు తీవ్రంగా నిరసిస్తున్నాయి. ఆ హింసాకాండను నమ్మశక్యం కానీ క్రూరత్వం అని ఖండించిన జర్మనీ.. తన దేశంలోని 40 మంది రష్యా దౌత్యవేత్తలను బహిష్కరిస్తూ నిర్ణయం తీసుకుంది. అయితే జర్మనీ చర్యను రష్యా తీవ్రంగా వ్యతిరేకించింది. ఇది ఇరుదేశాల మధ్య సంబంధాలను దెబ్బతీస్తుందని హెచ్చరించింది.
దీర్ఘశ్రేణి క్షిపణులు ప్రయోగించి.. దక్షిణ యుక్రెయిన్‌లోని యుక్రెయిన్ ప్రత్యేక బలగాల శిక్షణా కేంద్రాన్ని ధ్వంసం చేసినట్లు రష్యా ఆర్మీ మంగళవారం తెలిపింది. యుక్రెయిన్ తరఫున పోరాడేందుకు స్వచ్ఛందంగా ముందుకొచ్చిన కిరాయి సైనికులు అందులో వసతి పొందుతున్నట్లు వెల్లడించింది. మరోవైపు.. క్రెమెనెత్స్‌, చెర్కాసీ, జపోరిజియా, నోవోమోస్కోవ్‌స్క్‌లోని ఇంధన డిపోలపై దాడులు చేసినట్లు ప్రకటించింది.
