Rahul Gandhi : మరో షాక్.. రాహుల్ ఇన్స్టాగ్రామ్ ఖాతా కూడా బ్లాక్!
కాంగ్రెస్ నేత రాహుల్ గాంధీ ట్విట్టర్ ఖాతా ఇప్పటికే బ్లాక్ కాగా..త్వరలో రాహుల్ ఇన్స్టాగ్రామ్ అకౌంట్ కూడా బ్లాక్ అయ్యేలా కనిపిస్తోంది. తాజాగా రాహుల్ గాంధీ ఇన్స్టాగ్రామ్ ఖాతాపై చర్యలు తీసుకోవాలని జాతీయ బాలల హక్కుల పరిరక్షణ కమిషన్(NCPCR)ఫేస్బుక్ని ఓ లేఖలో ఆదేశించింది.
Rahul Gandhi కాంగ్రెస్ నేత రాహుల్ గాంధీ ట్విట్టర్ ఖాతా ఇప్పటికే బ్లాక్ కాగా..త్వరలో రాహుల్ ఇన్స్టాగ్రామ్ అకౌంట్ కూడా బ్లాక్ అయ్యేలా కనిపిస్తోంది. తాజాగా రాహుల్ గాంధీ ఇన్స్టాగ్రామ్ ఖాతాపై చర్యలు తీసుకోవాలని జాతీయ బాలల హక్కుల పరిరక్షణ కమిషన్(NCPCR)ఫేస్బుక్ని ఓ లేఖలో ఆదేశించింది. ఈ నెల ప్రారంభంలో ఢిల్లీలో హత్యాచారానికి గురైన బాలిక కుటుంబ సభ్యుల వివరాలు బహిర్గతమయ్యేలా.. రాహుల్ పోస్ట్ చేసినందుకుగాను ఈ మేరకు చర్యలు తీసుకోవాలని ఫేస్ బుక్ కి రాసిన లేఖలో NCPCR పేర్కొంది.
ఫేస్బుక్కు NCPCR రాసిన లేఖలో ఏముంది
ఇన్స్టాగ్రామ్లో రాహుల్ పోస్టు చేసిన ఓ వీడియోలో బాధిత బాలిక కుటుంబాన్ని గుర్తించేలా ఉంది. ఆ వీడియోలో బాలిక తల్లితండ్రులు స్పష్టంగా కనిపిస్తున్నారు. ఇది నిర్దేశించిన చట్టాలను ఉల్లంఘించడమే. జువైనల్ జస్టిస్ యాక్ట్-2015, పోక్సో చట్టం-2012, ఐపీసీలోని నిబంధనలను ఉల్లంఘించినందుకుగాను రాహుల్ ఇన్స్టాగ్రామ్ అకౌంట్ పై చర్యలు తీసుకోవాలి. సదరు వీడియోను వెంటనే తొలగించాలి అని ఫేస్బుక్కు రాసిన లేఖలో ఎన్సీపీసీఆర్ పేర్కొంది.
NCPCR చీఫ్ ప్రియాంక్ కనూంగో
ఇన్స్టాగ్రామ్లో రాహుల్ ఆ వీడియోను అప్లోడ్ చేయడంపై ఇవాళ ఫిర్యాదు అందుకున్నాం. రాహుల్ అప్ లోడ్ చేసిన వీడియో.. బాధిత బాలిక((ఢిల్లీలోని నంగల్లో అత్యాచారానికి గురైన మైనర్ బాలిక) తల్లిదండ్రుల గుర్తింపును వెల్లడించింది. ఈ నేపథ్యంలో చర్యలు తీసుకోవాలని ఫేస్బుక్కు లేఖ రాశాం. మూడు రోజుల్లోగా రిప్లై ఇవ్వాలపి వారిని కోరాం. ఆ వ్యవధి ఈ రోజుతో ముగుస్తుంది. మాకు ఫేస్బుక్ నుంచి ఇవాళ్టిలోగా సమాధానం రాకపోతే, తాము బాలల హక్కుల పరిరక్షణ చట్టం, 2005 సెక్షన్ 14 ప్రకారం ఫేస్బుక్ పై చర్యలు తీసుకుంటాము అని ప్రియాంక్ కనూంగో తెలిపారు.
కాగా, ఆగస్ట్ 1న నైరుతి ఢిల్లీలోని ఓ శ్మశానవాటిక వద్ద ఓ దళిత బాలికను రేప్ చేసి చంపేసిన విషయం తెలిసిందే. ఆగస్టు-2న బాధిత కుటుంబాన్ని రాహుల్ కలిశారు. తన కారులో కూర్చోబెట్టుకుని వారితో మాట్లాడారు. అనంతరం ఈ విషయాన్ని ట్విట్టర్ ద్వారా పంచుకున్నారు. వారితో కలిసి ఉన్న ఫొటోను షేర్ చేశారు. అయితే, అత్యాచారం కేసుల్లో బాధితుల వివరాలు బయటకు తెలిసేలా వ్యవహరించకూడదు.
దీంతో స్పందించిన ఎన్సీపీసీఆర్.. ఆ ట్వీట్పై చర్యలు తీసుకోవాలని ట్విట్టర్కు ఆగస్టు-4న నోటీసులు పంపించింది. దీంతో రాహుల్ షేర్ చేసిన ఫొటోలు, ట్వీట్ ని తొలగించడంతో పాటు ఆయన ట్విట్టర్ అకౌంట్ ని ఆగస్టు-6 నుంచి తాత్కాలికంగా బ్లాక్ చేసింది ట్విట్టర్.