Assembly Elections 2023: ఇండియా కూటమిలో భారీ చిచ్చు.. ద్రోహం చేస్తారంటే కాంగ్రెస్‭ను నమ్మేవాడిని కాదన్న అఖిలేష్

బీజేపీతో కాంగ్రెస్ నేతలు కుమ్మక్కయ్యారని అఖిలేష్ ఆరోపించారు. పొత్తు రాష్ట్ర స్థాయిలో లేదని తెలిసి ఉంటే.. దిగ్విజయ్ సింగ్ వద్దకు ఎస్పీ నేతలను పంపి ఉండేవాడిని కాదని, కాంగ్రెస్‌ వాళ్లు తమకు ద్రోహం చేస్తారని తెలిసి ఉంటే వాళ్లను నమ్మి ఉండేవాడిని కాదని అఖిలేష్ అన్నారు.

Akhilesh Yadav: రాబోయే లోక్‌సభ ఎన్నికలకు సంబంధించి దేశవ్యాప్తంగా ప్రతిపక్షాలన్నీ ఏకమై ఎన్డీయేను ఓడించేందుకు భారత కూటమిని ఏర్పాటు చేశాయి. అయితే మధ్యప్రదేశ్ అసెంబ్లీ ఎన్నికల్లోనే దీనికి బీటలు వారుతున్నాయి. మధ్యప్రదేశ్‌లో సమాజ్‌వాదీ పార్టీకి కాంగ్రెస్ స్థానాలేమీ ఇవ్వలేదు. రాష్ట్రంలోని అన్ని స్థానాల్లో తమ అభ్యర్థులను నిలబెట్టింది. అదే సమయంలో సమాజ్ వాదీ పార్టీపై ఉత్తరప్రదేశ్ కాంగ్రెస్ అధ్యక్షుడు అజయ్ రాయ్ తీవ్ర స్థాయిలో విరుచుకుపడ్డారు. ఇక దీనిపై గురువారం ఎస్పీ చీఫ్ అఖిలేష్ యాదవ్ స్పందిస్తూ ద్రోహం చేస్తారని తెలిసి ఉంటే కాంగ్రెస్ పార్టీని నమ్మి ఉండేవాడిని కాదంటూ అతి పెద్ద ప్రకటన చేశారు.

కాంగ్రెస్ పార్టీ నుంచి మధ్యప్రదేశ్‌ ముఖ్యమంత్రి అభ్యర్థిగా ఉన్న నేత ఓ సమావేశం పెట్టారని ఎస్పీ అధినేత అఖిలేష్‌ యాదవ్‌ చెప్పారు. ఇందులో ఆయన గత మధ్యప్రదేశ్ అసెంబ్లీ ఎన్నికల్లో సమాజ్ వాదీ పార్టీ పూర్తి నివేదికను చూపించి అయితే సమాజ్‌వాదీ పార్టీకి 6 సీట్లు పరిశీలిస్తామని హామీ ఇచ్చినట్టు చెప్పారు. కానీ సీట్లు ప్రకటించినప్పుడు సమాజ్‌వాదీ పార్టీకి ఒక్క సీటు ఇవ్వలేదు. అసెంబ్లీ స్థాయిలో ఇండియాకు పొత్తు లేదని ముందే తెలిసి ఉంటే అక్కడికి వెళ్లేవాడిని కాదని అఖిలేష్ అన్నారు.

ఇది కూడా చదవండి: Assembly Elections 2023: 40% నేరస్థులు, 81% కోటీశ్వరులు, కొందరు నిరక్షరాస్యులు… ప్రస్తుత ఎమ్మెల్యేల జాతకం ఇది

సమాజ్ వాదీ పార్టీపై ఉత్తరప్రదేశ్ కాంగ్రెస్ అధ్యక్షుడు అజయ్ రాయ్ నేరుగా దాడి చేశారు. మధ్యప్రదేశ్‌లో ఎస్పీకి హోదా లేదని అన్నారు. మీడియా సమావేశంలో ఎస్పీ చీఫ్ అఖిలేష్ కోపంగా కనిపించారు. మీడియాతో మాట్లాడుతూ.. రాష్ట్ర అధ్యక్షుడికి ముంబైలో, పాట్నాలో జరిగిన సమావేశంలో ప్రమేయం లేదని చెప్పారు. ఆయనకు ఇండియా కూటమి గురించి ఏమీ తెలియదని ఆగ్రహం వ్యక్తం చేశారు. బీజేపీతో కాంగ్రెస్ నేతలు కుమ్మక్కయ్యారని అఖిలేష్ ఆరోపించారు. పొత్తు రాష్ట్ర స్థాయిలో లేదని తెలిసి ఉంటే.. దిగ్విజయ్ సింగ్ వద్దకు ఎస్పీ నేతలను పంపి ఉండేవాడిని కాదని, కాంగ్రెస్‌ వాళ్లు తమకు ద్రోహం చేస్తారని తెలిసి ఉంటే వాళ్లను నమ్మి ఉండేవాడిని కాదని అఖిలేష్ అన్నారు.