జంపింగ్ ఎమ్మెల్యేల నియోజకవర్గాల్లో కొత్త, పాత కిరికిరి.. ఆ ఏడు నియోజ‌క‌వ‌ర్గాల్లో కాంగ్రెస్ వర్సెస్ కాంగ్రెస్..!

ఖైరతాబాద్, శేరిలింగంపల్లి, రాజేంద్రనగర్‌ మినహా..మిగతా ఏడు నియోజకవర్గాల్లో సర్పంచ్‌ ఎన్నికలు..కాంగ్రెస్‌కు సవాల్‌గా మారుతున్నాయట.

Congress: పిట్ట-పిట్ట పోరు..పిల్లి తీర్చినట్లు..పంచాయ‌తీ ఎన్నిక‌ల వేళ కాంగ్రెస్ పార్టీకి కొత్త హెడెక్‌ వచ్చి పడిందట. అధికారంలో ఉన్నామ్..పైగా జూబ్లీహిల్స్‌లో గెలిచామ్. ఇక పబ్లిక్ మూడంతా తమకే అనుకూలంగా ఉంది. సర్పంచ్‌ ఎన్నికల్లో ఆధిపత్యం తమదే అని లెక్కలు వేసుకున్న హస్తం పార్టీకి..ఆ ఏడు నియోజకవర్గాల్లో కొత్త, పాత రచ్చ కంటి మీద కునుకు లేకుండా చేస్తోందట.

బీఆర్ఎస్‌లో గెలిచి కాంగ్రెస్ గూటికి చేరిన పదిమంది ఎమ్మెల్యేల్లో..ఏడు చోట్ల పూర్తిగా గ్రామీణ ప్రాంతాలున్నాయ్. ఖైరతాబాద్, శేరిలింగంపల్లి, రాజేంద్రనగర్‌ మినహా..మిగతా ఏడు నియోజకవర్గాల్లో సర్పంచ్‌ ఎన్నికలు..కాంగ్రెస్‌కు సవాల్‌గా మారుతున్నాయట. పటాన్‌చెరు, జగిత్యాల, బాన్సువాడ, గద్వాల, స్టేషన్‌ ఘన్‌పూర్‌తో పాటు చేవెళ్ల, భద్రాచలం..ఈ ఏడు సెగ్మెంట్లలో కొత్త, పాత నేతల మధ్య కోల్డ్‌ వార్‌ నడుస్తోంది. ఇందులో పటాన్‌చెరు, జగిత్యాల, బాన్సువాడ, స్టేషన్‌ఘన్‌పూర్‌, గద్వాల్‌లో అయితే ఎమ్మెల్యేతో వెళ్లిన నేతలు..ఆల్రెడీ కాంగ్రెస్‌ పార్టీలో ఉన్న లోకల్ లీడర్ల మధ్య ఏ మాత్రం సఖ్యత కుదరట్లేదట. (Congress)

జగిత్యాలలో ఎమ్మెల్సీ జీవన్‌రెడ్డి వర్సెస్ ఎమ్మెల్యే సంజయ్‌ ఫైట్‌ డైలీ ఎపిసోడ్‌గా నడుస్తోంది. ఎప్పటికప్పుడు తన మాట నెగ్గించుకునే ప్రయత్నం చేస్తూ..లేటెస్ట్‌గా డీసీసీ అధ్యక్షుడిగా కూడా తాను సూచించిన నేతకే పట్టం కట్టబెట్టుకున్నారు జీవన్‌రెడ్డి. సర్పంచ్‌ ఎన్నికల్లోనూ తన వర్గాన్నే గెలిపించుకునే ప్లాన్ వేస్తున్నారట. అటు ఎమ్మెల్యే సంజయ్‌ వర్గం కూడా పోటీలో ఉండటంతో..అది బీఆర్ఎస్‌కు కలసి వస్తుందన్న ఆందోళన కాంగ్రెస్‌లో కనిపిస్తోంది.

Also Read: కొత్త జిల్లాల ఏర్పాటుతో ఇష్యూ సమసిపోతుందా? కొత్త సమస్యలు మొదలయ్యాయా?

ఇక పటాన్‌చెరులో అయితే ఉప్పునిప్పులాగా ఉంది పరిస్థితి. గూడెంతో డయాస్‌ షేర్‌ చేసుకోవడానికి కూడా లోకల్ కాంగ్రెస్ లీడర్లు ఇష్టపడట్లేదు. ఈ నేపథ్యంలో అక్కడ రెండు వర్గాల నుంచి పోటీపోటీ ఫైట్ నడిచే అవకాశం ఉందట. బాన్సువాడలో జంపింగ్‌ ఎమ్మెల్యే పోచారం శ్రీనివాస్‌రెడ్డి, నియోజకవర్గ కాంగ్రెస్ ఇంచార్జ్ ఏనుగు రవీందర్‌రెడ్డి మధ్య కోల్డ్‌వార్ నడుస్తోంది. అక్కడ ఎవరికి వారుగా తమ అనుచరులను రంగంలోకి దించి..పైచేయి సాధించే స్కెచ్ వేస్తున్నారట.

కడియం తీరుపై లోకల్ కాంగ్రెస్ నేతలు అసంతృప్తి? 
స్టేషన్‌ ఘన్‌పూర్‌లో కడియం శ్రీహరి తీరుపై లోకల్ కాంగ్రెస్ నేతలు అసంతృప్తిగా ఉన్నారట. సేమ్‌టైమ్‌ గత ఎన్నికల్లో కాంగ్రెస్ క్యాండిడేట్‌గా పోటీ చేసిన ఇందిరా..కడియంతో కలిసి పనిచేయలేనని తేల్చి చెప్పారట. ఇప్పటికే అక్కడి స్థానిక నేతలు రోడ్డెక్కి ఆందోళన చేసిన సందర్భాలు ఉండటంతో..సర్పంచ్‌ ఎన్నికల వేళ కొత్త, పాత పంచాయితీ హస్తం పార్టీకి తలనొప్పిగా మారిందంటున్నారు.

గద్వాల్‌లో కూడా సేమ్‌ సీన్. బండ్ల కృష్ణమోహన్‌రెడ్డి, సరితా తిరుపతయ్య వర్గాల మధ్య పచ్చగడ్డి వేస్తే భగ్గుమంటోంది. వాళ్ల పంచాయితీ కూడా గాంధీభవన్ మెట్లెక్కింది. ఈ ఐదు నియోజకవర్గాల్లో సొంత పార్టీ నేతల పంచాయితీ..కారు పార్టీకి అడ్వాంటేజ్‌గా మారేలా ఉందని కాంగ్రెస్ నేతలు టెన్షన్ పడుతున్నారట.

సర్పంచ్‌ ఎన్నికలకు బీఫామ్ అవసరం ఉండదు. ఇదే అదునుగా ఎవరికి వారు అభ్యర్థులను బరిలోకి దింపి..ఇంటి పోరును రచ్చకీడుస్తున్నారని..ఓట్లు చీలిస్తే కారు పార్టీ బలపరిచిన క్యాండిడేట్లు గెలిచే అవకాశం ఉందని భావిస్తున్నారట. సొంత పార్టీ నుంచి ఇద్దరు కాంగ్రెస్ మ‌ద్దతుదారులుగానే పోటీలో ఉంటే..బీఆర్ఎస్, బీజేపీకి మేలు చేస్తుందని ఆందోళనకు గురవుతున్నారట.

ముఖ్యనేతలు బుజ్జగింపులు, స్వీట్ వార్నింగ్‌లతో కొత్త, పాత పంచాయితీకి ఎండ్‌కార్డ్‌ వేసే ప్రయత్నం చేసినా..సెట్‌రైట్‌ కాకపోవడంతో ఇప్పుడు సవాల్‌గా మారిందంటున్నారు. నేత‌ల కుస్తీ..పిట్ట పోరు..హ‌స్తం పార్టీ పుట్టి ముంచుతుందేమోనన్న భ‌యం వెంటాడుతోందట. ఈ కొత్త-పాత పంచాయితీకి హస్తం పార్టీ ఎలా చెక్‌ పెడుతుందో.? పంచాయ‌తీ పోరులో ఎలా గ‌ట్టెక్కుతుందో వేచి చూడాలి మరి.