గుడ్‌న్యూస్‌.. స్కోడా ఆటో వోక్స్‌వ్యాగన్ ఇండియా గ్రూపులోకి అధికారికంగా “బెంట్లీ” ఎంట్రీ.. ఆ కార్లు కొనేవారికి ఎన్నో లాభాలు..

ఈ కార్యకలాపాల కోసం ప్రత్యేకంగా 'బెంట్లీ ఇండియా' అనే కొత్త విభాగాన్ని ఏర్పాటు చేశారు.

Bentley India

‘బెంట్లీ’… కోట్లాది రూపాయల విలువ చేసే ఈ లగ్జరీ కారును ఏదో ఒక రోజు కొనేయాలని చాలా మంది భారతీయులు కలలుగంటారు. ఇకపై బెంట్లీ కార్ల అమ్మకాలు, సర్వీస్, నిర్వహణ బాధ్యతలను స్కోడా ఆటో వోక్స్‌వ్యాగన్ ఇండియా (SAVWIPL) చేపడుతుంది.

భారీ మార్పు.. అసలేం జరిగింది?
స్కోడా ఆటో వోక్స్‌వ్యాగన్ ఇండియా (SAVWIPL) కంపెనీ గ్రూపులో బ్రిటన్‌కు చెందిన అత్యంత విలాసవంతమైన బ్రాండ్ ‘బెంట్లీ’ (Bentley) అధికారికంగా చేరింది. దీనివల్ల భారతదేశంలో బెంట్లీ కార్ల కార్యకలాపాల్లో కీలక మార్పులు రానున్నాయి.

ఈ నిర్ణయం 2025 జూలై 1వ తేదీ నుంచి అమల్లోకి వచ్చింది. బెంట్లీ కార్ల దిగుమతి, అమ్మకాలు, ఆఫ్టర్ సేల్స్ సర్వీస్ వంటి అన్ని బాధ్యతలను SAVWIPL చూసుకుంటుంది. భారతదేశంలో వేగంగా అభివృద్ధి చెందుతున్న లగ్జరీ కార్ల మార్కెట్‌లో తమ స్థానాన్ని మరింత పటిష్ఠం చేసుకోవడమే దీని లక్ష్యం.

ఈ కార్యకలాపాల కోసం ప్రత్యేకంగా ‘బెంట్లీ ఇండియా’ అనే కొత్త విభాగాన్ని ఏర్పాటు చేశారు. ఈ విభాగానికి బ్రాండ్ డైరెక్టర్‌గా అబ్బీ థామస్ నియమితుడయ్యారు. భారత మార్కెట్‌లో బెంట్లీ బ్రాండ్ అభివృద్ధిని ఆయన పర్యవేక్షించనున్నారు.

Also Read: మామిడికాయల దొంగలు.. అందరూ చదువుకున్నవారే.. ఎగబడి ఎత్తుకెళ్లారు.. కాస్త మనుషుల్లా ప్రవర్తించండ్రా బాబూ..

మొదటగా షోరూమ్‌లు ఎక్కడెక్కడ?
బెంట్లీ ఇండియా తమ కార్యకలాపాలను దశలవారీగా విస్తరించనుంది. తొలి దశలో ముంబై, బెంగళూరు, ఢిల్లీలో నగరాల్లో డీలర్‌షిప్‌లను ప్రారంభించనుంది.

ఈ కీలక పరిణామంపై SAVWIPL ఎండీ, సీఈవో పీయూష్ అరోరా మాట్లాడుతూ.. “మా గ్రూపులోకి బెంట్లీ రావడం గర్వంగా ఉంది. భారతదేశంలో విలాసవంతమైన జీవనశైలి పట్ల ఆసక్తి పెరుగుతోంది. ఈ సమయంలో అబ్బీ థామస్ నాయకత్వం బెంట్లీకి ఎంతో మేలు చేస్తుంది” అని అన్నారు.

కస్టమర్లకు ప్రయోజనాలేంటి?
ఇప్పటికే రెండు దశాబ్దాలుగా బెంట్లీ కార్లు భారత్‌లో అందుబాటులో ఉన్నా, ఇప్పుడు SAVWIPL వంటి పెద్ద గ్రూప్ పరిధిలోకి అవి రావడం వల్ల వినియోగదారులకు ఎన్నో ప్రయోజనాలు కలగనున్నాయి.

• అంతర్జాతీయ స్థాయి సర్వీస్: మెరుగైన, వేగవంతమైన సర్వీస్ అందుబాటులోకి వస్తుంది.
• విస్తృత నెట్‌వర్క్: మరిన్ని నగరాల్లో షోరూమ్‌లు, సర్వీస్ సెంటర్లు పెరిగే అవకాశం ఉంది.
• నమ్మకం: ఒక పెద్ద ఆటోమొబైల్ గ్రూప్ అండగా ఉండటంతో బ్రాండ్ మీద విశ్వసనీయత మరింత పెరుగుతుంది.
• ఈ మార్పుతో బెంట్లీ బ్రాండ్ భారతదేశంలో మరింత అభివృద్ధి చెందుతుంది.