తెలంగాణ స్థానిక సంస్థల ఎన్నికల్లో జనసేన పోటీ

ఆంధ్రప్రదేశ్ ఎన్నికల్లో పోటీ చేసి గట్టి పోటీ ఇచ్చినట్లు భావిస్తున్న జనసేన తెలంగాణలో పార్టీని బలోపేతం చేసేందుకు సిద్ధం అయ్యింది. ఈ క్రమంలో తెలంగాణలో ఎంపీటీసీ, జెడ్పీటీసీ ఎన్నికల్లో పోటీ చేయాలని జనసేన భావిస్తుంది. తెలంగాణలో పోటీ చేయాలని ఇప్పటికే జనసేన అధినేత పవన్ కల్యాణ్ కు ఆయన కార్యకర్తలు, అభిమానులు విజ్ఞప్తి చేయగా.. జనసేన తెలంగాణ ఇన్ చార్జ్ శంకర్ గౌడ్, ఉపాధ్యక్షుడు మహేందర్ రెడ్డి, పార్టీ అధ్యక్షుడి రాజకీయ కార్యదర్శి హరిప్రసాద్ ఇదే విషయమై చర్చించారు. స్థానిక సంస్థల ఎన్నికల్లో పోటీపై కార్యకర్తల అభిప్రాయాలను తెలుసుకున్న అనంతరం.. దీనిపై నిర్ణయం తీసుకోవాలని నిర్ణయించుకున్నారు.

తెలంగాణ వ్యాప్తంగా 538 జెడ్పీటీసీ, 5817 ఎంపీటీసీలకు ఎన్నికలు జరగుతున్నాయి. ఇప్పటికే ఎన్నికలకు సంబంధించి షెడ్యూల్ విడుదలైంది.  మూడు విడతల్లో స్థానిక సంస్థల ఎన్నికలు నిర్వహించబోతున్నారు. తొలి విడత ఎన్నికల నోటిఫికేషన్ ఏప్రిల్ 22న విడుదలై మే 6న ఎన్నికల పోలింగ్ జరగనుంది. రెండవ విడత ఎన్నికల నోటిఫికేషన్‌ ఏప్రిల్‌ 26న పోలిగ్ మే 10న, మూడవ విడత ఎన్నికల నోటిఫికేషన్‌ ఏప్రిల్‌ 30న విడుదల కానుండగా మే 14న పోలింగ్‌ నిర్వహించనున్నారు.