Pushkar Shrotri : ప్రముఖ నటుడి ఇంట్లో భారీ చోరీ.. బంగారం, డబ్బుతో ఉడాయించిన పనిమనిషి
ఓ నటుడి ఇంట్లో పనిమనిషి దొంగతనం చేసింది. దొరికినట్లే దొరికి.. ఎలాంటి స్కెచ్ వేసి పరారైందో తెలిస్తే షాకవుతారు.
- Published By: 10TV Digital Team ,Published On : October 29, 2023 / 12:22 PM IST
Pushkar Shrotri
Pushkar Shrotri : ప్రముఖ మరాఠీ నటుడు పుష్కర్ ష్రోత్రి ఇంట్లో భారీ చోరీ జరిగింది. ఇంట్లో నమ్మకంగా పనిచేస్తున్న పనిమనిషి ఈ దొంగతనానికి పాల్పడినట్లు ఆ నటుడు పోలీసులకు ఫిర్యాదు చేసారు.
పుష్కర్ ష్రోత్రి ఇంట్లో అక్టోబర్ 22న దొంగతనం జరిగినట్లు గుర్తించారు. రూ.1.20 లక్షలు డబ్బు, రూ.60 వేల ఫారిన్ కరెన్సీ కనిపించకుండా పోయినట్లు పుష్కర్ ష్రోత్రి పోలీసులకు ఫిర్యాదు చేసారు. అయితే ఈ దొంగతనం చేసింది ఆయన ఇంట్లో పనిచేసే పనిమనిషి ఉష చేసినట్లు తేలింది. పోలీసులకు ఫిర్యాదు చేయడంతో ఆమె దొంగిలించిన మొత్తాన్ని తిరిగి ఇచ్చేసింది. ఇక్కడే మరో ట్విస్ట్ ఎదురైంది.
అక్టోబర్ 24 న పుష్కర్ ష్రోత్రి దంపతులకు ఏదో అనుమానం వచ్చి బీరువాలో ఉన్న బంగారాన్ని పరిశీలించారు. అది నకిలీది అని తేలడంతో షాకయ్యారు. పనిమనిషి ఉషనే రూ.10 లక్షల విలువైన బంగారంతో ఉడాయించినట్లు తేలింది. దీంతో పుష్కర్ మళ్లీ అక్టోబర్ 26 న పోలీసులకు ఫిర్యాదు చేసారు. పోలీసులు దర్యాప్తు చేస్తున్నారు.
