Theatre Fined Rs 1 Lakh : 15 నిమిషాలు లేట్‌గా సినిమా వేసినందుకు థియేటర్కు లక్ష రూపాయలు ఫైన్
చెప్పిన సమయానికి కాకుండా కాస్త లేట్ గా సినిమా వేసిన థియేటర్ కు వినియోగాదారుల ఫోరం బుద్ది చెప్పింది. పెద్ద మొత్తంలో జరిమానా విధించింది.
- Published By: 10TV Digital Team ,Published On : December 18, 2021 / 06:56 PM IST
Theatre Fined Rs 1 Lakh
Theatre Fined Rs 1 Lakh : చెప్పిన సమయానికి కాకుండా కాస్త లేట్ గా సినిమా వేసిన థియేటర్ కు వినియోగాదారుల ఫోరం బుద్ది చెప్పింది. పెద్ద మొత్తంలో జరిమానా విధించింది. వివరాల్లోకి వెళితే.. టికెట్ పై ముద్రించిన సమయానికి సినిమాను ప్రారంభించకుండా 15 నిమిషాలు ప్రకటనలు వేసి, తన సమయాన్ని వృథా చేశారని విజయ్ గోపాల్ అనే వ్యక్తి వినియోగదారుల కమిషన్ ను ఆశ్రయించారు. తన సమయాన్ని వృథా చేసిన ఐనాక్స్‌ లీజర్‌ ప్రైవేట్ లిమిటెడ్‌పై చ‌ర్య‌లు తీసుకుని త‌న‌కు న్యాయం చేయాలని కోరారు. రెండేళ్ల క్రితం ఆయనీ కేసు వేశారు.
హైదరాబాద్ లోని తార్నాకకు చెందిన విజయ్ గోపాల్ 2019 జూన్‌ 22న ‘గేమ్‌ ఓవర్‌’ అనే సినిమా చూసేందుకు కాచిగూడ క్రాస్‌రోడ్స్‌లోని ఐనాక్స్‌ థియేటర్కు వెళ్లారు. టికెట్‌పై ముద్రించిన సమయం ప్రకారం సినిమా సాయంత్రం 4.30 గంట‌ల‌కు ప్రారంభం కావాల్సి ఉంది. అయితే, సాయంత్రం 4.45 గంట‌ల‌కు ప్రారంభ‌మైందని ఆయన చెప్పారు.
Best Foods : రన్నింగ్, జాగింగ్ చేసే వారికి బెస్ట్ ఫుడ్స్ ఇవే…
15 నిమిషాలు యాడ్స్ వేసి తన సమయం వృథా చేశారని గోపాల్ వాపోయారు. దీన్ని ఆయన సీరియస్ గా తీసుకున్నారు. దీనిపై థియేటర్ మేనేజర్‌కు కూడా ఫిర్యాదు చేశారు. అయితే, స్పందన లేకపోవడంతో హైదరాబాద్ జిల్లా వినియోగదారుల కమిషన్ ను ఆశ్రయించారు. ఈ కేసులో రెండో ప్రతివాదిగా లైసెన్సింగ్‌ అథారిటీ ‘హైదరాబాద్ పోలీస్‌ కమిషనర్‌’ ను చేర్చారు.
అయితే, తెలంగాణ సినిమాస్‌ రెగ్యులేషన్‌ చట్టం-1955 ప్రకారం పాత విధానం ప్ర‌కార‌మే ప్రకటనలు వేస్తున్నట్లు థియేటర్ యాజమాన్యం సమర్థించుకునే ప్ర‌య‌త్నం చేసింది. త‌మ‌కు ఆర్టికల్‌ 19(1)(జీ), (ఏ) ప్రకారం ప్రకటనలు వేసే హక్కు ఉందని తెలిపింది. అయితే, ఐనాక్స్‌ సంస్థ వాద‌న‌ల‌ను వినియోగదారుల ఫోరం తప్పుపట్టింది.
Balakrishna : ‘అన్ స్టాపబుల్’ బాలయ్యతో మాస్ మహారాజ్
చట్టం ప్రకారం కేవలం 5 నిమిషాలు మాత్రమే ఉచిత ప్రకటనలు వేసే హక్కు ఉందని తెలిపింది. అంతేగాక, వాణిజ్య ప్రకటనలు వేయడం నిబంధనలకు విరుద్ధమని తీర్పు వెలువరించింది. ఫిర్యాదుదారుడికి పరిహారంగా రూ.5వేలు, కేసు ఖర్చుల కింద మరో రూ.5వేలు చెల్లించాలని తాజాగా తీర్పు ఇచ్చింది. అంతేకాదు పెనాల్టీ కింద థియేటర్ కు రూ.లక్ష జరిమానా విధించింది. ఆ డబ్బుని లైసెన్సింగ్‌ అథారిటీ అయిన హైదరాబాద్ పోలీస్‌ కమిషనర్‌కి ఇవ్వాలంది. థియేటర్లలో భద్రతకు, విపత్తు నిధిగా ఆ డబ్బుని వినియోగించాలని సూచించింది.
