Parliament Winter Session: పార్లమెంట్ సెషన్స్ కు ప్రతిపక్షాల త్రిశూల వ్యూహం..
రాబోయే సమావేశాలు ఫలవంతంగా ఉంటాయని నేను ఆశిస్తున్నా. దేశంలోని ముఖ్యమైన అంశాలపై చర్చలు జరుగుతాయి.
- Published By: 10TV Digital Team ,Published On : November 30, 2025 / 04:40 PM IST
Parliament Winter Session: పార్లమెంట్ శీతాకాల సమావేశాలకు సమయం ఆసన్నమైంది. సోమవారం నుంచి పార్లమెంటు శీతాకాల సమావేశాలు ప్రారంభం కానున్నాయి. అధికార, ప్రతిపక్షాలు తమ తమ వ్యూహాలను సిద్ధం చేసుకుంటున్నాయి. ప్రభుత్వాన్ని టార్గెట్ చేసేందుకు ప్రతిపక్షాలు ప్రణాళిక రచిస్తున్నాయి. కేంద్ర ప్రభుత్వాన్ని ఇరుకున పెట్టేందుకు అస్తశస్త్రాలను సిద్ధం చేస్తున్నాయి. దేశంలో హాట్ టాపిక్ గా ఉన్న అంశాలను అజెండాగా తీసుకుంటున్నాయి.
SIR, సమానత్వం, ఢిల్లీ పేలుడు, ఢిల్లీలో వాయు కాలుష్యం, దేశ భద్రత, రైతు సమస్యలు, ప్రజాస్వామ్య పరిరక్షణ, విదేశాంగ విధానం సహా అనేక అంశాలను లేవనెత్తాలని ప్రతిపక్షాలు నిర్ణయించాయి. మరీ ముఖ్యంగా ఎన్నికల సంఘం చేపట్టిన ఓటరు జాబితా ప్రత్యేక సమగ్ర సవరణపై పార్లమెంటులో చర్చించాలని మెజార్టీ విపక్షాలు డిమాండ్ చేస్తున్నాయి.
”ప్రజల ప్రాథమిక సమస్యలను విస్మరిస్తున్నారు. ప్రభుత్వం ఎన్నికలకు మించి ఆలోచన చేస్తోంది. ఆదాయం, సమానత్వం చర్చించాల్సిన అంశాలు కాదా? మనం దేశ జీడీపీ వృద్ధి గురించి చర్చించకూడదా? SIR గురించి ప్రజలకు ఉన్న ఆందోళనల గురించి మనం మాట్లాడకపోతే, సుప్రీంకోర్టులో అప్పీల్ చేయకపోతే, పత్రాల పరంగా ప్రజలకు లభించిన ఉపశమనం కూడా సాధ్యమయ్యేది కాదు. వీటిని వివరంగా చర్చించాల్సిన అవసరం ఉంది. లేకుంటే, పార్లమెంట్ మ్యూజియం లాంటి నిర్మాణంగా మిగిలిపోతుంది” అని ఆర్జేడీ నాయకుడు ఎంపీ మనోజ్ కుమార్ అన్నారు.
“చాలా తక్కువ సమయంలోనే రాష్ట్రవ్యాప్తంగా SIR నిర్వహించారు. ఇది అసాధ్యం. రాజధానిలో పేలుళ్లు సంభవించాయి. ప్రధాని మోదీ విదేశాంగ విధానాలు పూర్తిగా పోయాయి. ఢిల్లీ, ఇతర రాష్ట్రాల్లో వాయు కాలుష్యం గురించి వివరంగా చర్చించాలి. బీజేపీ అజెండాలో ఏముందో చూద్దాం” అని కాంగ్రెస్ ఎంపీ ప్రమోద్ తివారీ అన్నారు.
“రాబోయే సమావేశాలు ఫలవంతంగా ఉంటాయని నేను ఆశిస్తున్నా. దేశంలోని ముఖ్యమైన అంశాలపై చర్చలు జరుగుతాయి. పాలక పక్షానికి ఒక ఎజెండా ఉందని నాకు తెలుసు, కానీ ప్రతిపక్షానికి కూడా ఒకటి ఉంది. మీరు చూడగలిగినట్లుగా, SIR సమయంలో, చాలా మంది BLOలు ఒత్తిడిలో పని చేస్తున్నారు, చాలా మంది ప్రాణాలు కోల్పోయారు” అని పార్లమెంటు శీతాకాల సమావేశాల గురించి శివసేన (UBT) ఎంపీ ప్రియాంక చతుర్వేది అన్నారు.
”రేపు సమావేశాలు ప్రారంభమవుతాయి. ఈరోజు మనం అధికారికంగా చర్చించి మా అభిప్రాయాలను వ్యక్తపరుస్తాము, కానీ పాలక పార్టీ ఏదీ అంగీకరించదు. వారు బిల్లుల జాబితాను సిద్ధం చేసి కొత్త అజెండాతో వస్తారు. చివరిసారి, జాబితాలో కొన్ని సూచించిన బిల్లులు ఉన్నాయి, కానీ చివరి రోజున, వారు కొత్త రాజ్యాంగ సవరణను ప్రవేశపెట్టారు. ఈ సమావేశంలో నాకు పెద్దగా నమ్మకం లేదు. కానీ మనమందరం హాజరై అభిప్రాయాలను తెలుపుదాము. ఎన్నికల కమిషన్ పనితీరుపై చర్చకు డిమాండ్ చేస్తాము” సీపీఐ ఎంపీ సందోష్ కుమార్ తెలిపారు.
మా పోరాటం ప్రజల ప్రయోజనాల కోసమే..
“మా సమస్యలన్నీ ప్రజల ప్రయోజనం కోసమే. ప్రజల సమస్యలను ముందుకు తీసుకురావడమే మా ప్రయత్నాలు. మా గౌరవనీయ నాయకుడు రాహుల్ గాంధీ ఎల్లప్పుడూ ప్రజా సమస్యల గురించి స్పష్టంగా ఉంటారు. నిజమైన ఓటర్లను తొలగిస్తూ SIR సమయంలో నకిలీ ఓటర్లను ఎలా చేర్చుతున్నారో ప్రస్తుతం మా అతిపెద్ద ఆందోళన. మొత్తం SIR ప్రక్రియ గురించి లేవనెత్తుతున్న ప్రశ్నలను మేము లేవనెత్తుతాము. అందువల్ల, SIR ప్రధాన సమస్య అవుతుంది” అని కాంగ్రెస్ నేత, ఎంపీ తనూజ్ పునియా అన్నారు.
“ఇవి శీతాకాల సమావేశాలు. కాబట్టి, ప్రతి ఒక్కరూ ప్రశాంతంగా పని చేస్తారని.. వాడీ వేడి చర్చలకు దూరంగా ఉంటారని మేము ఆశిస్తున్నాము. పార్లమెంటులో చర్చ జరుగుతుంది. ఎటువంటి అంతరాయాలు ఉండవని ఆశిస్తున్నాము. మనం ప్రశాంతంగా పని చేస్తే, అది దేశానికి ప్రయోజనకరంగా ఉంటుంది. పార్లమెంటు సమావేశాలు సజావుగా సాగుతాయి” అని పార్లమెంటరీ వ్యవహారాల శాఖ మంత్రి కిరణ్ రిజిజు అన్నారు.
పార్లమెంటు శీతాకాల సమావేశాలు రేపటి నుంచి 19వ తేదీ వరకు జరగనుంది. డిసెంబర్ 5, 19 తేదీలలో ప్రైవేట్ సభ్యుల బిల్లులు.. డిసెంబర్ 12న ప్రైవేట్ సభ్యుల తీర్మానాలు పరిశీలనకు రానున్నాయి.
