డ్రైవర్ లేకుండా మెట్రో రైలు.. ప్రారంభించనున్న ప్రధాని మోడీ
- Published By: 10TV Digital Team ,Published On : December 28, 2020 / 09:32 AM IST
PM Modi to flag-off Delhi Metro first driverless train: దేశరాజధాని ఢిల్లీలో డ్రైవర్ లేకుండా నడిచే మెట్రో రైలును ప్రారంభించనున్నారు ప్రధాని మోడీ. ఇవాళ(28 డిసెంబర్ 2020) నుంచి ఢిల్లీలో డ్రైవర్ లేకుండా మెట్రో రైళ్లు నడుస్తాయి. డ్రైవర్ లేకుండా మెట్రోను ట్రాక్‌లో నడపడం ఇదే మొదటిసారి. సోమవారం ఉదయం 11 గంటలకు ఢిల్లీ మెట్రోలోని మెజెంటా లైన్‌(జనక్‌పురి వెస్ట్‌-బొటానికల్‌ గార్డెన్‌)లో డ్రైవర్ రహిత సర్వీసుకు ప్రధాని మోడీ పచ్చజెండా ఊపనున్నారు.
ఎయిర్‌పోర్ట్‌ ఎక్స్‌ప్రెస్‌ లైన్‌లో పూర్తిస్థాయిలో పనిచేసే నేషనల్‌ కామన్‌ మొబిలిటీ కార్డ్‌ సేవను వీడియో కాన్ఫరెన్స్‌ ద్వారా ప్రారంభించబోతున్నారు. ఈ మేరకు ప్రధాని కార్యాలయం (పిఎంఓ) సమాచారం ఇచ్చింది. దేశ రాజధానిలో మొదటి డ్రైవర్‌లేని రైలు 37 కిలోమీటర్లు ప్రయాణించబోతోంది. డ్రైవర్‌లేని రైలు పూర్తిగా ఆటోమేటిక్‌గా ఉంటుందని, మానవ తప్పిదాల అవకాశాన్ని తగ్గిస్తుందని PMO తెలియజేసింది.
ఈ మెట్రో రైలులో హై రిజల్యూషన్ కెమెరాలు, రిమోట్ హ్యాండ్లింగ్, రియల్ టైమ్ మానిటరింగ్ రైలు పరికరాలతో అత్యవసర అలారం మరియు హైటెక్ సౌకర్యాలు ఉంటాయి. డ్రైవర్‌లేని మెట్రో రైలు ప్రయాణం ఢిల్లీ-ఎన్‌సీఆర్‌ నివాసితులకు సౌకర్యంగా ఉంటుందని డీఎంఆర్‌సీ ఎగ్జిక్యూటివ్‌ డైరెక్టర్‌ అనుజ్‌ దయాల్ తెలిపారు. ఇది మెట్రో ప్రపంచంలో మెరుగైన చైతన్యం కొత్త శకానికి దారితీస్తుంది అని దయాల్ వెల్లడించారు. ఢిల్లీ మెట్రోలోని మెజెంటా లైన్‌లో డ్రైవర్‌లెస్ రైళ్లను ప్రవేశపెట్టడంతో, DMR ప్రపంచంలోని మెట్రో నెట్‌వర్క్‌లో 7% ఎలైట్ లీగ్‌లోకి ప్రవేశిస్తుంది.
ఢిల్లీ మెట్రోలోని మెజెంటా లైన్‌లో డ్రైవర్‌లేని రైలును ప్రవేశపెట్టిన తర్వాత ఈ రైలును పింక్ లైన్‌లో నడపాలని యోచిస్తున్నారు. నివేదిక ప్రకారం, 2021వరకు లైన్‌లో 57 కిలోమీటర్ల డ్రైవర్‌లెస్ మెట్రోను నడపాలని DMRC యోచిస్తోంది. ఇది మజ్లిస్ పార్క్ నుండి శివ విహార్ వరకు నడుస్తుంది.
