Medaram Mini Jatara: ‘మేడారం మినీ జాతర’ తేదీలు ఖరారు.. 4 రోజులు ప్రత్యేక పూజలు.. ఏర్పాట్లకు సిద్ధమవుతున్న ప్రభుత్వం!
ములుగు జిల్లాలోని ప్రముఖ ఆధ్యాత్మిక క్షేత్రం మేడారంలో నిర్వహించే మినీ జాతర(Medaram Mini Jatara) తేదీలను పూజారుల సంఘం అధికారికంగా ప్రకటించింది.
- Published By: V Santhosh Kumar , Published On : September 28, 2026 / 09:31 AM IST
Medaram Mini Sammakka Saralamma Jatara Dates and Puja Details
Medaram Mini Jatara: ములుగు జిల్లాలోని ప్రముఖ ఆధ్యాత్మిక క్షేత్రం మేడారంలో నిర్వహించే మినీ జాతర తేదీలను పూజారుల సంఘం అధికారికంగా ప్రకటించింది. వచ్చే ఏడాది ఫిబ్రవరి 17వ తేదీ నుంచి 20వ తేదీ వరకు నాలుగు రోజుల పాటు ఈ మినీ జాతరను అత్యంత వైభవంగా నిర్వహించనున్నట్లు తెలిపారు. ప్రతి రెండేళ్లకోసారి జరిగే మహా జాతర తరహాలోనే, సమ్మక్క పున్నమిని పురస్కరించుకుని ఈ మినీ జాతరను నిర్వహించడం ఆనవాయితీగా వస్తోంది. ఈ మేరకు పూజారుల సంఘం దేవాదాయ శాఖతో పాటు రాష్ట్ర మంత్రి సీతక్కకు సమాచారం అందిస్తూ అవసరమైన ఏర్పాట్లు చేయాలని విజ్ఞప్తి చేసింది.
నాలుగు రోజుల పూజా కార్యక్రమాల వివరాలు – సమ్మక్క పున్నమి ప్రత్యేకతలు:
ఫిబ్రవరి 17న సారలమ్మ గద్దె వద్ద ప్రత్యేక పూజలతో జాతర (Medaram Mini Jatara)ప్రారంభమవుతుంది. 18న సమ్మక్క గద్దె వద్ద, 19న సమ్మక్క-సారలమ్మలతో పాటు పగిడిద్దరాజు, గోవిందరాజుల గద్దెలపై పూజారులు సాంప్రదాయ పూజలు నిర్వహిస్తారు. 20వ తేదీ సాయంత్రంతో ఈ వేడుకలు ముగుస్తాయి. మహా జాతరలో మాత్రమే దేవతలను గద్దెలపైకి తీసుకువస్తారని, మినీ జాతరలో గద్దెల వద్దే ప్రత్యేక పూజలు నిర్వహిస్తారని పూజారులు స్పష్టం చేశారు.
10 లక్షల మందికి పైగా భక్తుల రాక – అధికారుల ముందస్తు ఏర్పాట్లు:
తెలుగు రాష్ట్రాలతో పాటు ఛత్తీస్గఢ్, మహారాష్ట్రల నుంచి దాదాపు 10 లక్షల మందికి పైగా భక్తులు ఈ మినీ జాతరకు వచ్చే అవకాశం ఉందని అధికారులు అంచనా వేస్తున్నారు. భక్తుల రద్దీని దృష్టిలో ఉంచుకుని తాగునీరు, పారిశుధ్యం, రవాణా, శాంతిభద్రతల పరంగా ఎలాంటి లోటుపాట్లు లేకుండా ముందస్తు ఏర్పాట్లు చేపట్టాలని సిద్ధబోయిన జగ్గారావు, చందా గోపాల్ రావు కోరారు.
