Telangana Rains: తెలంగాణ ప్రజలకు అలర్ట్.. రానున్న రెండు రోజులు భారీ వర్షాలు.. హైదరాబాద్ వాతావరణ కేంద్రం కీలక సూచనలు
తెలంగాణ(Telangana Rains) రాష్ట్రంలో రాబోయే రెండు రోజుల పాటు వాతావరణంలో గణనీయమైన మార్పులు చోటుచేసుకోనున్నాయి.
- Published By: V Santhosh Kumar , Published On : September 28, 2026 / 06:27 AM IST
Meteorological Department announced possibility of heavy rains in Telangana for next two days.
Telangana Rains: తెలంగాణ రాష్ట్రంలో రాబోయే రెండు రోజుల పాటు వాతావరణంలో గణనీయమైన మార్పులు చోటుచేసుకోనున్నాయి. బంగాళాఖాతంలో ఏర్పడిన ఉపరితల ఆవర్తనం, ద్రోణి ప్రభావంతో రాష్ట్ర వ్యాప్తంగా పలు ప్రాంతాల్లో మోస్తరు నుండి భారీ వర్షాలు కురిసే అవకాశం ఉందని హైదరాబాద్ వాతావరణ కేంద్రం వెల్లడించింది. ఈ క్రమంలో ఈదురుగాలులతో పాటు పిడుగులు పడే ముప్పు ఉన్నందున ప్రజలు, రైతులు అప్రమత్తంగా ఉండాలని అధికారులు హెచ్చరించారు.
ఈ జిల్లాలకు యెల్లో అలెర్ట్ జారీ – ఉరుములు, మెరుపులతో వర్షం:
రాష్ట్రంలోని ఉత్తర, తూర్పు తెలంగాణ జిల్లాలపై వర్ష ప్రభావం ఎక్కువగా ఉండనుంది. ముఖ్యంగా ఉమ్మడి ఆదిలాబాద్, నిజామాబాద్, కరీంనగర్, వరంగల్, ఖమ్మం, మెదక్, నల్గొండ జిల్లాల్లో రాబోయే 48 గంటల్లో భారీ వర్షాలు (Telangana Rains)కురిసే సూచనలు ఉన్నందున ఆయా జిల్లాలకు యెల్లో అలెర్ట్ జారీ చేశారు. హైదరాబాద్, దాని పరిసర ప్రాంతాల్లో గంటకు 30 నుండి 40 కి.మీ వేగంతో ఈదురుగాలులు వీచే అవకాశముంది.
ప్రజలకు వాతావరణ శాఖ సూచనలు – జాగ్రత్తలు తప్పనిసరి:
భారీ వర్షాలు, పిడుగుపాటు ప్రమాదాల నేపథ్యంలో వాతావరణ శాఖ పలు జాగ్రత్తలు సూచించింది. వర్షం కురిసే సమయంలో బహిరంగ ప్రదేశాల్లో ఉండవద్దని, చెట్ల కింద లేదా విద్యుత్ స్తంభాల వద్ద నిలబడకూడదని స్పష్టం చేసింది. లోతట్టు ప్రాంతాల ప్రజలు జాగ్రత్తగా ఉండాలని, అత్యవసరమైతే తప్ప బయటకు రావద్దని అధికారులు విజ్ఞప్తి చేశారు.
