Narada Scam : నారద స్కామ్..సీబీఐ అప్పీల్ ఉపసంహరణకు సుప్రీం అనుమతి
నారదా కుంభకోణం కేసులో నలుగురు తృణముల్ కాంగ్రెస్ నేతలను జ్యుడిషీయల్ కస్టడీకి తీసుకోకుండా..హౌస్ అరెస్ట్ కు అనుమతిస్తూ మే-21న కలకత్తా హైకోర్టు ఆదేశాలు ఇచ్చిన విషయం తెలిసిందే
Narada Scam నారదా కుంభకోణం కేసులో నలుగురు తృణముల్ కాంగ్రెస్ నేతలను జ్యుడిషీయల్ కస్టడీకి తీసుకోకుండా..హౌస్ అరెస్ట్ కు అనుమతిస్తూ మే-21న కలకత్తా హైకోర్టు ఆదేశాలు ఇచ్చిన విషయం తెలిసిందే. ఆ తర్వాత కలకత్తా హైకోర్టు ఆర్డర్ ను వ్యతిరేకిస్తూ సుప్రీంని ఆశ్రయించింది సీబీఐ. అయితే కలకత్తా హైకోర్టు ఇచ్చిన ఆదేశాలను సవాల్ చేసిన అప్పీల్ ను ఉపసంహరించుకోవాలని సీబీఐ నిర్ణయించింది. కలకత్తా హైకోర్టు ఆదేశాలపై అప్పీల్ను వెనక్కి తీసుకునేందుకు సీబీఐకి అనుమతించింది సుప్రీంకోర్టు. హైకోర్టులో విచారణ జరుగుతున్న నేపథ్యంలో అక్కడే తేల్చుకోవాలని సోమవారం సర్వోన్నత న్యాయస్థానం స్పష్టం చేసింది.
సోమవారం సీబీఐ అప్పీల్ను పరిశీలించిన జస్టిస్ వినీత్ శరణ్, జస్టిస్ బీఆర్ గవాయ్లు సభ్యులుగా గల సుప్రీం ధర్మాసనం కీలక వ్యాఖ్యలు చేసింది. నారదా కేసులో కలకత్తా హైకోర్టులోని ఐదుగురు సభ్యుల ధర్మాసనం ఇప్పటికే విచారణ చేపట్టినట్లు స్పష్టం చేసింది. తమ అప్పీల్ను వెనక్కి తీసుకునేందుకు సీబీఐ తరఫున హాజరైన సొలిసిటర్ జనరల్ తుషార్ మెహతాకు అనుమతించింది. ఎలాంటి సమస్యలున్నా హైకోర్టు దృష్టికి తీసుకెళ్లాలని స్పష్టం చేసింది. బెంగాల్ ప్రభుత్వం, కేసులో ఆరోపణలు ఎదుర్కొంటున్న నేతలు తమ వాదనలు వినిపించేందుకు స్వేచ్ఛ ఉంటుందని తెలిపింది.