China-Sri Lanka : ఉత్తర శ్రీలంకలో చైనా ఆదిపత్యం..భారత్ ఆందోళన!

ఉత్తర శ్రీలంకలో తన అడుగులను విస్తరించడానికి చైనా చేస్తున్న ప్రయత్నాలు భారత్ కు ఇబ్బందికరంగా మారాయి.  ఉత్తరశ్రీలంకలో పెద్ద ఎత్తున ఇన్ ఫ్రాస్ట్రక్చర్ ప్రాజెక్టులు చేపడుతున్న చైనా

China-Sri Lanka ఉత్తర శ్రీలంకలో తన అడుగులను విస్తరించడానికి చైనా చేస్తున్న ప్రయత్నాలు భారత్ కు ఇబ్బందికరంగా మారాయి.  ఉత్తరశ్రీలంకలో పెద్ద ఎత్తున ఇన్ ఫ్రాస్ట్రక్చర్ ప్రాజెక్టులు చేపడుతున్న చైనా.. అక్కడి సంప్రాదాయ తమిళ కమ్యూనిటినీ ఆకర్షించడానికి కూడా ప్రయత్నాలు చేస్తోంది. చైనా తన రుణ భీమా పాలసీల ద్వారా ఇప్పటికే శ్రీలంకలో లోతైన వ్యూహాత్మక అడుగులు వేసింది. అయితే ఇప్పుడు భారత తీరానికి సాధ్యమైనంత వరకు తన ఉనికిని శ్రీలంకలో స్థాపించుకునే దిశగా డ్రాగన్ దేశం పనిచేస్తోందని భారత భద్రతా వర్గాలు తెలిపాయి. శ్రీలంకలోని ఉత్తర ప్రావిన్స్‌లో చైనీస్ ఆర్థిక కార్యకలాపాల విస్తరణ మరియు ప్రతిపాదిత మౌలిక సదుపాయాల అభివృద్ధి ప్రాజెక్టులు..భవిష్యత్ లో వ్యూహాత్మక కారణాల వల్ల చైనా దోపిడీకి గురవుతాయి. ఇది ఖచ్చితంగా భారతదేశానికి ఆందోళన కలిగించే విషయమే.

ఇంతకుముందు, శ్రీలంకలో చైనా ఆర్థిక కార్యకలాపాలు ఎక్కువగా దక్షిణ శ్రీలంకకు పరిమితం చేయబడ్డాయి. కానీ ప్రస్తుత గోటబయ రాజపక్సే ప్రభుత్వం ఇప్పుడు ఉత్తర శ్రీలంకలో అనేక చైనా వెంచర్లను సులభతరం చేస్తోంది. అదేవిధంగా తరచుగా అక్కడి తమిళ నివాసుల మనోభావాలను రాజపక్సే ప్రభుత్వం పట్టించుకోవట్లేదు. ఈ పరిణామాలను భారత్ నిశితంగా పరిశీలిస్తోందని ఓ ఉన్నతాధికారి తెలిపారు.

ఈ ఏడాది ఫిబ్రవరిలో జాఫ్నా ద్వీపకల్పంలోని మూడు ద్వీపాలకి 12 మిలియన్ డాలర్ల విలువైన హైబ్రిడ్ గాలి మరియు ఫోటో వోల్టాయిక్ పవర్‌ని అందించే ప్రాజెక్టును చైనా కి చెందిన సినోసార్-ఎటెక్విన్‌ కంపెనీకి మూడు మార్గాల భాగస్వామ్యంతో శ్రీలంక ప్రభుత్వం అప్పగించడాన్ని వ్యతిరేకిస్తూ భారత్ ఇప్పటికే నిరసన వ్యక్తం చేసింది. ఈ ద్వీపాలు తమిళనాడు తీరం నుండి కేవలం 50 కిలోమీటర్ల దూరంలో ఉన్నందున..ఆ ద్వీపాలలో ఈ కార్యక్రమాల అమలు కోసం శ్రీలంకకు 12 మిలియన్ డాలర్ల గ్రాంట్ ప్రతిపాదనతో భారత్ ముందుకొచ్చింది. అయినప్పటికీ శ్రీలంక ప్రభుత్వం చైనా వైపే మొగ్గుచూపుతోంది.

మరోవైపు, ఉత్తర శ్రీలంకలోని ఒక తీర గ్రామంలో సముద్రపు దోసకాయ చేపల పెంపకం కోసం ఓ చైనా కంపెనీకి భూమిని కేటాయించింది శ్రీలంక ప్రభుత్వం. అయితే శ్రీలంక ప్రభుత్వం చైనా కంపెనీకి భూములు కేటాయించే సమయంలో స్థానిక రైతులు పెద్ద ఎత్తున నిరసనలు వ్యక్తం చేసినప్పటికీ..వాటిని రాజపక్సే ప్రభుత్వం పట్టించుకోలేదు. ఇక, ఈ ప్రాంతంలో ఇటువంటి అనేక చైనా కంపెనీలు తమ ఆధిపత్యాన్ని ప్రదర్శిస్తున్నట్లు తెలుస్తోంది.

కొలంబో పోర్టులోని ఈస్ట్ కంటైనర్ టెర్మినల్‌ని జపాన్‌తో కలిసి భారత్ సమగ్రంగా అభివృద్ధి చేయడానికి కుదిరిన త్రైపాక్షిక ఒప్పందాన్ని శ్రీలంక ప్రభుత్వం పక్కకుపెట్టడం,శ్రీలంకలోని త్రిన్కోమాలి సిటీలో ఆయిల్ ట్యాంకుల ఫార్మ్ ప్రాజెక్టు విషయంలో కూడా శ్రీలంక ప్రభుత్వ నిర్ణయాలు భారత్ కి నిరాశ కలిగిస్తున్నాయి. కానీ హంబన్ టోటా పోర్టుని 99 సంవత్సరాల లీజుకి పొందడం నుండి సరికొత్త కొలంబో పోర్ట్ సిటీ ప్రాజెక్ట్ వరకు దక్కించుకోవడం వరకు శ్రీలంకలో ఏ పనైనా చైనాకు సులభమైపోతుంది. శ్రీలంకతో పాటు, సీషెల్స్, మారిషస్, మాల్దీవులు, బంగ్లాదేశ్, మయన్మార్ మరియు తూర్పు ఆఫ్రికా దేశాలతో సముద్ర హైపర్‌లింక్‌లను ఆవిష్కరించడం ద్వారా చైనా అన్ని హిందూ మహాసముద్ర ప్రాంతాలలో క్రమపద్ధతిలో తన రెక్కలను విస్తరిస్తోంది.