IPL 2023, GT VS KKR: న‌మ్మ‌శ‌క్యం కాని రింకు సింగ్ బ్యాటింగ్‌.. ఐదు బంతుల‌కు 5 సిక్స‌ర్లు.. కోల్‌క‌తా సంచ‌ల‌న విజ‌యం

రింకు సింగ్ సంచ‌ల‌న బ్యాటింగ్‌తో కోల్‌క‌తాకు అద్భుత విజ‌యాన్ని అందించాడు. గుజ‌రాత్ నిర్దేశించిన 205 ప‌రుగుల ల‌క్ష్యాన్ని కోల్‌క‌తా 7 వికెట్లు కోల్పోయి ఆఖ‌రి బంతికి ఛేదించింది.

IPL 2023, GT VS KKR: ఇండియ‌న్ ప్రీమియ‌ర్ లీగ్‌(IPL) 2023లో భాగంగా అహ్మ‌దాబాద్‌లోని న‌రేంద్ర మోదీ స్టేడియంలో గుజ‌రాత్ టైటాన్స్, కోల్‌క‌తా నైట్‌రైడ‌ర్స్ జ‌ట్ల మ‌ధ్య జ‌రిగిన మ్యాచ్ అస‌లు సిస‌లు టీ20 మ‌జా ఏంటో అభిమానుల‌కు చూపించింది.ఈ మ్యాచ్‌లో కోల్‌క‌తా న‌మ్మ‌శ‌క్యం కాని విజ‌యాన్ని అందుకుంది. 205 ప‌రుగుల ల‌క్ష్యాన్ని స‌రిగ్గా 20 ఓవ‌ర్ల‌లో 7 వికెట్లు కోల్పోయి ఛేదించింది. గెలుపు దాదాపుగా అసాధ్యం అనుకున్న త‌రుణంలో కోల్‌క‌తా బ్యాట‌ర్ రింకు సింగ్ అద్భుత‌మే చేశాడు. ఆఖ‌రి ఓవ‌ర్‌లో విజ‌యానికి 29 ప‌రుగులు అవ‌స‌రం కాగా.. చివ‌రి ఐదు బంతుల‌ను సిక్స‌ర్లుగా మ‌లిచి త‌న జ‌ట్టును ఆనందంలో ముంచెత్తాడు. రింకు సింగ్ కేవ‌లం 21 బంతుల్లో 1ఫోరు, 6 సిక్స‌ర్లు బాది 48 ప‌రుగులతో గుజరాత్‌కు ఈ సీజ‌న్‌లో తొలి ఓట‌మిని రుచిచూపించాడు. రింకు సింగ్‌తో పాటు వెంక‌టేశ్ అయ్య‌ర్ (83; 40 బంతుల్లో 8 ఫోర్లు, 5 సిక్స‌ర్లు), కెప్టెన్ నితీశ్ రాణా(45; 29 బంతుల్లో 4ఫోర్లు, 3 సిక్స‌ర్లు) రాణించారు. గుజ‌రాత్ బౌల‌ర్ల‌లో కెప్టెన్ ర‌షీద్ ఖాన్ మూడు వికెట్లు ప‌డ‌గొట్ట‌గా, అల్జారీ జోసెఫ్ రెండు, మ‌హ్మ‌ద్ ష‌మీ, జోష్ లిటిల్‌లు చెరో వికెట్ తీశారు.

అంత‌క‌ముందు టాస్ గెలిచిన గుజరాత్ బ్యాటింగ్ ఎంచుకుంది. నిర్ణీత 20 ఓవ‌ర్ల‌లో 4 వికెట్ల న‌ష్టానికి 204 ప‌రుగులు చేసింది. గుజ‌రాత్ బ్యాట‌ర్ల‌లో సాయి సుద‌ర్శ‌న్ (53; 38 బంతుల్లో 3 ఫోర్లు, 2 సిక్స‌ర్లు), విజ‌య్ శంక‌ర్ (63 నాటౌట్‌; 24 బంతుల్లో 4 ఫోర్లు, 5 సిక్స‌ర్లు) అర్థ‌శ‌త‌కాల‌తో అల‌రించ‌గా శుభ్‌మన్ గిల్ (39) రాణించాడు. కోల్‌క‌తా బౌల‌ర్ల‌లో సునీల్ న‌రైన్ మూడు వికెట్లు ప‌డ‌గొట్ట‌గా, సుయాశ్ శ‌ర్మ ఓ వికెట్ తీశాడు.