UN Security Council : యూఎన్ భద్రతా మండలి అధ్యక్ష బాధ్యతలు స్వీకరించిన భారత్

ఐక్యరాజ్య సమితి భద్రతా మండలి(UNSC)అధ్యక్ష బాధ్యతలను ఆగస్టు నెలకు గాను భారత్‌ కు అప్పగించారు.

10TV Telugu News

UN Security Council ఐక్యరాజ్య సమితి భద్రతా మండలి(UNSC)అధ్యక్ష బాధ్యతలను ఆగస్టు నెలకు గాను భారత్‌ కు అప్పగించారు. ఐక్యరాజ్యసమతిలో భారత శాశ్వత రాయబారి తిరుమూర్తి ఆదివారం(ఆగస్టు-1,2021)UNSC అధ్యక్ష బాధ్యతలను స్వీకరించారు.

యూఎన్ భద్రతా మండలిలో నెలకొక దేశం(శాశ్వత,తాత్కాలిక సభ్య దేశాలు)అధ్యక్ష బాధ్యతలు చేపడుతోంది. ఇందులో భాగంగా ఆదివారం(ఆగస్టు-1,2021)జులై నెలలో అధ్యక్ష బాధ్యతలను నిర్వహించిన ఫ్రాన్స్‌ నుంచి ఈ బాధ్యతలను భారత్​ స్వీకరించింది. UNSCకి భారత్​ అధ్యక్షత వహించడాన్ని ఫ్రాన్స్​, రష్యా సహా పలు సభ్య దేశాలు స్వాగతించాయి.

ఈ ఏడాది జనవరి నుంచి ఐరాస భద్రతా మండలిలో తాత్కాలిక సభ్యదేశంగా భారత్​ తన ప్రయాణాన్ని ప్రారంభించింది. అప్పటి నుంచి ప్రపంచ శాంతికి భంగం కలిగించే ఎన్నో అంశాలను శాంతియుతంగా పరిష్కరించడంలో కీలక పాత్ర పోషిస్తూ వస్తోంది. భద్రతా మండలిలో 2021-22 కాలపరిమితిలో తాత్కాలిక సభ్యదేశంగా ఉన్న భారత్​…UNSC అధ్యక్ష బాధ్యతలు చేపట్టడం ఇదే మొదటిసారి. అయితే,వచ్చే ఏడాది డిసెంబర్‌ లోనూ భారత్‌ మరోమారు UNSCకి అధ్యక్షత వహించనుంది.

ఈ సందర్భంగా UNSC అధ్యక్షడు తిరుమూర్తి మాట్లాడుతూ..చారిత్రక, సన్నిహత సంబంధాలను భారత్​, ఫ్రాన్స్​ కలిగి ఉన్నాయి. భద్రతా మండలిలో భారత్​కు సహకారం అందించినందుకు ఆ దేశానికి కృతజ్ఞతలు. భారత్​ తన అధ్యక్ష హయాంలో…సముద్ర తీర భద్రతకు, శాంతి పరిరక్షణకు, ఉగ్రవాదానికి వ్యతిరేకంగామూడు ఉన్నత స్థాయి సమావేశాలను నిర్వహించనున్నట్లు తిరుమూర్తి తెలిపారు. ఆయా అంశాలపై ఈ నెలలోనే సంతకాల సేకరణ చేపడుతామని ప్రకటించారు. సభ్య దేశాలతో భారత్‌ సమన్వయంతో పని చేస్తుందని విదేశాంగ శాఖ మంత్రి జైశంకర్‌ ప్రకటించారు.

UNSC భారత్ అధ్యక్ష కాలంలో ఓ సమావేశానికి ప్రధాని నరేంద్ర మోదీ అధ్యక్షత వహించనున్నారని ఐక్యరాజ్య సమితికి భారత మాజీ రాయబారి సయ్యద్​ అక్బరుద్దీన్​ తెలిపారు. ఇలా యూఎన్​ఎసీలో సమావేశం నిర్వహించనున్న తొలి భారత ప్రధాని మోదీనేనని ఆయన తెలిపారు.

10TV Telugu News