Chandrababu Naidu: సుప్రీంకోర్టులో చంద్రబాబుకు భారీ ఊరట.. గత ప్రభుత్వం పిటిషన్ కొట్టివేత
సుప్రీంకోర్టులో ఏపీ ముఖ్యమంత్రి చంద్రబాబు నాయుడుకు భారీ ఊరట లభించింది. స్కిల్ డెవలప్మెంట్ కేసులో బెయిల్ రద్దు చేయాలని
- Published By: 10TV Digital Team ,Published On : January 15, 2025 / 01:21 PM IST
CM Chandrababu Naidu
Chandrababu Naidu: సుప్రీంకోర్టులో ఏపీ ముఖ్యమంత్రి చంద్రబాబు నాయుడుకు భారీ ఊరట లభించింది. స్కిల్ డెవలప్మెంట్ కేసులో బెయిల్ రద్దు చేయాలని గత వైసీపీ ప్రభుత్వం దాఖలు చేసిన పిటిషన్ ను సుప్రీంకోర్టు జస్టిస్ బేలా త్రివేది ధర్మాసనం కొట్టివేసింది. వైసీపీ ప్రభుత్వంలో స్కిల్ డెవలప్ మెంట్ కేసులో అప్పటి ప్రతిపక్ష నేతగా ఉన్న చంద్రబాబు నాయుడు అరెస్టై రాజమండ్రి సెంట్రల్ జైలుకు వెళ్లిన విషయం తెలిసిందే. దాదాపు 53 రోజులపాటు చంద్రబాబు జైల్లోనే ఉన్నారు. ఆ సమయంలో ఆయన అనారోగ్యం పాలయ్యారు. అదే సమయంలో హైకోర్టు చంద్రబాబుకు బెయిల్ మంజూరు చేసింది.
Also Read: KTR: సుప్రీంకోర్టులో కేటీఆర్‌కు ఎదురుదెబ్బ.. క్వాష్ పిటిషన్ కొట్టివేత
స్కిల్ డెవలప్ మెంట్ కేసులో 2023 నవంబర్ లో చంద్రబాబు కు ఏపీ హైకోర్టు బెయిల్ మంజూరు చేయగా.. బెయిల్ రద్దు చేయాలని కోరుతూ అప్పటి వైసీపీ ప్రభుత్వం హైకోర్టును ఆశ్రయించింది. రాష్ట్ర ప్రభుత్వం దాఖలు చేసిన బెయిల్ రద్దు పిటిషన్ ను డిస్మిస్ చేస్తూ హైకోర్టు ఉత్తర్వులు ఇచ్చింది. హైకోర్టు తీర్పును సవాల్ చేస్తూ గత ప్రభుత్వం సుప్రీంకోర్టుకు వెళ్లింది. ప్రస్తుతం ఆ పిటిషన్ ను కోర్టు కొట్టివేసింది. ఈ కేసులో ఇప్పటికే చార్జిషీట్ ఫైల్ చేశారని రాష్ట్ర ప్రభుత్వం తరపున న్యాయవాది ముకుల్ రోహిత్గి తెలిపారు. చార్జిషీట్ దాఖలు చేసినందున బెయిల్ రద్దు పిటిషన్‌లో జోక్యం చేసుకోవాల్సిన అవసరం లేదని జస్టిస్ బేలా త్రివేది ధర్మాసనం పేర్కొంది. అవసరం అయిన సందర్భంలో విచారణకు సహకరించాలని చంద్రబాబుకు సుప్రీంకోర్టు సూచించింది.
మరోవైపు చంద్రబాబు బెయిల్ రద్దు చేయాలని స్వర్ణాంద్ర పత్రిక విలేకరి ఇంటర్ లొకేటరీ అప్లికేషన్ దాఖలు చేశారు. దీంతో సుప్రీంకోర్టు ఆగ్రహం వ్యక్తం చేసింది. మీరెవరు..? మీకేం సంబంధం..? పిల్ దాఖలు చేయడానికి ఉన్న అర్హత ఏమిటని ప్రశ్నించింది. బెయిల్ వ్యవహారాల్లో మూడో వ్యక్తి ఎందుకు ఉంటారని ధర్మాసనం ప్రశ్నించింది. సంబంధంలేని బెయిల్ వ్యవహారాల్లో పిటిషన్ ఎలా వేస్తారని జస్టిస్ బేలా త్రివేది ధర్మాసనం తీవ్ర ఆగ్రహం వ్యక్తం చేసింది. ఇది ఇంకోసారి జరిగితే తీవ్ర పరిణామాలు ఉంటాయని హెచ్చరించిన ధర్మాసనం.. సదరు విలేకరి దాఖలు చేసిన ఇంటర్ లొకేటరీ అప్లికేషన్ ను డిస్మిస్ చేసింది.
