అంతా జియో వాళ్లే: వాచ్‌మెన్లు నుంచీ డెలివరీ బాయ్స్ వరకు

జియో కేవలం టెలికాం రంగంలోనే కాదు.. అన్నింటిలోనూ దూసుకెళ్తోంది. కొద్ది నెలల ముందే మొదలుపెట్టిన బ్రాడ్ బ్యాండ్ సేవలు అధికారికంగా అమలులోకి రావడానికి మరి కొద్ది రోజుల సమయం మాత్రమే ఉంది. ఇదిలా ఉంటే మరో సెషన్‌లోకి వచ్చేందుకు రంగం సిద్ధం చేసుకుంది. తాజాగా అపార్ట్‌మెంట్ల భద్రత నిర్వహణ సేవల విభాగంలోకి ప్రవేశిస్తోంది. 

ఇందుకు సంబంధించి యాపిల్ యాప్ స్టోర్, గూగుల్ ప్లే స్టోర్లో జియో గేట్ పేరుతో కొత్త యాప్ ప్రత్యక్షమవడం ఈ వార్తలకు ఊతమిస్తోంది. గేటెడ్ కమ్యూనిటీల్లో విజిటర్లు మొదలుకొని రోజువారీ సిబ్బంది, డెలివరీ బాయ్స్, క్యాబ్స్ దాకా అన్నింటి రాకపోకల నిర్వహణ అంతా జియోగేట్ క్రమబద్దీకరిస్తుందని యాప్ గురించిన వివరణలో ఉంది. 

‘దొంగతనాలు, నేరాలపై ఆందోళన లేకుండా కమ్యూనిటీ పరిసర ప్రాంతాలను సురక్షితంగా తీర్చిదిద్దేలా సెక్యూరిటీ నిర్వహణ ప్రక్రియను సమూలంగా మారుస్తున్నాం’ అని యాప్ గురించి జియో పేర్కొంది.

ప్రత్యర్థి సంస్థలకు గట్టిపోటీ: ప్రస్తుతం మైగేట్, అపార్ట్‌మెంట్ అడ్డా, స్మార్ట్ గార్డ్ వంటి సంస్థలు యాప్ ఆధారిత అపార్ట్‌మెంట్ కాంప్లెక్స్ మేనేజ్‌మెంట్ సేవలు అందిస్తున్నాయి. జియో గానీ భారీ ఎత్తున వస్తే వీటికి గట్టి పోటీనివ్వొచ్చని పరిశ్రమవర్గాలు భావిస్తున్నాయి. జియోగేట్ ఫీచర్స్‌ను బట్టి చూస్తే యూజర్లు తమ స్మార్ట్ ఫోన్లనే ఇంటర్ కామ్ డివైజ్ గా కూడా వాడుకోవచ్చన్నట్లు తెలుస్తోంది. అత్యవసర పరిస్థితుల్లో తామెక్కడ ఉన్నామో కుటుంబ సభ్యులు, సెక్యూరిటీ గార్డుకు తెలియజేసేందుకు వీలుగా పానిక్ అలర్ట్ ఫీచర్ కూడా ఇందులో ఉంది.