Lucent Drugs: హైదరాబాద్ టు పాకిస్తాన్‌.. ఇల్లీగల్ ఎక్స్‌పోర్ట్.. ఫార్మా కంపెనీ ఆస్తులు జప్తు చేసి ఈడీ..
లుసెంట్ సంస్థ చెందిన 5.46 కోట్ల విలువైన భవనాలు, ఫ్యాక్టరీ ప్రాంగణాలను తాత్కాలికంగా జప్తు చేసింది ఈడీ.
- Published By: 10TV Digital Team ,Published On : August 11, 2025 / 11:26 PM IST
Lucent Drugs: హైదరాబాద్ చెందిన లుసెంట్ డ్రగ్స్ ప్రైవేట్ లిమిటెడ్ కంపెనీ అస్తులను ఈడీ (ఎన్ ఫోర్స్ మెంట్ డైరెక్టరేట్) జప్తు చేసింది. ట్రామడాల్ అనే నిషిద్ధ మాదక ద్రవ్యాన్ని పాకిస్థాన్‌కు ఎగుమతి చేసిందని లుసెంట్ డ్రగ్స్ పై ఆరోపణ ఉంది. బెంగళూరు నార్కోటిక్స్ కంట్రోల్ బ్యూరో ఇచ్చిన ఫిర్యాదుగా ఆధారంగా ఈడీ దర్యాప్తు చేస్తోంది. లుసెంట్ మేనేజింగ్ డైరెక్టర్ వినోద్ జైన్, ఉపాధ్యక్షుడు దేవరశెట్టి సాయి వికాస్, గంగుల ఈశ్వర రావు ట్రామడాల్ విదేశాలకు పంపినట్లు గుర్తించింది.
చట్ట విరుద్ధంగా ట్రామడాల్ ఎగుమతి చేసిందని విచారణలో తేల్చింది ఈడీ. డెన్మార్క్‌, మలేషియాలోని వినియోగదారుల నుంచి పాకిస్ధాన్ కు అక్రమంగా ఎగుమతి చేసినట్లు గుర్తించింది. 13వేల 800 కేజీల ట్రామడాల్‌ను అక్రమంగా పాకిస్థాన్‌కు ఎగుమతి చేసినట్లు కనుగొంది. ట్రామడాల్ ఎగుమతుల ద్వారా 5.46 కోట్లు అక్రమంగా సంపాదించినట్లు ఈడీ గుర్తించింది. లుసెంట్ సంస్థ చెందిన 5.46 కోట్ల విలువైన భవనాలు, ఫ్యాక్టరీ ప్రాంగణాలను తాత్కాలికంగా జప్తు చేసింది ఈడీ.
మనీలాండరింగ్ నిరోధక చట్టం (PMLA) చట్టంలోని నిబంధనలను ఉల్లంఘించినందుకు, ట్రామాడోల్ తయారీ, ఎగుమతి చేసినందుకు లూసెంట్ డ్రగ్స్ ప్రైవేట్ లిమిటెడ్‌పై ఎన్‌ఫోర్స్‌మెంట్ డైరెక్టరేట్ (ED) కేసు నమోదు చేసింది.
లూసెంట్ డ్రగ్స్ మేనేజింగ్ డైరెక్టర్ వినోద్ జైన్, అసోసియేట్ వైస్ ప్రెసిడెంట్ దేవరశెట్టి సాయి వికాస్, లాజిస్టిక్స్ అండ్ సేల్స్ ఎగ్జిక్యూటివ్ గంగుల ఈశ్వరరావు, ఇతరులు సైకోట్రోపిక్ పదార్థాల నిబంధనలను ఉల్లంఘించడం, భారతదేశం నుండి వాటిని అక్రమంగా ఎగుమతి చేయడం, NDPS చట్టం ఉల్లంఘన, వివిధ ఎగుమతి అధికారాల రికార్డులు పత్రాలను నకిలీ చేయడం వంటి ఆరోపణలపై నార్కోటిక్స్ కంట్రోల్ బ్యూరో (NCB), బెంగళూరు జోనల్ యూనిట్ దాఖలు చేసిన ఫిర్యాదుపై ED గతంలో దర్యాప్తు ప్రారంభించింది.
లూసెంట్ డ్రగ్స్ పాకిస్తాన్‌లోని క్లయింట్‌లతో సహా తన విదేశీ క్లయింట్‌లకు ట్రామాడోల్ అనే ఓపియాయిడ్‌ను తయారు చేసి ఎగుమతి చేసే వ్యాపారంలో ఉందని ED దర్యాప్తులో తేలింది. హైదరాబాద్‌కు చెందిన ఈ కంపెనీ మొదట్లో ట్రామాడోల్‌ను పాకిస్తాన్‌కు ఎగుమతి చేయడానికి సెంట్రల్ బ్యూరో ఆఫ్ నార్కోటిక్స్ నుండి NOC పొందింది. అయితే, తరువాత, సెంట్రల్ బ్యూరో ఆఫ్ నార్కోటిక్స్.. పాకిస్తాన్‌కు ట్రామాడోల్ ఎగుమతికి అనుమతి నిరాకరించింది.
పాకిస్తాన్‌కు ట్రామాడోల్ ఎగుమతిపై నిషేధాన్ని తప్పించుకోవడానికి నిందితులు 4.12 కోట్ల విలువైన 13,800 కిలోల ట్రామాడోల్‌ను డెన్మార్క్‌కు చెందిన వారి విదేశీ క్లయింట్ CHR ఒలెసెన్ ఫార్మాస్యూటికల్స్ ద్వారా పాకిస్తాన్‌కు చట్టవిరుద్ధంగా తిరిగి ఎగుమతి చేశారు. 1.34 కోట్ల విలువైన మరో 5వేల కిలోల ట్రామాడోల్‌ను మలేషియాకు చెందిన SM బయోమెడ్ కంపెనీ ద్వారా పాకిస్తాన్‌కు ఎగుమతి చేసి ఆదాయాన్ని పొందారు. లూసెంట్ డ్రగ్స్‌కు చెందిన 5.46 కోట్ల విలువైన భవనం, ఫ్యాక్టరీ ప్రాంగణాలు సహా స్థిరాస్తులనూ ఈడీ గతంలో జప్తు చేసిందని ఒక ప్రకటనలో తెలిపింది.
Also Read: ఉదయం బ్రేక్ ఫాస్ట్, టిఫిన్ మానేస్తున్నారా.. కొత్త రోగాలను కొని తెచ్చుకున్నట్టే.. జాగ్రత్త సుమీ
