రికార్డు బ్రేక్ చేసిన ఫిల్మ్ నగర్ లడ్డూ

హైదరాబాద్ గణేష్ వేడుకల్లో రికార్డు స్థాయిలో వేలం జరిగే బాలాపూర్‌ లడ్డూకు ప్రత్యేక స్ధానం ఉంది. భక్తుల కొంగు బంగారంగా బాలాపూర్‌ గణేష్ లడ్డూ ప్రసిద్ధి పొందింది. బాలాపూర్ లడ్డు అంటే తెలుగు రాష్ట్రాల్లో ఓ ప్రత్యేకత ఉంది. తెలుగు రాష్ట్రాల్లోనే రికార్డు స్థాయిలో ఈ లడ్డును వేలం పాటలో దక్కించుకుంటుంటారు. ఈ సంవత్సరం కూడా కొలను రామ్ రెడ్డి రూ. 17 లక్షల 60 వేలకు పాడి ఈ లడ్డూను దక్కించుకోగా గత రికార్డులను తిరగరాసింది. అయితే ఈ రికార్డును పడగొట్టేసింది ఫిలింనగర్‌లోని వినాయక నగర్‌లోని గణేశ్ లడ్డూ.

బీజేపీ నేత పల్లపు గోవర్థన్ 17 లక్షల 75 వేల రూపాయలకు వినాయక నగర్‌ లడ్డూను సొంతం చేసుకున్నారు. వేలం పాటలో ఈ ఏడాది పలువురు భక్తులు పోటీ పడగా గతేడాది ల‌డ్డూను 15 లక్షల 1116 రూపాయలకు సొంతం చేసుకున్న పల్లపు గోవర్థనే ఈ సంవత్సరం కూడా లడ్డూను సొంతం చేసుకున్నారు. 2016, 2017, 2018 నుంచి లడ్డూ బాగా ప్రాచుర్యం పొందగా ప్ర‌తి ఏడాది రేటు పెరిగిపోతూ వ‌స్తోంది.