Cake Candles : కేకుల‌పై క్యాండిల్స్ ఊదడం ఎంత ప్రమాదమో తెలుసా?

బర్త్ డే, పెళ్లి రోజు, న్యూఇయర్.. ఈ అకేషన్స్ వచ్చాయంటే సెలబ్రేషన్స్ పీక్ లో ఉంటాయి. చిన్న, పెద్ద.. పేద, ధనిక అన్న తేడా లేదు.. అందరూ తమ స్థాయిని బట్టి

Cake Candles

Cake Candles : బర్త్ డే, పెళ్లి రోజు, న్యూఇయర్.. ఈ అకేషన్స్ వచ్చాయంటే సెలబ్రేషన్స్ పీక్ లో ఉంటాయి. చిన్న, పెద్ద.. పేద, ధనిక అన్న తేడా లేదు.. అందరూ తమ స్థాయిని బట్టి వీటిని వేడుకలా జరుపుకోవడం కామన్. ఇక.. ఈ మూడింటిలో.. సంద‌ర్భం ఏదైనా ఒక్క‌టి మాత్రం కామ‌న్‌. అదే కేక్ క‌టింగ్.

కేక్ కట్ చేస్తేనే సెలబ్రేషన్స్ పూర్తి అయినట్టుగా చాలామంది ఫీలింగ్. కేక్ కట్ చేసి దాన్ని టేస్ట్ చేస్తే ఆ ఎంజాయ్ మెంటే వేరుగా ఉంటుంది. అయితే, ఇలా కేక్ క‌ట్ చేసే సంద‌ర్భంలో ఆ కేక్‌ల‌పై క్యాండిళ్లు పెట్టి ఊదుతుంటారు చాలామంది. మరీ ముఖ్యంగా బర్త్ డే సెలబ్రేషన్స్ లో ఇలా చేయడం ఎక్కువ. కానీ, ఇలా కేక్‌ల‌పై క్యాండిళ్లు వెలిగించి వాటిని ఊదడం చాలా ప్ర‌మాద‌క‌రం అని మీకు తెలుసా..? చేతులారా మీ ఆరోగ్యాన్ని దెబ్బతీసుకున్నట్టే అని మీకు తెలుసా? వేడుకకు వచ్చిన బంధుమిత్రుల ఆరోగ్యాన్ని రిస్క్ లో పడేసినట్టే అని తెలుసా?

కేకులపై కొవ్వొత్తులు వెలిగించి ఊదడం ఎందుకు ప్రమాదకరం అంటే.. కేకుల‌పై క్యాండిళ్ల‌ను నోటితో ఊదడం వల్ల లాలాజలం ఎంతోకొంత తుంపరగా వాటిపై పడుతుంది. అప్పుడు లాలాజలంలో ఉండే బ్యాక్టీరియా కేకులో చేరుతుంది. ఇలా చేరిన బ్యాక్టీరియా కేక్‌పై ఉన్న చల్లని క్రీమ్‌ లేయర్ వ‌ల్ల 15 వేల శాతానికిపైగా పెరిగి కేక్‌ మొత్తం విస్తరిస్తుందట. ఇది ఆరోగ్యానికి చాలా ప్ర‌మాద‌క‌రం అని నిపుణులు చెబుతున్నారు.

కేక్‌పైన క్యాండిల్ ఊదిన వ్యక్తి ఆరోగ్యవంతుడైతే అత‌ని తుంప‌ర్ల‌తో వ‌చ్చే బ్యాక్టీరియా అంతగా హాని చేయదట. మనలోని వ్యాధినిరోధక వ్యవస్థకు ఆ బ్యాక్టీరియాను ఎదిరించే శక్తి ఉంటుందట. కానీ ఆ వ్యక్తికి కనుక జలుబు, దగ్గు, ఫ్లూ జ్వరం లాంటి ఇన్ఫెక్షన్లు ఉంటే మాత్రం అవి కచ్చితంగా కేక్‌ తిన్న అందరికీ అంటుకుంటాయట. అందుకే మనం కేకులు కట్‌ చేసినా.. వాటిపైన క్యాండిళ్లు పెట్టి ఊదే సంప్రదాయాన్ని మాత్రం వ‌దిలి పెట్టాల్సిందే. లేదంటే భారీ మూల్యం చెల్లించుకోవాల్సిందే అని నిపుణులు హెచ్చరిస్తున్నారు.

నోటి తుంప‌ర్ల‌లోని బ్యాక్టీరియాతోనే ఇంత ప్ర‌మాదం ఉందంటే.. ఇప్పుడు దానికి క‌రోనా వైర‌స్ కూడా తోడైంది. అంటే మ‌నం ఈ విష‌యంలో మ‌రింత జాగ్ర‌త్త‌గా ఉండాల్సిన అవ‌స‌రం ఉంది. ఇదేమీ మిమ్మల్ని భయపెట్టడానికి ఇప్పుడు కొత్తగా చెబుతున్న‌ విషయమేమీ కాదు. చాలా రోజుల క్రితమే దక్షిణ కరోలినాలోని క్లెమ్సన్‌ యూనివర్సిటీకి చెందిన పరిశోధకులు శాస్త్రీయంగా ఈ విష‌యాన్ని నిరూపించారు.

కేక్‌పై క్యాండిల్‌ను ఊదినప్పుడు నోటి నుంచి ప‌డిన బ్యాక్టీరియాతో పోల్చితే 15 నిమిషాల తర్వాత ఆ కేక్‌పై‌ బ్యాక్టీరియా దాదాపు 15 వేల శాతం ఎక్కువ‌గా ఉంద‌ని పరిశోధకులు ఎన్నో పరిశోధనలు చేసి గుర్తించారు. అందుకే పుట్టినరోజు వేడుకల్లో కేక్‌పై క్యాండిల్స్‌ పెట్టి ఊదే పద్ధతికి స్వస్తి పలకడమే ఆరోగ్యానికి మంచిదని నిపుణులు అంటున్నారు. లేదు కచ్చితంగా ఊదాల్సిందే అంటే.. అప్పుడు.. ఓ కేక్ పీస్ కట్ చేసి దానిపై క్యాండిల్స్ వెలిగించి ఊదటం ఉత్తమం. అలా చేయడం ద్వారా మిగతా కేక్ పూర్తి సురక్షితంగా ఉంటుంది.