మెగాస్టార్‌తో టీఎఫ్‌జేఏ నూతన కమిటీ సమావేశం.. సినీ జర్నలిస్టులకు చిరంజీవి భరోసా!
భవిష్యత్తులో జర్నలిస్టుల కోసం హౌసింగ్ సొసైటీ (ఇళ్ల నిర్మాణం), క్లబ్ హౌస్ వంటివి ఏర్పాటు చేయడానికి ప్రయత్నిస్తున్నట్లు కూడా చిరంజీవికి చెప్పారు
- Published By: Mahesh T ,Published On : October 25, 2025 / 09:27 PM IST
కొత్తగా ఎన్నికైన తెలుగు ఫిల్మ్ జర్నలిస్ట్ అసోసియేషన్ (TFJA) కమిటీ మెంబర్స్ మెగాస్టార్ చిరంజీవిని కలిశారు. ఈ సందర్భంగా TFJA కమిటీ సభ్యులు చిరంజీవికి తమ అసోసియేషన్ చేస్తున్న మంచి పనులను వివరించారు.
ముఖ్యంగా ఫిల్మ్ జర్నలిస్టులకు హెల్త్ ఇన్సూరెన్స్ అందిస్తున్నట్లు చెప్పారు. అలాగే ఏదైనా ప్రమాదం జరిగితే ఆదుకోవడానికి యాక్సిడెంటల్ పాలసీ ఉందని వివరించారు. ఇవే కాకుండా మరిన్ని సహాయ కార్యక్రమాలు చేస్తున్నట్లు తెలిపారు.
భవిష్యత్తులో జర్నలిస్టుల కోసం హౌసింగ్ సొసైటీ (ఇళ్ల నిర్మాణం), క్లబ్ హౌస్ వంటివి ఏర్పాటు చేయడానికి ప్రయత్నిస్తున్నట్లు కూడా చిరంజీవికి చెప్పారు. ప్రస్తుతం చేస్తున్న మంచి పనులను కొనసాగిస్తూనే, సభ్యులందరి శ్రేయస్సుకు కృషి చేస్తామని అన్నారు.
చిరంజీవి ప్రశంసలు, హామీ:
సినిమా జర్నలిస్టుల కోసం TFJA చేస్తున్న ఈ సంక్షేమ పనులను మెగాస్టార్ చిరంజీవి చాలా మెచ్చుకున్నారు. తెలుగు ఫిల్మ్ జర్నలిస్ట్ అసోసియేషన్‌కు తన వంతు సహాయం ఎప్పుడూ ఉంటుందని చిరంజీవి మాటిచ్చారు.
చిరంజీవిని కలిసిన వారిలో TFJA అధ్యక్షుడు వై.జె.రాంబాబు, ప్రధాన కార్యదర్శి ప్రసాదం రఘు, కోశాధికారి సురేంద్ర కుమార్ నాయుడు, ఇతర కమిటీ సభ్యులు ఉన్నారు.
