‘రామనామం’ఇటుకలు : రామ మందిరానికి ఇటుకల బట్టీ యజమాని విరాళం

రామ మందిర నిర్మాణానికి సుప్రీంకోర్టు చారిత్రాత్మక తీర్పుతో మార్గం సుగమమం అయ్యింది. దీంతో రామ మందిర నిర్మాణానికి విరాళాలు ఇచ్చేందుకు పలువురు ఉత్సాహం చూపుతున్నారు. ఇప్పటికే పలు సంస్థలు..ట్రస్ట్ లు భారీ విరాళాలను ప్రకటించాయి.

ఈ క్రమంలో ఉత్తరప్రదేశ్ లోని తక్పురాకు చెందిన బీకే ఇటుకల బట్టీ యజమాని మాలికా సందీప్ వర్మ  రామ మందిర నిర్మాణానికి తనవంతుగా 51 వేల ఇటుకల్ని విరాళంగా ఇస్తున్నట్లు తెలిపారు. అలా ఇస్తున్న ఇటుకలపై ఓ శ్రీరామ్ అని రాముడి పేరును కూడా పొందుపరిచారు. 

రామాలయంలోని గర్భాలయంలో నిర్మాణ పనులకు 51 వేల ఇటుకలు విరాళంగా ఇస్తున్నట్లు ప్రకటించారు. ఈ ఇటుకలన్నింటిపై రామనామం రాసి ఉంటుంది. ఈ సందర్భంగా సందీప్ మాట్లాడుతూ.. రామాలయ నిర్మాణానికి అనుకూలంగా తీర్పు రాగానే తాను ఇటుకలు ఇవ్వాలని నిర్ణయించుకున్నానని తెలిపారు. ఈ ఇటుకలన్నింటిపైనా రామనామం రాయిస్తున్నట్లు తెలిపారు. ఈ ఇటుకలను ఎంతో శ్రద్ధగా..భక్తితో తయారు చేయిస్తున్నామని తెలిపారు.

మొత్తం 18 బట్టీలలో ఇటుకలు తయారవుతున్నాయని, ఇప్పటికే 4 వేల ఇటుకలు సిద్ధమయ్యాయన్నారు. మిగిలినవి తయారవుతున్నాయని సందీప్ వర్మ తెలిపారు. ఈ ఇటుకల తయారీకి ప్రత్యేకమైన మట్టిని వాడుతున్నామనీ..ఇటుకల తయారీకి 16మంది కూలీలు రాత్రి పగలు కష్టపడి ఎంతో భక్తిశ్రద్ధలతో పనిచేస్తున్నారని తెలిపారు.