ఆగస్టులో హ్యూమన్ ట్రయిల్స్ ప్రారంభించనున్న సీరమ్​ ఇన్​స్టిట్యూట్…డిసెంబర్ కల్లా కరోనా వ్యాక్సిన్

కరోనా మహమ్మారిని కట్టడి చేసేందుకు ప్రపంచ దేశాలు వ్యాక్సిన్​ కోసం ముమ్మర ప్రయోగాలు చేస్తున్నాయి. ఈ నేపథ్యంలో ఈ ఏడాది చివరి నాటికి కొవిడ్​-19 టీకా వచ్చే అవకాశం ఉన్నట్లు సీరమ్​ ఇన్​స్టిట్యూట్​ ఆఫ్​ ఇండియా అంచనా వేసింది. టీకా అభివృద్ధిలో ఏడు దేశీయ సంస్థలు ముందంజలో ఉన్నట్లు తెలిపింది.

సీరమ్‌ ఇన్‌స్టిట్యూట్‌ సీఈఓ అడార్‌ పూనావాలా మాట్లాడుతూ…ప్రస్తుతం మూడో దశ క్లినికల్‌ ట్రయల్స్‌ జరుపుకుంటున్న ఆస్ట్రాజెనెకా ఆక్స్‌ఫర్డ్‌ వ్యాక్సిన్‌పై పనిచేస్తున్నాం. వచ్చే నెలలో భారత్‌లో సైతం మనుషులపై ప్రయోగాలు ప్రారంభిస్తాం. ప్రస్తుత పరిస్థితులు, ప్రయోగాత్మక పరీక్షల ఫలితాలను చూస్తే.. ఏడాది చివరికి ఆస్ట్రాజెనెకా ఆక్స్‌ఫర్డ్‌ వ్యాక్సిన్‌ అందుబాటులోకి వచ్చే అవకాశం ఉంది. అమెరికాకు చెందిన బయోటెక్‌ సంస్థ కొడాజెనిక్స్‌తో కలిసి సీరమ్‌ ఇన్‌స్టిట్యూట్‌ ఈ వ్యాక్సిన్‌ను అభివృద్ధి చేస్తున్నట్లు పూనావాలా తెలిపారు.

ఆస్ట్రాజెనెకా, కొడాజెనిక్స్‌లతో పాటు ప్రపంచవ్యాప్తంగా పలు సంస్థలతో కలిసి పనిచేస్తున్నామని, ఆస్ట్రియాకు చెందిన ధెమిస్‌, మరో రెండు సంస్థలు ఇందులో ఉన్నాయని పూనావాలా అన్నారు. ఆక్స్‌ఫర్డ్‌ అభివృద్ధి చేస్తున్న కొవిడ్‌-19 వ్యాక్సిన్‌ను 100 కోట్ల డోసుల ఉత్పత్తి, సరఫరా నిమిత్తం ఆస్ట్రాజెనెకాతో తయారీ ఒప్పందాన్ని కుదుర్చుకున్నట్లు వెల్లడించారు. ఈ వ్యాక్సిన్‌లు భారత్‌తో పాటు తక్కువ ఆదాయం ఉన్న దేశాల్లో లభిస్తాయని స్పష్టం చేశారు.

నెలల వ్యవధిలోనేప్రస్తుతం ఏడు భారత ఔషధ సంస్థలు కొవిడ్‌ వ్యాక్సిన్‌ అభివృద్ధికి రేయింబవళ్లు శ్రమిస్తున్నాయి.వాస్తవానికి వ్యాక్సిన్‌ పరీక్షలు, ఉత్పత్తి చేయడానికి కొన్నేళ్ల సమయం పడుతుంది. కానీ నెలల వ్యవధిలోనే తీసుకురావడానికి శాస్త్రవేత్తలు కృషి చేస్తున్నారు. భారతదేశంలో కరోనావైరస్ వ్యాక్సిన్లపై పనిచేస్తున్న దేశీయ ఫార్మా సంస్థలలో… భారత్ బయోటెక్, సీరం ఇన్స్టిట్యూట్, జైడస్ కాడిలా, పనాసియా బయోటెక్, ఇండియన్ ఇమ్యునోలాజికల్స్, మైన్వాక్స్ మరియు బయోలాజికల్ ఇ ఉన్నాయి

భారత్‌ బయోటెక్‌ ముందంజ

కరోనా వ్యాక్సిన్‌ తయారీలో భారత్‌ బయోటెక్‌ ముందంజలో ఉంది. ఐసీఎంఆర్‌, ఎన్‌ఐవీ వంటి దిగ్గజ సంస్థలతో కలిసి అభివృద్ధి చేసిన కొవాగ్జిన్‌ వ్యాక్సిన్‌ మొదటి, రెండో దశ క్లినికల్‌ ట్రయల్స్‌కు ఇప్పటికే అనుమతులు లభించగా, చేపట్టారు కూడా. కంపెనీ హైదరాబాద్‌ కేంద్రంలో కొవాగ్జిన్‌ అభివృద్ధి, తయారీలను చేపట్టారు.