Farook Abdullah: అలా అయితే కశ్మీర్ మరో గాజా, పాలస్తీనా అవుతుంది.. ఫారూఖ్ అబ్దుల్లా సంచలన వ్యాఖ్యలు
జమ్మూ కాశ్మీర్‌లోని పూంచ్ జిల్లాలో గురువారం (డిసెంబర్ 21) ఉగ్రవాదులు ఆర్మీ ట్రక్, జిప్సీపై మెరుపుదాడి చేశారు. రెండు ఆర్మీ వాహనాలపై ఉగ్రవాదులు జరిపిన దాడిలో నలుగురు జవాన్లు వీరమరణం పొందగా, ముగ్గురు గాయపడ్డారు.
- Published By: 10TV Digital Team ,Published On : December 26, 2023 / 03:26 PM IST
కశ్మీర్‌లో ఉగ్రవాదం, దానికి సంబంధించి సైన్యం చర్యపై నేషనల్ కాన్ఫరెన్స్ అధినేత ఫరూక్ అబ్దుల్లా భారీ ప్రకటన చేశారు. చర్చల ద్వారానే సమస్యకు పరిష్కారం లభిస్తుందని, లేకుంటే మన పరిస్థితి గాజా, పాలస్తీనాలాగ తయారవుతుందని అన్నారు. జమ్మూకశ్మీర్‌లో ఉగ్రవాదం అంతం కాబోదని ఆయన అన్నారు. గతం కంటే ప్రస్తుతం పరిస్థితులు తీవ్ర రూపం దాల్చాయని, నేడు ముస్లింలు, హిందువులు ఒకరికొకరు శత్రువులమని భావించేంతగా ద్వేషం పెరిగిపోయిందని అన్నారు. పాకిస్థాన్‌లో నవాజ్ షరీఫ్ ప్రధాని కాబోతున్నారని, ఆయన చర్చలకు సిద్ధమైతే మనం ఎందుకు చేయకూడదని ఫారూఖ్ ప్రశ్నించారు.
పొరుగువారితో స్నేహం మంచిది
మాజీ ప్రధాని అటల్ బిహారీ వాజ్‌పేయి ప్రకటనను ఫరూక్ అబ్దుల్లా ప్రస్తావిస్తూ.. “స్నేహితులను మార్చవచ్చు, పొరుగువారిని మార్చలేరు. మన పొరుగువారితో స్నేహంగా ఉంటే, ఇద్దరూ పురోగమిస్తారు. వారితో శత్రుత్వంతో ఉంటే, మనం త్వరగా అభివృద్ధి చెందలేము. నేటి యుగంలో యుద్ధం అనేది ఒక ఆప్షన్ కాదని మోదీజీ స్వయంగా చెప్పారు. చర్చల ద్వారానే సమస్య పరిష్కారం అవుతుంది. ఆ సంభాషణ ఎక్కడ ఉంది? ఇప్పుడు నవాజ్ షరీఫ్ ప్రధాని కాబోతున్నారు. ఆయన ఉగ్రవాదంపై మన దేశంతో మాట్లాడాలనుకుంటున్నారు. మనం ఎందుకు మాట్లాడలేము?’’ అని అన్నారు.
డిసెంబర్ 21న ఉగ్రవాదుల దాడి
జమ్మూ కాశ్మీర్‌లోని పూంచ్ జిల్లాలో గురువారం (డిసెంబర్ 21) ఉగ్రవాదులు ఆర్మీ ట్రక్, జిప్సీపై మెరుపుదాడి చేశారు. రెండు ఆర్మీ వాహనాలపై ఉగ్రవాదులు జరిపిన దాడిలో నలుగురు జవాన్లు వీరమరణం పొందగా, ముగ్గురు గాయపడ్డారు. ఈ ఉగ్రదాడి తర్వాత భారత ఆర్మీ సైనికులు కూడా వెంటనే ప్రతీకారం తీర్చుకుని కొందరు ఉగ్రవాదులను హతమార్చారు. నెల వ్యవధిలో ఈ ప్రాంతంలో సైన్యంపై ఉగ్రవాదులు దాడి చేయడం ఇది రెండోసారి.
రాజౌరి, పూంచ్‌లలో పెద్దఎత్తున దాడులు జరిగాయి
22-23 నవంబర్ 2023: రాజౌరిలోని బాజిమల్ ప్రాంతంలో జరిగిన ఎన్‌కౌంటర్‌లో ఇద్దరు ఆర్మీ కెప్టెన్‌లు, ముగ్గురు సైనికులు మరణించారు.
5 మే 2023: రాజౌరీలోని కేసరి హిల్ ప్రాంతంలో ఉగ్రవాదుల దాడిలో ఐదుగురు సైనికులు మరణించారు.
20 ఏప్రిల్ 2023: పూంచ్‌లో ఒక సైనిక వాహనాన్ని చుట్టుముట్టి కాల్పులు జరపగా, ఐదుగురు సైనికులు అమరులయ్యారు.
10 అక్టోబరు 2021: పూంచ్‌లోని భటాధులియన్‌కు ఆనుకుని ఉన్న చమ్రేడ్ అటవీ ప్రాంతంలో ఉగ్రవాదుల దాడిలో ఐదుగురు ఆర్మీ సైనికులు మరణించారు.
15 అక్టోబర్ 2021: భటాధులియన్ అడవిలో జరిగిన ఎన్‌కౌంటర్‌లో నలుగురు ఆర్మీ సైనికులు అమరులయ్యారు.
