Andhrapradesh : ఏపీ ప్రభుత్వం కీలక నిర్ణయం.. ఆ గ్రామాల పరిధిలోని ప్రజలకు భారీ శుభవార్త

ఏపీ ప్రభుత్వం కీలక నిర్ణయం తీసుకుంది. అమరావతి రాజధాని కోసం ల్యాండ్ పూలింగ్‌కు భూములిచ్చిన రాజధాని గ్రామాల అభివృద్ధికి ప్రభుత్వం చర్యలు చేపట్టింది.

రాజధాని అమరావతి జోన్-8 ప్రాంతంలోని నాలుగు గ్రామాల్లో మౌలిక వసతుల అభివృద్ధికోసం ప్రభుత్వం టెండర్లు ఖరారు చేసింది.

కృష్ణాయపాలెం, వెంకటపాలెం, పెనుమాక, ఉండవల్లి గ్రామాల్లో ప్రభుత్వం అభివృద్ధి పనులు చేపట్టనుంది.

రూ.1358 కోట్లతో అభివృద్ది పనులు చేసేందుకు మేఘా ఇంజినీరింగ్ అండ్ ఇన్ ఫ్రా సంస్థకు కాంట్రాక్టు అప్పగించింది. ఎల్1 బిడ్‌ను ఆమోదించి పనిని అప్పగిస్తూ ఎడీసీఎల్ తీసుకున్న నిర్ణయానికి ప్రభుత్వం ఆమోదం తెలిపింది.

గ్రామాల పరిధిలో లే-అవుట్‌లలో రోడ్లు, డ్రెయిన్లు, నీటి సరఫరా, మురుగునీరు పారుదల నిర్మాణాలు. విద్యుత్ & ఐసీటీకోసం యుటిలిటీ డక్ట్‌ల నిర్మాణం చేపట్టనున్నారు. అదేవిధంగా పునర్వినియోగ వాటర్ లైన్, అవెన్యూ ప్లాంటేషన్, గ్రీనరీ అభివృద్ధితోపాటు తదితరుల పనులు చేపట్టనున్నారు.

అభివృద్ధి పనులకోసం అవసరమైన నిధులు, తదుపరి చర్యలు తీసుకోవాలని అమరావతి డెవలప్‌మెంట్ కార్పొరేషన్ లిమిటెడ్ (ఏడీసీఎల్) ఎండీకి ప్రభుత్వం ఆదేశించింది. ఈ మేరకు పురపాలక పట్టణాభివృద్ధి శాఖ ముఖ్యకార్యదర్శి ఎస్. సురేష్ కుమార్ ఉత్తర్వులు జారీ చేశారు.

ల్యాండ్ పూలింగ్ గ్రామాల అభివృద్ధిని వేగవంతం చేయడం ద్వారా భూములిచ్చిన రైతులు, గ్రామాల ప్రజల్లో విశ్వాసాన్ని మరింత బలోపేతం చేయాలని ప్రభుత్వం భావిస్తోంది.

భూములిచ్చిన గ్రామాల్లో అభివృద్ధి పనులు ఆలస్యం కాకుండా, ప్రణాళికాబద్ధంగా అమలు చేయడం ద్వారా అమరావతి రాజధాని ప్రాంతాన్ని దేశంలోనే ఒక ఆదర్శ అభివృద్ధి నమూనాగా నిలపాలన్నదే ప్రభుత్వ లక్ష్యంగా కనిపిస్తోంది.