ఎన్నికల్లో పోటీ చేయను, రాజకీయాలు వదిలేస్తా- చంద్రబాబుకు కొడాలి నాని సవాల్

లోకేశ్‌కు అడ్డు వస్తాడనే జూ.ఎన్టీఆర్ పైకి బాలయ్యను వదిలారు. నాలుగు సార్లు గెలిచిన చరిత్ర నాది. మరో నాలుగేళ్లు గెలుస్తా.

Kodali Nani Challenge To Chandrababu Naidu

Kodali Nani Challenge : గుడివాడలో టీడీపీ బహిరంగ సభలో నేనేంటో నీకు చూపిస్తా అంటూ.. తనను ఉద్దేశించి టీడీపీ అధినేత చంద్రబాబు చేసిన వ్యాఖ్యలకు వైసీపీ ఎమ్మెల్యే కొడాలి నాని ఘాటుగా బదులిచ్చారు. చంద్రబాబుపై ఆయన ఎదురుదాడికి దిగారు. చంద్రబాబుకి ఆయన సవాల్ విసిరారు. 14ఏళ్లు సీఎంగా ఉన్న చంద్రబాబు పేదల కోసం ఒక్క ఎకరా సేకరించినట్లు నిరూపిస్తే రాజకీయాలను వదిలేస్తానని, ఎన్నికల్లో పోటీ చేయనని కొడాలి నాని అన్నారు. దమ్ముంటే.. తన సవాల్ ను చంద్రబాబు స్వీకరించాలన్నారు.

‘గుడివాడలో ఇవాళ టీడీపీ వర్ధంతి చేసి, చంద్రబాబు పిండం పెట్టారు. నాపై, సీఎం జగన్పై పిచ్చి ఆరోపణలు చేసి సొల్లు నాయుడు వెళ్ళారు. సీఎంలుగా వైఎస్ఆర్, జగన్ హయాంలో ఇళ్ల స్థలాలు, నీటి అవసరాలకు 600 ఎకరాల భూసేకరణ చేశారు. 14ఏళ్లు సీఎం గా ఉన్న చంద్రబాబు పేదల కోసం ఒక్క ఎకరా సేకరించినట్లు నిరూపిస్తే రాజకీయాలను వదిలేస్తా. ఎన్నికల్లో పోటీ చేయను. చంద్రబాబుకి దమ్ముంటే నా సవాల్ స్వీకరించాలని ఛాలెంజ్ చేస్తున్నా.

Also Read : నా దగ్గరే ఓనమాలు నేర్చుకుని నన్నే అంటావా..? నేనేంటో చూపిస్తా- కొడాలి నానికి చంద్రబాబు స్ట్రాంగ్ వార్నింగ్

చావటానికైనా సిద్ధంగా ఉన్నా. చంద్రబాబు ఉడత ఊపుడికి భయపడను. గుడివాడలో చంద్రబాబు పిచ్చి కబుర్లు ఎవరూ నమ్మరు. నేను గుడివాడ ముద్దు బిడ్డను. నాలుగు సార్లు గెలిచిన చరిత్ర నాది. మరో నాలుగేళ్లు గెలుస్తా. చంద్రబాబు పార్టీని ఎన్ని సార్లు గెలిపించారు. తెలంగాణలో భూస్థాపితం చేశారు. ఇప్పుడు పవన్ కల్యాణ్ కాళ్ళు పట్టుకున్నారు. 5వేల కుర్చీలు వేసి 10 నియోజకవర్గాల నుండి మనుషులని రప్పించి చంద్రబాబు ఏం సాధించారు?

లోకేశ్ కు అడ్డు వస్తాడనే జూ.ఎన్టీఆర్ పైకి బాలయ్యను వదిలారు. లోకేశ్ లాంటి కొడుకు శత్రువుకు కూడా ఉండకూడదు. వైఎస్సార్ కొన్న స్థలంలో టిడ్కో ఫ్లాట్ల పునాదులు వేసి చంద్రబాబు వదిలేశారు. కనీసం కాంట్రాక్టర్ కు డబ్బు కూడా చెల్లించలేదు. అధికారంలోకి వచ్చిన తర్వాత ఫ్లాట్ల నిర్మాణం పూర్తి చేసి పూర్తి స్థాయి అభివృద్ధి చేసి లబ్దిదారులకు అప్పగించిన ఘనత సీఎం జగన్ ది. 75ఏళ్లు వచ్చి కూడా చంద్రబాబు పచ్చి అబద్ధాలు ఆడుతున్నారు.

Also Read : కొడాలి నాని గుండెల్లో రైళ్లు.. కొత్త థియరీ చెబుతున్న గుడివాడ ఎమ్మెల్యే

ఎన్టీఆర్ గంజాయి మొక్క అని చెప్పి, సీఎం పదవి దోచుకున్న రోజులను ఎవ్వరూ మర్చిపోరు. కాంగ్రెస్ దగ్గర ఓనమాలు నేర్చుకున్న చంద్రబాబు మా గురించి మాట్లాడటం హాస్యాస్పదం. మరదలిని చంపి, తమ్ముడిని పిచ్చొడిని చేసిన దుర్మార్గుడు చంద్రబాబుకు నా గురించి మాట్లాడే అర్హత లేదు. నాకు బూతుల కోటలో ఎమ్మెల్యే పదవి వస్తే, కోతల కోటాలో చంద్రబాబుకు వచ్చిందా?” అని నిప్పులు చెరిగారు కొడాలి నాని.