SRH vs KKR : కోల్‌కతా కుమ్మేసిందిగా.. బౌలర్ల దెబ్బకు విలవిల.. హైదరాబాద్‌కు హ్యాట్రిక్‌ ఓటమి..!
SRH vs KKR : కోల్‌కతా నైట్ రైడర్స్ సొంత మైదానంలో అద్భుతమైన ప్రదర్శనతో సన్‌రైజర్స్ హైదరాబాద్‌ను చిత్తుగా ఓడించింది. ఈ సీజన్‌లో హైదరాబాద్‌కు ఇది వరుసగా మూడో ఓటమి. కోల్‌కతా బౌలర్ల దెబ్బకు చేతులేత్తేసింది.
- Published By: 10TV Digital Team ,Published On : April 3, 2025 / 11:18 PM IST
KKR vs SRH : Photo Credit : @IPL (X)
IPL 2025 SRH vs KKR : ఐపీఎల్ 2025లో భాగంగా కోల్‌కతా నైట్ రైడర్స్ సొంత ఈడెన్ గార్డెన్స్ స్టేడియంలో జరిగిన మ్యాచ్‌లో సన్‌రైజర్స్ హైదరాబాద్‌ను 80 పరుగుల తేడాతో చిత్తుగా ఓడించింది. ముందుగా బ్యాటింగ్ చేసిన కోల్‌కతా, వెంకటేష్ అయ్యర్, అంగ్క్రిష్ రఘువంశీ, రింకు సింగ్ ఇన్నింగ్స్‌తో నిర్ణీత 20 ఓవర్లలో 6 వికెట్ల నష్టానికి 200 పరుగులు చేసింది. ఈ స్కోరు ముందు హైదరాబాద్ బ్యాటింగ్ ఆర్డర్ 16.4 ఓవర్లలో కేవలం 120 పరుగులకే కుప్పకూలింది.
ఒకానొక సమయంలో కోల్‌కతాకు 150 పరుగుల స్కోరు కూడా కష్టంగా అనిపించింది. కానీ, చివరి 5 ఓవర్లలో 78 పరుగులు చేయడంతో జట్టు మంచి స్కోరును చేరుకుంది. వెంకటేష్ అయ్యర్ 29 బంతుల్లో 7 ఫోర్లు, 3 సిక్సర్లతో 60 పరుగులతో హాఫ్ సెంచరీ నమోదు చేసి జట్టులో కీలకంగా వ్యవహరించాడు. రింకు సింగ్ 17 బంతుల్లో 32 పరుగులు చేశాడు.
హైదరాబాద్‌కు మూడో ఓటమి :
అంగ్క్రిష్ రఘువంశీ 32 బంతుల్లో 5 ఫోర్లు, 2 సిక్సర్లతో 50 పరుగులు చేశాడు. ఈ సీజన్‌లో హైదరాబాద్‌కు ఇది వరుసగా మూడో ఓటమి. అంతకుముందు, మార్చి 30న ఢిల్లీ క్యాపిటల్స్ చేతిలో ఓడిపోయింది. మార్చి 27న, లక్నో సూపర్ జెయింట్స్ సొంతగడ్డపైనే హైదరాబాద్ జట్టును ఓడించింది. కోల్‌కతా చేతిలో హైదరాబాద్ జట్టు ఎదుర్కొన్న ఓటమి ఐపీఎల్‌లో హైదరాబాద్‌కు అతిపెద్ద ఓటమి.
హైదరాబాద్ గెలవాలంటే 201 పరుగులు అవసరం. బ్యాటింగ్‌ను పరిశీలిస్తే.. కష్టంగా అనిపించలేదు. ట్రావిస్ హెడ్, అభిషేక్ శర్మ తుఫాను ఇన్నింగ్స్ కనిపించలేదు. వైభవ్ అరోరా వేసిన తొలి బంతికే ఫోర్ కొట్టి హెడ్ కోల్‌కతాకు వణుకుపుట్టించాడు. కానీ, ఆ తర్వాతి బంతికే హర్షిత్ రాణాకు క్యాచ్ ఇచ్చాడు. రెండో ఓవర్ చివరి బంతికి రాణా అభిషేక్‌ను కూడా పెవిలియన్‌కు పంపాడు. ఇలా రెండు పరుగులు మాత్రమే చేయగలిగాడు.
ఇషాన్-నితీష్ విఫలం :
క్లాసెన్ 21 బంతుల్లో 2 ఫోర్లు, 2 సిక్స్‌లతో 33 పరుగులతో టాప్‌ స్కోరర్‌ నిలిచాడు. మెండిస్ 20 బంతుల్లో 1 ఫోర్లు, 2 సిక్స్‌లతో 27 పరుగులు చేశాడు. మిగతా ప్లేయర్ అత్యంత దారుణంగా విఫలమై ఒకరి తర్వాత మరొకరు పెవిలియన్ బాటపట్టారు.
ఇషాన్ కిషన్ ఇన్నింగ్స్‌కు వైభవ్ బ్రేక్ వేశాడు. ఈ ఎడమచేతి వాటం బ్యాట్స్‌మన్ రెండు పరుగులు దాటి వెళ్ళలేకపోయాడు. నితీష్ కుమార్ రెడ్డి కూడా తన ఇన్నింగ్స్‌ను 19 పరుగులకు మించి వెళ్లలేదు. నరైన్ బౌలింగ్‌లో కమిండు మెండిస్ ఔట్ కావడంతో హైదరాబాద్ జట్టుకు ఐదో వికెట్ దక్కింది. ఈ మ్యాచ్‌లో అనికేత్ వర్మ కూడా ప్రత్యేకంగా ఏం మ్యాజిక్ చేయలేకపోయాడు. వరుణ్ చక్రవర్తి ఔట్ చేశాడు. అతడి ఖాతాలో 6 పరుగులు వచ్చాయి.
హెన్రిచ్ క్లాసెన్ ఒంటరిగా పోరాటం చేశాడు. కానీ, అతని ఇన్నింగ్స్‌ను కూడా 15వ ఓవర్ నాల్గవ బంతికి వైభవ్ ముగించాడు. ఈ కుడిచేతి వాటం బ్యాట్స్‌మన్ 21 బంతుల్లో రెండు ఫోర్లు, రెండు సిక్సర్లతో 33 పరుగులు చేశాడు. కెప్టెన్ పాట్ కమ్మిన్స్ 15 బంతుల్లో 14 పరుగులు చేసిన తర్వాత వరుణ్ చేతికి చిక్కాడు. కోల్‌కతా బౌలర్లలో వైభవ్ అరోరా, వరుణ్ చక్రవర్తి 3 వికెట్లు తీసుకోగా, రస్సెల్‌ 2 వికెట్లు, హర్షిత్ రాణా, సునిల్‌ నరైన్ తలో వికెట్ పడగొట్టారు.
వెంకటేష్ అయ్యర్ ఫామ్‌లోకి :
ఐపీఎల్ వేలంలో రూ.23.75 కోట్లకు అమ్ముడైన అయ్యర్ గత మూడు మ్యాచ్‌ల్లో కేవలం 9 పరుగులు మాత్రమే చేయగలిగాడు. కానీ, హైదరాబాద్‌పై అద్భుతంగా బ్యాటింగ్ చేయడంతో అయ్యర్ తన సత్తా ఏంటో చూపించాడు.
హైదరాబాద్ కెప్టెన్ పాట్ కమ్మిన్స్ వేసిన 19వ ఓవర్లో అయ్యర్ 3 ఫోర్లు, ఒక సిక్సర్ కొట్టి 21 పరుగులు చేశాడు. అయ్యర్ బ్యాటింగ్ సమయంలో రింకు సింగ్ కూడా పరుగులు తీశాడు. 17 బంతుల్లో 4 ఫోర్లు, ఒక సిక్సర్‌తో 32 పరుగులు చేసి అజేయంగా నిలిచాడు. గత సీజన్ నుంచి రింకు ఫామ్‌లో లేడు. ప్రస్తుత సీజన్‌లో గత 3 మ్యాచ్‌లలో 2 ఇన్నింగ్స్‌లలో కేవలం 29 పరుగులు మాత్రమే చేశాడు.
కమిన్స్-షమికి ఎదురుదెబ్బలు :
పాట్ కమ్మిన్స్, మహ్మద్ షమీ జంట కోల్‌కతాకు తొలి ఎదురుదెబ్బ తగిలింది. కమ్మిన్స్ తొలి ఓవర్లోనే వికెట్ కీపర్-బ్యాట్స్ మాన్ క్వింటన్ డి కాక్ (1)ను ఔట్ చేశాడు. ఆ తర్వాత నరైన్ (7)ను షమీ అవుట్ చేశాడు.
రహానే-రఘువంశీ ఇన్నింగ్స్ :
కోల్‌కతా కేవలం 16 పరుగులకే రెండు వికెట్లు కోల్పోయింది. అక్కడి నుంచి కెప్టెన్ అజింక్య రహానే (38), యువ బ్యాట్స్‌మన్ అంగ్క్రిష్ రఘువంశీ (50) ఇన్నింగ్స్‌ను చక్కదిద్ది జట్టును 100 పరుగులకు దగ్గరగా తీసుకెళ్లారు.
వారిద్దరూ 81 పరుగులకు కీలక భాగస్వామ్యాన్ని నెలకొల్పారు. రఘువంశీ 32 బంతుల్లో 50 పరుగులు చేశాడు. అతని ఇన్నింగ్స్‌లో 5 ఫోర్లు, 2 సిక్సర్లు ఉన్నాయి. ఈ ఇద్దరి తర్వాత, అయ్యర్, రింకు కోల్‌కతా స్కోరును 200 భారీ స్కోరుకు తీసుకెళ్లారు.
